Isaya 61:3 - Bhiblia Yo Sawuleka

³ ni kurumete ka votshe vale va dilako Siyoni, kasi ku va sanzeka m'bhoti wukhaloni ka dikhuma, ni ku va tota mafura a kutsaka wukhaloni ka kudila, ni ku va ambeka wudhumo hahanze ka moya wo xupheka, kasi kuve dhanwa ku mindonga ya kululama, yi nga phaywa ngu Mkoma, kasi ku e mana kudhumiswa.

Isaya 61:3 Referans Kwoze

Masalmo 30:11

Hindula kudila kwangu ku txi maha kusinya ka litsako; ni thavise mkhwasi u txi ni ambeka si ambalo sa litsako.

Johani 16:20

Ngu ditshuri, ngu ditshuri na mi gela: Mi na dila ni kupandiseka mbilu, kambe vathu va ditiko va na tsaka; se anu mi na xaniseka timbiluni kwanu, kambe kuxaniseka kwanu ku na hinduka ku txi maha litsako.

Isaya 61:10

Ni na tsaka ngutu ka Mkoma, muhefemulo wangu wa tsakela Txizimu txangu, nguko txi ni ambekile syambalo sa kuhanyiswa, txi ni fenengeta didhamba da kululama, nga muwuti a ti mbombisako ngu so tshura, ni ku nga txiwutwa txi ti bombisako ngu siketiketi sa txona.

Ekleziyaste 9:8

Ambala syambalo so basa mbimo yotshe, ku nga thuke kupwateka mafura ha msungo kwako.

Masalmo 45:7

Awe u fanete kuranda kululama, u txi nyenya wubihi; ngu mhaka yeto, Txizimu, Txizimu txako, txi ku sawulete toneto hagari ka majaha kuloni txi kusawulekisa ngu mafura kasi ku kumaha mfumeli.

1 Pedro 2:9

Ngu toneto, anu mi liveleko lo sawuleka, vaphaxeli va wukoma, mfumo wo sawuleka, vathu va va lumbako Txizimu, kasiku mi na tsimbila mi txi rurutela mithumo ya kuxamalisa ya Txizimu, atxi txi nga mi humisa txidemani, txi mi wuyisa liwoningoni ka txona ko xamalisa;

Masalmo 23:5

U ni lulamisela m'buso masoni ka valala vangu. U ni totile msungo wangu ngu mafura o bhumula u tata digombe dangu, di thekelela.

1 Vakorinto 6:20

Nguko mi xavilwe ngu txuma txa hombe; dhumisani Txizimu koko mmidini kwanu, ni moyani kwanu, asi si lumbako Txizimu.

Zakariya 3:5

Ani ni to khani: Muambekeni txigoko txo basa ha msungo kwakwe. Se va to muambeka txigoko txo basa ha msungo kwakwe, ni ku muambeka syambalo; kambe Ngelozi ya Mkoma yi ti ti kona hale.

Vafilipiya 1:11

mi txi pfunelwa ngu mihando yo lulama, yi tako ngu ka Jesu Kristu, kasiku Txizimu txi pfaliswa ni kudhumiswa.

Matewu 5:16

Ngu toneto, kwanu ku na woninge masoni ka vathu, kasiku, ngako va txi wona mithumo yanu ya yinene, va na dhumisa Tate wanu a ku nzumani.”

Esteri 8:15

Sekoko Mordhekayi a to khukha masoni ka mfumeli a di ambate syambalo sa wukoma sa mkuxe ni so basa, kambe a di ni m'bhoti wa hombe wa nzalama, ni dijasi da linyu yo hehuka da txiwunguwungu, se didhoropa da Susani di to kwangula di tsaka.

1 Pedro 4:14

Ngako mi txi xaniswa ngu ditina da Kristu, mi katekile, nguko moya wa kupfaliswa, Moya wa Txizimu, wu zumbile hagari kwanu.

Luka 15:22

Aniko tate a to gela sithumi sakwe a txi khene: ‘Kuluvetani mi neha syambalo so tshura ngutu, mi m'bombisa, mu ambekeni ringi litihoni kwakwe, mu ambekeni tikathula mikondoni kwakwe.

