Jakobe 5:5 - Bhiblia Yo Sawuleka

⁵ Mi zumbile ha mafuni mi si thumi txilo, mi txi nonisa timbilu tanu, ti ti rinzelako ditshiku da kudawa.

Jakobe 5:5 Referans Kwoze

1 Timoti 5:6

Kasi awule a lavako ku ti mahela kuranda, eyo hambi a txi hanya, a fite.

Luka 16:25

Abrahamu a xamute a txi khene: ‘Mwanangu, alakanya ti to awe u amukete mathomo ako kuhanyani kwako, aniko Lazaro ene a amukete sixaniso; se konkuwa ene wa mana kuruliswa mbilu, aniko awe wa mana sixaniso.

Luka 16:19

“Ku ti ti ho m'thu i nga ti nyatithombe, awu a nga txi ambala tinguwo ta masilika o bhilivila ni linya ya lisima ngutu, a txi dya sa kutshamba otshe masiku.

Amosi 6:1

Dikhombo ka va va humulako Siyoni, ni va va tipfako va di zumbisekile mmangoni ka Samariya, va ku ni ditina hagari ka matiko o khata, ni vale vatako nyumbani ka Israyeli.

Jeremiya 12:3

O Mkoma, awe wa ni ziva, wa ti wona, wa xola mbilu yangu ti taku yi zumbisa kutxani kwako. Va khumule nga tinvuta ti ti yiswako txitshindoni, va longisele ditshiku da kudawa.

Mtuletelo 18:7

“Madingano ni ku ti dhumisa kwakwe ni kutikulisa kwakwe, m'tshumeteleni ngu sixaniso ni makhombo nguko mbiluni kwakwe a ti ti khene:” “Ni khalahatshile nga khosikazi, kha ni nga noni, txima kha ni na mbi va ni txidilo.”

Jeremiya 25:34

Anu vadyisi, pekani huwa mi txi dila. Pulukutani dikhumani, anu vahombe va mtxhambi. Nguko masiku a kudawa kwanu ma hokile, ni na mi hangalasa, mi na wa, nga txiya txa lisima.

Isaya 22:13

Aniko wonani m'buso litsako; ka dawa tihomu ta mikati, ni tinvuta; kudyiwa nyama ni kuselwa vhinya, aniko kuwombwa tiya: He dyeni, hi sela, nguko mangwana hi na fa.

1 Samuwele 25:36

Mbimo yile Abhigayeli a nga wuya ka Nabhali, a to mana taku m'tini kwakwe ku ni m'buso wa hombe, wo fana ni m'buso wa mfumeli; se mbilu ya Nabhali yi ti ti tsakile ngutu, a di levile ngutu, aha koza asi m'gela txilo kala ni mixo.

Judha 1:12

vathu vava ngu vona i ku sikhuvekiso mibusoni kwanu ka lirando; vadya va si na tingana, ve ti dyisa vapune, va fana ni marefu o mbi na mati, ma pengapengiswako ngu moya; mindonga ya wuxika yi si velekiko mihando, mindonga yi nga fa kumbidi yi txi dulwa ni mikoloti ya yona;

2 Pedro 2:13

Va na amukelisa toneto muholo wa wubihi wawe. Vona va tsakiswa ngu kutiningetetela ka mithumo ya nzambwa hagari ka mitshikari, vona va thela tingana ni kukhuvekisa vathu, mbimo yi va busako ni nanu mikhuwoni kwanu, va txi tsakela misakano yawe yo kanganyisa.

2 Timoti 3:4

vaningeli va vakwawe, vathu vo mbina txithavo, vo ti guleta, ava va randako ngutu so tsakisa nyama kupinda kuranda Txizimu.

Varoma 13:13

Nga tiya i ku mitshikari, he tsimbileni ngu fanelo, hi hambana ni limito mwendo wudevi, ni wugango mwendo wugelegele, ni livengo mwendo dibava.

Ezekhiyele 39:17

Awe koko, mwanana wa m'thu, Mkoma a khene: Gela sinyana sa totshe tixaka, ni sotshe sihari sa txitinga, u txi khawe: Patanani mi txi ta, mi txi ta ngu ka otshe madhawa, mi ta ka mphaxo wangu, ni phaxako ngu mhaka yanu, mphaxo wa hombe mimangoni ka Israyeli, mi txi dya nyama ni kusela mnoha.

Isaya 56:12

Ngonani, kuwomba vona, he tiseni vhinya, kambe hi na sela wusuke wo bava; se ditshiku da mangwana di na fana ni dona diya, ni kuva da hombe, da nduma ngutu.

Isaya 47:8

Konkuwa koko, engisa tiya, awe u tsakelako kutiphina, u tipfako u di zumbisekile, u wombako mbiluni kwako, u txi khawe: Ani ngani, hahanze kwangu, kuwalo mmwani; kha ni na mbi va noni, hambi kufelwa ngu vanana.

Isaya 3:16

Mkoma a to womba kambe a txi khene: Nguko mahorana a Siyoni ma ti kulisa, ma tsimbila ma di emisile tithamo ta ona, ma wonisa kugwilika, ma tsimbilisa ku nga mo sinya, se ma di ambate masinda minengeni.

Ekleziyaste 11:9

Awe wamphya, tsakela wuphya wako, kambe mbilu yako yi na tsake ka masiku a wuphya wako, se tsimbila ngu tinzila ta kudhunda ka mbilu yako, ni ti ti tsakisako maso ako; wa tiziva kambe taku, ka sotshe siya Txizimu txi na ku lamula.

Mavingu 17:1

I txhuko kuva ni sa sidotho sa kuoma na ku di ni litsako, kupinda nyumba yo tala ngu sakudya sa sinene, ku di ni mazunga.

Mavingu 7:14

Ni nayo miphaxo ya kuthutha; nyamsi ni dihisile kuvilela kwangu.

Masalmo 17:14

ni hulukise, Mkoma, ngu diwoko dako ka va vo biha, va fuvise ka ditiko diya. Ka vale va kuthembako va ninge tithomba to tala, ti dinganako kukhurisa vanana vawe ve tshumela ve khurisa ni vatukulu vawe.

1 Samuwele 25:6

Se mi na ya khanu ka m'thu wule wo humelela: Kudikha ku nave ni nawe, ni nyumba yako yi nave ni kudikha, ni sotshe si wu ku naso si nave ni kudikha.

Masalmo 73:7

Timbilu tawe ti tate ngu wubihi ti txi thekelela se misungo yawe yi tate ngu mialakanyo yo biha.

Ezekhiyele 16:49

Wubihi wa mwananu Sodhoma ngu wuwa: Kutikulisa, kulondola sakudya, wukara wakwe ni vanana vakwe vamahorana; aniko kha zivi kuthumisa manza a txisiwana ni awule wo pwata so maha.