Jakobe 1:10 - Bhiblia Yo Sawuleka

¹⁰ Kambe nene nyatithombe a na tsake ngako a txi vekwa hahatshi; nguko ene a na pinda kufana ni txiluva txa mwasi.

Jakobe 1:10 Referans Kwoze

1 Pedro 1:24

Nguko, m'thu wuhi ni wuhi a fana ni mwasi, kupfaliswa kwakwe kotshe, kufana ni txiluva txa mwasi, mwasi wa oma, se txiluva txi mora,

1 Johani 2:17

Kasi ditiko da pinda ni kunavela ka dona, kambe awu a mahako kuranda ka Txizimu, a zumba ngu ha ku si gumiko.

Jobe 14:2

A mila ku nga txiluva, se msana keto e oma; kambe wa tutuma kufana ni mtsudi, se e mwalala.

1 Timoti 6:17

Ka vanyatithombe va ha mafuni muwa, va laye ti to va si ti kulisi, va si veki kuthemba kwawe ka thomba yo mbi tsana, aniko ve themba Txizimu, txi hi wuyiselako sotshe ngu ku hi tatela, kasiku hi tsaka.

Matewu 5:3

“Va katekile ava i ku sisiwana moyani, nguko Mfumo wa nzumani mbwawe!

1 Vakorinto 7:31

ani va va londolako sa mafu awa, va ne nga kha va si thumisi, nguko mazumbelo a ditiko diya ma guma.

Masalmo 103:15

Kuhanya ka m'thu kufana ni mwasi; makhato a kona ma fana ni kumila ka txiluva txa thembweni,

Jakobe 4:14

Anu, ni ka kudotho kha mi tizivi ti ti no maheka mangwana! Wutomi wanu nji txani, kani? Nguko anu mi hunguva yi yi humelelako mbimwanyana, yi txi hangalaka.

Matewu 6:30

Se ngako koko Txizimu txi txi ambekisa tiya mwasi wa txitingani, awu nyamsi wu hanyako, se mangwana wu no wilwa wu tshotshwa ha mndiloni, ina txi nga lamba ku mi ambeka ngutu anu, vathunu va likholo la lidotho kani?”

Isaya 66:2

Nguko dianza dangu di mahile sotshe simaho siya, se sotshe simaha siya si to mahwa, kuwomba Mkoma; aniko wonani awu ni no muwona: Ka txisiwana, ni wule wo xaniseka moyani, kambe a dhudhumelako masoni ka dipswi dangu.

Isaya 40:6

Dipswi di kha dona: “Kwangula.” Se wokari a nje khene: Na kwangula ni txi khani txani kani? Yotshe nyama yi fana ni mwasi, ni kotshe kutshura ka yona kufana ni siluva sa txitinga.

Vafilipiya 3:8

Ngu ditshuri, sotshe ni si wona si si vhuni txilo, ngako ni txi si dinganisa ni lisima la kuziva Kristu Jesu, Mkoma wangu. Ngu mhaka yakwe, sotshe ni si tshotshile, kambe ni si wona i di nzambwa, kasiku ni mana Kristu;

Isaya 57:15

Nguko a womba tona eto Nyatxitimwi, wa Kuthaviseka, a zumbako kupindukani, eyo ditina dakwe i ku Kusawuleka: Ni zumba ka wukhalo wo guleka ni kusawuleka, kumweko ni kuxaniseka, ni kukarateka moyani, kasi kuwusa moya wa vale vo karateka, ni kuwusa timbilu ta vaxaniseki.

Masalmo 102:11

Masiku a kuhanya kwangu, ma fana ni mtsudi wu tutumako, se ani ni fana ni mwasi wu wunako.

Masalmo 37:2

nguko va na wilwa kufana ni diphunde va na wuna kufana ni mwasi wo nakana.

Masalmo 39:6

Ene wa pinda kufana ni mtsudi! Kha ti vhuni txilo kusengeletela tithomba, na asi ti zivi ti to ti na sala ni mani.

Isaya 40:7

Mwasi wa oma, se siluva sa mora, ngako moya wa kuhefemula ka Mkoma wu di pindile txitimwi ka sona. Ngu ditshuri, vathu i mwasi.