Esteri 9:22

i ku masiku ale Vajudha va nga mana kuhumula ka valala vawe, ni mtxima wule ku nga hunduluswa kuxaniseka kwawe kumaha kutsaka, ni txidilo txi nga maha ditshiku da kuhumula; kasi ku me maha masiku a mibuso ya hombe, ni a kutsaka, ni a kurumelelana siningo, ni kuvhuna sisiwana.

2 Vatesalonika 1:10

mbimo yi a nota ka edo ditshiku, kasi ku ta dhumiswa hagari ka vasawuleki vakwe, ni ku ta xamalwa hagari ka vale va nga kholwa kwakwe, kufana ni nanu mi nga amukela wufakazi wathu.

Johani 15:8

Tate wangu a na dhumiswa, ngako mi txi veleka mihando yo tala, mi maha vagondiswa vangu.”

Masalmo 104:15

Vhinya yi yi va tsakisako timbilu, mafura awa ma va tshurisako tikhohe ni sakudya si si va ningako mtamo.

Isaya 12:1

Se ka ditshiku donedo, u na khawe: Na ku bonga, Mkoma, nguko hambi ku u nga ni henyela, kuhenya kwako ku gumile, se u ni tsakisile.

Matewu 15:13

Ene a to va xamula a txi khene: “Sotshe so phaywa, asiya si nga mbi phaywa ngu Tate wangu wa nzumani, si na dulwa.

1 Vakorinto 3:9

Kha ditshuri, athu hi vavhuneteli va Txizimu, anu mi wudimi wa Txizimu, mi Nyumba ya Txizimu.

Vahebheru 1:9

U randile wululami, u txi venga wubihi; ngu toneto, Txizimu, Txizimu txako, txi ku totile mafura a litsako kupinda votshe vangana vako.”

Masalmo 149:4

Mkoma a tsakiswa ngu vathu vakwe; wa guleta sisiwana ngu ku si ninga kuxula valala!

Isaya 26:2

Tulani matimba, kasi ku di na wulela ditiko do lulama, dile di xayisako ditshuri.

Isaya 44:23

Embelelani ngu kutsaka anu tinzuma, nguko Mkoma a mahile eto; guletani anu makhalo a hahatshi ngutu ka mafu; anu mimango embelelani ngu kutsaka; se nanu sitinga ni mindonga yotshe yi yiku kwanu; nguko Mkoma a tirute Jakobe, kambe a dhumisilwe kona Israyeli.

Isaya 46:13

Na tshuketisa wululamo wangu, kambe kha wu na mbi va kule, ni kuhanyisa kwangu kha ku na mbi swela; aniko ni na veka kuhanyisa kwangu kona Siyoni, ni wudhumo wangu kona Israyeli.

Isaya 52:1

Wuka, wuka, ambala mtamo wako, awe Siyoni; ambala syambalo sako so tshura ngutu, awe Jerusalema, didhoropa do sawuleka; nguko kwako kha ku na mbi thuka ku txi wulela awu a nga mbi ya wukwerani, hambi wa kwa mbi basa.

Jeremiya 31:13

Sekoko mahorana ma na ti zilimukisa ngu kusinya, majaha ni sikosana ma na tsaka kumweko; nguko ni na phemberusa kudila kwawe kuva litsako ni na va tangalisa ni txi va tsakisa mu kuxanisekani kwawe.

Ezekhiyele 34:29

Se ni na ti wusela siyalo sa lisima, kha ti na mbiswa kambe ti hetwa ngu nzala ha mafuni, kambe kha ti na mbi va txiruko ka vamatiko.

Ezekhiyele 47:7

Mbimo yi ni nga txi tshumela, likasani ka txinambwana ku ti ti ni mindonga yayingi ngutu, ka didhawa dimwedo ni dimwani.

Masalmo 30:12

Ti di ngeto, Mkoma, Txizimu txangu, ni na embelela ngu ngawe ni si gwiti, ni na kudhumisa kala kupinduka.