Jeremiya 13:18 - Bhiblia Yo Sawuleka

¹⁸ Gela mfumeli ni mame wa mfumeli, u txi khawe: Ti namiseni, mi txi khalahatsha, nguko mbhoti wa wukoma wanu wu wite, i ku txona txiningo txanu txa mfumo.

Jeremiya 13:18 Referans Kwoze

Jeremiya 22:26

Ni na kutovela, awe ni mwamwako wu a nga kuveleka, mi txi ya ka dimwani ditiko, aho mi nga mba velekwa kona, kona kheyo mi na ya fela kona.

2 Vafumeli 24:12

Sekoko a to huma Jowakimu, mfumeli wa ka Judha, eya ka mfumeli wa Bhabhilona, kumweko ni mwamwakwe ni sithumi sakwe, ni madhota akwe, ni mithenwa yakwe; se mfumeli wa Bhabhilona a to mñola, ka dilembe da wutxhanu ni mararu da kufuma kwakwe.

2 Vafumeli 24:15

Sekoko, Nabhukodhonozori a to ñola Jowakimu e mtsulisa Bhabhilona, ni mame wa mfumeli, ni vasikati va mfumeli, ni mithenwa yakwe, e teka ni vanyamitamo va ditiko ngu Jerusalema kala Bhabhilona.

2 Makronika 33:19

Se mkombelo wakwe, ni ti Txizimu txi nga wu amukelisa tona, ni sotshe sionho sakwe, ni wubihi wakwe, ni makhalo o guleka ale a nga aka e veka ni sithombe sawe so vatwa, na a sanzi kutiveka hahatshi, wonani ti to totshe ti bhatwe ka mabhuku a vahuti.

Isaya 47:1

Txhika u khalahatsha ha lithuluni, awe wotuma, mwanana wa muhorana wa Bhabhilona; khalahatsha hahatshi; kha ku ngadi ni txitulu txa wukoma, awe mwanana wa muhorana wa Vakaldheya, nguko khu na mbiswa u dhanwa ku umnene, niku u tshurile.

2 Makronika 33:12

Se ene a di pandisekile, a to khongela masoni ka Mkoma Txizimu txakwe, e ti veka hahatshi ngutu masoni ka Txizimu txa vatate vakwe,

1 Pedro 5:6

Ngu konaho, ti vekeni hahatshi ka diwoko da mtamo, da Txizimu, kasi ku txona, txi nata mi guleta ka mbimo yi yi lavekako.

Jakobe 4:10

Ti vekeni hahatshi masoni ka Mkoma, se ene a na mi guleta.

Matewu 18:4

Ngu konaho, awu a no ti veka hahatshi a txi fanana ni mwanana wuwa wam'dotho, ngene a no va i di wa hombe Mfumoni ka nzumani.

Jona 3:6

Nguko dipwsi diya di hokile ka mfumeli wa Ninivha, se a to khukha ha txituluni kwakwe ka wukoma, a txi thavisa syambalo sakwe, e fenengela masaka, e khalahatsha hadikhumani.

Isaya 3:26

Se sike sa didhoropa si na va kupandisekani ni kudilani; ene a na handwa e khalahatshi hahatshi.

2 Makronika 33:23

Aniko kha ti veka hahatshi masoni ka Mkoma, nga Manasi tate wakwe, a nga ti veka hahatshi; Amoni a to engetela sionho sakwe.

Eksodha 10:3

Se Mosi ni Aroni, va yite kambe ka Faro, va txi ya m'gela tiya: “Mkoma, Txizimu txa Vahebheru, a khene: U na gwita mbimo muni kukaneta u si ti veki hahatshi masoni kwangu kani? Leka vathu vangu ve huma, kasi va txi ya ni khozela.

Sidilo 2:10

Sekoko madhota a dihorana da Siyoni ma khalahatshile ha ka mafu, ma txi dwe; me ti theletela lithulu ha misungo ma txi ambala masaka; votuma va Jerusalema va namisile misungo ha mafuni.

Eksodha 39:28

txigoko txa linyu ya lisima, sigoko so ambalwa ka mbimo ya wukhongeli ni sibhulukwana sa linyu,

Mavingu 27:24

Nguko tithomba hi nga ta kwa mbi gwita; ina m'bhoti wu ndi na pindukela ka liveleko ni liveleko kani?

Isaya 3:20

mibhoti, ni masinda o tshurisa ngu ona mawoko, ni tiketani, ni sibutxhangwana sa mafura o bhumula, ni singeda;

Jeremiya 29:2

(msana ka kuva Jokoniya, mfumeli, a di humile ngu Jerusalema kumweko ni mame wa mfumeli, ni tinduna ni vathangeli va ka Judha ni Jerusalema, ni vavati ni vapeki va nyundo).

Jeremiya 36:16

Sekoko aha va nga pfa totshe timhaka tiya, va to dhuka, ve wonana, va txi kha vona ka Bharuke: Ngu ditshuri hi na gela mfumeli totshe timhaka tiya.

Sidilo 1:6

Se ngu ka mwanana wa txisikati wa Siyoni wu hangalakile wotshe wudhumo wakwe; vathangeli vakwe va sate va txi fanana ni timbavala to pwata libala lo dya ka lona; ti tsimbila-tsimbila ti si nga ni mtamo masoni ka mxoti.

Sidilo 1:9

Nzambwa yakwe yi mu ka syambalo sakwe; kha za a di alakanyile ngu magwito akwe; ngu toneto, kuwa kwakwe kuvite ka hombe ngutu. A pwata ni mmalateli: “Wawo, Mkoma, kuxaniseka kwangu! Nguko mlala wa ti guleta!”

Sidilo 5:16

M'bhoti wa ha msungo kwathu wu wite! Se hi na txani, nguko hi onhile!

Ezekhiyele 16:12

Ni ku namekile txingwavila ha thonvuni, ni singeda tinzeveni, ni m'bhoti wa wudhundo ha msungo.

Ezekhiyele 21:26

Mkoma Txizimu a khene: Thavisa txigoko, u gula m'bhoti; kha wu na mbi va wona kambe m'bhoti wuwa; guleta si si ku hahatshi, u wisa sile sa kutikulisa.

Ezekhiyele 24:17

Dilisa kutipimela; u nga dilele vafi, ambala txigoko txako, ni tikathula mikondoni kwako; u nga sisale u txi dya sakudya sa vathu.

Ezekhiyele 24:23

Kambe mi na ambala sigoko ka misungo yanu, ni tikathula mikondoni kwanu; kha mi na mbi pandiseka hambi kudila, aniko mi na fela ka wubihi wanu, mi txi dila vamwevo ka vamwani.

Ezekhiyele 44:18

Hamisungo kwawe va na ambala sigoko sa linyu, ni simolowani sa linyu siwununi kwawe; kha va na mbi ambala so va dhunukisa.

Dhaniyeli 5:20

Aniko mbimo yi mbilu yakwe yi nga tikulisa, e bangisa msungo wakwe ngu wugwile, a to thaviswa ha txituluni kwakwe ka wukoma, e tekelwa ni wudhumo wakwe.

Jeremiya 22:24

Nga ku ni hanyako, kuwomba Mkoma, i ti ku Jowakimi, mwana Jehoyakimu, mfumeli wa ka Judha, i ti kova ringi ya dianza dangu da txinene, nga ni di mkodote konaho.