Jeremiya 13:27 - Bhiblia Yo Sawuleka

²⁷ Ni wonile wugango wako, ni kudila ka kunavela kwako, wugango wako wo phindeletisa, amu mimangoni ni mu tithembweni. Dikhombo kwako Jerusalema! U na verela kala yihi mbimo na u si basiswi kani?

Jeremiya 13:27 Referans Kwoze

Hoseya 8:5

Dirole dako, awe Samariya, di lambilwe; kuhenya kwangu kuturile txitimwi kwawe; Va na pwata mnandu kala ditshiku muni, kani?

Ezekhiyele 24:13

Amu ka wubihi wako ku ni nduma yo biha, nguko ni ku sawulekisile, aniko awe khwa ti sawulekisa; khu na mbiswa u sawulekiswa ka wubihi wako, ngako ni si leki ku ku henyela.

Ezekhiyele 6:13

Sekoko mi na tiziva taku ani ngani Mkoma, mbimo yile sirumbi sawe si no maneka hagari ka sithombe sawe, madhawani ka siluvelo sawe, ni ka sotshe simangwana so guleka, kotshe titshokani ka mimango, ni hahatshi ka yotshe mindonga yo nakana, ni hahatshi ka mikusu, ka wukhalo wule va nga ti ti ningela mafura o bhumula, ka sotshe sithombe sawe.

Isaya 65:7

sionho sanu, kumweko ni sionho sa vatate vanu, kuwomba Mkoma, avale va nga hisa dibaselo mimangoni, ni ku ni ruketela simangwanani; ngu mhaka yeto, ni na tshumela ni va pimela mithumo yawe ya kale, masoni kwawe.

Hoseya 4:2

Kova ni kuxambanya makuhu dwe, ni kuhemba, ni kudaya, ni wukhamba, ni wugango, va thuma kutheketa mnoha txitimwi ka minoha.

Ezekhiyele 36:37

Mkoma Txizimu a khene: Kambe ngu mhaka ya tona eto, nyumba ya ka Israyeli yi na ni kombela, ati to ni txi yi mahela: Kuandisa vathu va yona, kufana ni mtxhambi.

Mavingu 1:22

Anu siphukuphuku, mi na randa wuphukuphuku wanu kala yihi mbimo kani? Ni nanu vatseketseli, mi na randa kutseketsela kani? Se anu siphukuphuku mi na venga wuzivi kani?

Mtuletelo 8:13

Se konako ni to wona ni kuengisa ngungwa yi nga ti puruma txitimwi ha mpfhukani, yi kwangula ngu dipswi da hombe, yi txi: “Dikhombo, Dikhombo! Dikhombo ka vale va nga aka ha mafuni, mbimo yi yi no vetwa mipundu ya tingelozi ta tiraru ti ku ngadi ti txi na veta!”

Jakobe 4:4

Vanyawugangonu, kha mi tizivi ti to wungana ni ditiko mbulala ka Txizimu, kani? Ngu toneto, awu a lavako wungana ni ditiko, i mlala wa Txizimu.

2 Vakorinto 12:21

Na thava ti to mbimo yi ni no tshumela ni ta kheyo kwanu, Txizimu txi nata ni xowokisa ngu mhaka yanu, se ani ni txi dila ngu mhaka ya vale vavangi, va nga onha kale, va sinziko kuhunduluka ka wubihi, ka wugelegele ni ka manyala ya ti va nga ti maha.

2 Vakorinto 7:1

Vo randeka ngutu, ngako hi ku ni sithembiso siya, he ti basiseni ka yotshe nzambwa ya mmidi ni ya moya, hi txi zama kuhetisa mthumo wa ku ti sawulekisa kwathu ngu txithavo ka Txizimu.

Matewu 11:21

“Dikhombo dako, Korazini! Dikhombo dako, Bhetsayidha! Nguko sidiwukiso si si nga mahwa kwanu, idiku si ti mahilwe madhoropani ka Tiro ni Sidhoni, nga va di kombile kale kuhunduluka kwawe, ngu kuambala masaka ni kutola dikhuma.

Zefaniya 3:1

Dikhombo ka wule wa ku ti lambisa ni kutinyenyezisa, didhoropa da kutsindaveta!

Hoseya 1:2

Makhato a dipswi da Mkoma ngu ka Hoseya; Mkoma a to khene koko ka Hoseya: Tsula uya teka wamsikati wa wugelegele ni vanana va wugelegele; nguko ditiko di mahile wugelegele, ngu kutshuralela Mkoma.

Ezekhiyele 36:25

Sekoko ni na xwaya mati o sawuleka txitimwi kwanu, mi na sawulekiswa; ni na mi sawulekisa ka yotshe nzambwa yanu, ni ka sotshe sithombe sanu.

Ezekhiyele 24:6

Ngu kumaha keto, Mkoma a khene: Dikhombo ka didhoropa do theketa mnoha, ka khadi yo nzihala, eyo kunzihala ka kona ku si thavekiko! Thavisa txitxuwu txa nyama ka yona tximwetxo ngu tximwetxo, u nga wise txilo.

Ezekhiyele 20:28

Nguko a kule ni nga ti ti va wuleta ka ditiko dile ni nga guleta dianza, kasi kuvaninga, vona va to wonetela ka sotshe simangwana, ni ka yotshe mindonga yo txhuma, kambe va ningete koneho miphaxo yawe, ve kombisa kona hale ku ni henyisa kwawe ngu miningelo yawe, va txi veketela ni sa kubhumula, se va txi ningela miningelo ya sa kusela.

Ezekhiyele 2:10

Se a to di tula masoni kwangu, dona di ti ti bhatwe mndani ni hahanze, kambe ka dona ku ti ti ni mibhalo ya sidilo, ni tihuwa ni makhombo.

Isaya 57:7

U veka m'bhedhu wako txitimwi ka mimango yo lapha, ni kuguleka; se u kwela ka yona u maha miphaxo.

Masalmo 94:4

Votshe va va mahako kubiha va ti guleta, va ti kulisa ni kutiguleta ngu wubihi.

Jeremiya 3:6

Mkoma a to womba kwangu ka masiku a mfumeli Josiya, a txi khene: “Ina u ti woni ti a nga maha Israyeli wu wo tiwuka kani? Ene a kwete mimango yotshe yo guleka, ni hahatshi ka yotshe mindonga yo nyuka, konamo a ta so mbetete wugangoni.

Masalmo 94:8

Anu sipumbu, mi na gonda mbimo muni kani? Anu vathu va mahundwa, mi na ziva mbimo muni, kani?

Jeremiya 11:15

Txirandwa txangu txi maha txani nyumbani kwangu aku txi nga maha manyala o tala kani? Sifungo ni nyama yi nga basiswa si nga thavisa kubiha kwako kani? Ngako u txi maha to biha ngu kona u tsakako!

Ezekhiyele 16:23

Se ku to maheka msana ka wotshe wubihi wako: (Dikhombo! Dikhombo kwako! Kuwomba Mkoma Txizimu),

Ezekhiyele 24:12

Ngu thuma ka walo; kha ka thaveka ku nzihala ka khadi; ku nzihala ka yona ku na ya mndiloni.