Isaya 9:19 - Bhiblia Yo Sawuleka

¹⁹ Ngu mhaka ya kuhenya ka Mkoma wa Mabutho a Tiyimbi, ditiko di na phuma, vathu va na nga tikhuni ha mndiloni; kha ku nga ni kudivalela mkwawe.

Isaya 9:19 Referans Kwoze

Mika 7:2

Vathu vavanene va nyamalate ha mafuni, kambe kuwalo ni wammweyo wo lulama hagari ka vathu; votshe va ti longisela kutheketa mnoha; mmwani ni mmwani a riyela mwanawe ngu likoka.

Mika 7:6

Nguko mfana a txhipisa tate wakwe, mwanana wa dihorana a wukela mwamwakwe, mamanyani a wukela masale wakwe, valala va m'thu ngu va nyumba yawe.

2 Pedro 2:4

Ngu toneto, ngako Txizimu txi nga mbi divalela tingelozi ti ti nga onha, aniko txi ti rinzile maphalani ka txidema txa Gehena, ahawa ti woneletwako kala ditshiku da kulamulwa,

Mithumo 2:20

Ditambo di na hinduka di maha txidema, mtxima wu na hinduka wu maha mnoha di sinzi kuhoka ditshiku da Mkoma, ditshiku da hombe do tala ngu wudhumo.

Matewu 27:45

Se kukhukhela ka txikhati txa wutxhanu ni tximwetxo kala ka txa wutxhanu ni mune, txidema txi to fenengeta dotshe ditiko.

Amosi 5:18

Dikhombo ka va va navelako ditshiku da Mkoma! Mi di lavela txani ditshiku di da Mkoma kani? Inava txidema, i si nga da kuwonekela.

Joyeli 2:2

ditshiku da txidema ni kupandiseka, da marefu ni txidema txo hangalaka; ku nga wuronga wo hangalaka txitimwi ka mimango, mbathu va hombe va mtamo ngutu, ava kukhukhela ka kale, kha va khali ku nga vaho, hambi msana kwawe kha va na mbi vaho ka malembe matako, ka liveleko ni liveleko.

Ezekhiyele 9:5

Se Mkoma a wombile ka vamwani, na ni txi tipfa nani: Mlondeteleni ngu msana didhoropani muwa, mi txi va xasela; wonisisani kha kwati, kambe mi nga va maheleni wumbilu.

Jeremiya 13:16

Dhumisani Mkoma, Txizimu txanu, na ku si se maha txidema, mikondo yanu yi si se humbwa mimangoni ko phuma; mi txi ngadi mi verela liwoningo a na li phemberusa li maha mtsudi wa kufa, ni txidema txo phindeletisa kuphuma.

Isaya 60:2

Nguko wona taku, txidema txi fenengetile mafu, ni kuphuma ku fenengetile vathu, se Mkoma a na humelela txitimwi kwako, ni wudhumo wakwe wu na woneka txitimwi kwako.

Isaya 24:6

Ngu mhaka yeto, txiruko txa heta mafu, se avale va hanyako ka ona, va na koneka; ngu mhaka yeto, vaaki va ha mafuni, va na hiswa, mbadotho ava va no sala.

Isaya 13:18

Va na fula mazambi ngu malaho awe, hambi vanana va va ku mndani, kha va na mbi pfelwa wusiwana, maso awe kha ma na mbi felela vanana.

Isaya 13:13

Ngu toneto, ni na dhudhumelisa nzuma, ni mafu ma na khukha ha wukhaloni ka ona, ngu mhaka ya kuhenya ka Mkoma wa Mabutho a Tiyimbi, ngu ditshiku da kuhenya kwakwe.

Isaya 13:9

Wonani, ditshiku da Mkoma data, do dhukisa, da tshofu, ni kuhenya ko tura, kasi kuhaxula ditiko, ni kulovisa vaonhi va dona.

Isaya 8:22

Se va txi wonetela ha mafuni, ku nava ni tshani ni txidema, va na xaniseka ve ndindelwa txidemani.

Isaya 5:30

Ka ditshiku donedo, va na bhonga txitimwi kwawe kufana ni mavimbi a linene; se awule a no wona mafu, a na wona txidema ni kuxaniseka, kuwonekela ku na vhalelwa ngu txidema.

Isaya 1:31

Se m'thu wa mtamo a na fana ni wufemu wa txikwenga, ni mthumo wa kona wu na fana ni tshatsha ya mndilo, aniko va na tura ngu wumbidi wawe, kupwateka ni wo va timela.

Isaya 3:5

Se vathu votshe va na xanisana, hambi vaakelani va na xanisana, ni mwanana a na xanisa didhota, vanyalidede va na xanisa vo thaviseka.

Isaya 4:4

Mbimo yi Mkoma a no kuwula nzambwa ya mwanana wa dihorana wa Siyoni, ni kubahula mnoha wa Jerusalema hagari ka dona, ngu moya wo lulama ni wa kuhisa.

Isaya 5:24

Ngu toneto, va na loviswa, kufana ni titshava ti txi hiswa ngu mndilo, va na fana ni kuhiswa ka mwasi wa kuoma, se mkoloti wawe wu na sina, ni siluva sa kona si na puruma ku nga lithulu; Nguko va lekile Mlayo wa Mkoma wa Mabutho a Tiyimbi, ve eyisa dipswi da Msawuleki wa Israyeli.

Isaya 10:6

Ni na mruma ku yalwa ni ditiko da wubihi, ni mleleta kuya wukela vathu vale ni nga va henyela, ku va handa ni ku va honyola siya sawe, se ni va veka ti to ve kandetelwa ku nga ndope ya tinzilani;

Isaya 26:11

Mkoma, dianza dako di guletilwe, hambi keto, kha va di woni; va na di wona, hambiko va no kanganyiseka, ngu mhaka ya ku u pfelako vathu vako; kambe mndilo wu na tshokomisa valala vako.

Isaya 33:14

Vaonhi va Siyoni, va na thava, kudhudhumela kukhakhetile vakanganyisi. I mani hagari kwathu a no zumba ni mndilo wu wu tshokomisako kani? I mani hagari kwathu a no zumba ni midhikila ya kwa mbi gwita kani?

Isaya 42:25

Ngu mhaka yeto, a tshakunutile kuhenya kwakwe txitimwi kwawe, ni mtamo wa yimbi. Se a va vekete m'dhikila madhawani, kambe kha va tipfisisa txilo keto; a va hisile aniko kha va veka mbilu yawe keto.

Ezekhiyele 20:47

Womba ka txitinga txa Wulambwe u txi khawe: Engisa dipswi da Mkoma: Mkoma Txizimu a khene: Wona taku ni na dhivela mndilo ngu kwako, awuwa ngu kwako wu no tshokomisa yotshe mindonga yo nakana ni mindonga ya kuoma; dituro da kona kha di na mbi timeka; di na hisa totshe tikhohe, kukhukhela Wuphemba kala Wulambwe.

Joyeli 2:3

Masoni kwawe mndilo wa tshokomisa; se msana kwawe dituro da hisa; ditiko masoni kwakwe di fana ni thembwe ya Edheni, kambe msana kwakwe njiwula txo thisa; ina, kha ku na mbi huluka txilo.

Obhadhiya 1:18

Se nyumba ya Jakobe yi na va mndilo, nyumba ya Josefa yi na maha dituro, ni nyumba ya Esawu yi na maha mwasi, se va na va hisa, va txihya ve guma; ni wammweyo kha na mbi sala ka nyumba ya ka Esawu, nguko Mkoma a ti wombile.

Zakariya 11:6

Kha ditshuri kha ni na mbi ngadi ni pfela wusiwana vahanyi va ditiko diya, kuwomba Mkoma, aniko wona taku ni na ningela vathu, mmwani ni mmwani manzani ka mkwawe, ni ka dianza da mfumeli wakwe; vona va na onhetela mafu, kambe kha ni na mbi va txhatxhisa manzani kwawe.

Malakiya 4:1

Nguko wonani taku ditshiku dile, dita di txi tura nga m'dhikila; votshe va va ti kulisako ni votshe va va mahako wubihi, va na nga mwasi, se ditshiku di di nota di na va tshokomisa, kuwomba Mkoma wa Mabutho a Tiyimbi, taku kha di na mbi va siyela mkoloti, mwendo didhavi.

Levhi 26:26

Hahanze ka toneto, ni na mi tekela sakudya sanu; ati to digumi da vavasikati va txi mi bhikela sakudya sanu amu ka khadi yimweyo, va txi mi phamela sakudya sanu ngu ku mi pimela; ahale ko mi na dya, aniko kha mi na mbi khura.

Zakariya 11:9

Se ani ni ti khani: Na mbi ngadi ni txi mi dyisa kambe; ayi yifako, yi na fe, ayi yi fuviswako, ti nave, se atile ti no sala ti nadye, yimwani ni yimwani yi nadye nyama ya yimwani.