Isaya 60:2 - Bhiblia Yo Sawuleka

² Nguko wona taku, txidema txi fenengetile mafu, ni kuphuma ku fenengetile vathu, se Mkoma a na humelela txitimwi kwako, ni wudhumo wakwe wu na woneka txitimwi kwako.

Isaya 60:2 Referans Kwoze

Vakolosa 1:13

Ene a hi ponisile ka txidema, a txi hi rurisa hi txi ya mfumoni ka Mwanana wakwe wo randeka,

1 Pedro 2:9

Ngu toneto, anu mi liveleko lo sawuleka, vaphaxeli va wukoma, mfumo wo sawuleka, vathu va va lumbako Txizimu, kasiku mi na tsimbila mi txi rurutela mithumo ya kuxamalisa ya Txizimu, atxi txi nga mi humisa txidemani, txi mi wuyisa liwoningoni ka txona ko xamalisa;

Mithumo 26:18

Kasi kuya tula maso awe ni ku va humisa mtemani, ve wuya livaningoni, ni ku va humisa nfumoni ka Sathani, ve wuya ka Txizimu, kasiku ve amukela divalelo ya sionho, ni kuavelwa thomba kumweko ni vasawuleki ngu kukholwa ditinani kwangu.’ ”

Malakiya 4:2

Aniko kwanu anu mi thavako ditina dangu, ku na huma ditambo da wululamo, se wuhulukisi wu na va hahatshi ka tibhapi ta dona; kambe mi na huma mi txi ndaka-ndaka ku nga marole hahanze ka txibala.

2 Vakorinto 3:18

Athu hotshethu hi wonako kuphatima ka Mkoma ngu maso o mbi fenengetwa, hi txi wonekisa kuphatima ka Mkoma kufana ni txibuko, hi txi hunduluswa hi fana nayo, hi longoloka ngu kuphatima kumweko ni kwakwe, aku ku engetelwako ngu mtamo wakwe Mkoma, i ku Moya.

Mithumo 17:23

Nguko, ngako ni txi tsimbila, ni wona magandelo anu, ni mani txiluvelo txi txi nga ti bhatwe tito: ‘Ka Txizimu txi txi si ziwiko.’ Se ani ni tela ku ta mi zivisa Txizimu txi anu mi txi gandelako mi si txi zivi.

Mithumo 14:16

Ka tixaka ti ti nga pinda, Txizimu txi tumete ti to mfumo ni mfumo wu tsimbila ngu nzila ya wona;

Johani 8:55

kuve kha ma m'ziva; aniko ani na m'ziva. Ngako ni txi khani kha ni m'zivi, ni ndi nava wa makuhu kufana ni nanu. Aniko ani na m'ziva, se na veketa dipswi dakwe.

Johani 1:18

Txizimu kha txi zivi kuwonwa ngu m'thu; Mwanana wa txona wa Mmweyo ekha, awu a ku kumweko ni Tate, ngene a nga hi zivisa ati Txizimu txi ku ngu tona.

Johani 1:14

Dipswi di ti mahile m'thu, e aka hagari kwathu; hi wu woni wudhumo wakwe, wudhumo wu Tate a nga ninga Mwanana wakwe wa Mmweyo ekha, wo tala ngu makatekwa ni ditshuri.

Ezekhiyele 10:4

Sekoko wudhundo wa Mkoma wu to khukha ngu txitimwi ka makerubhima, wu txi ya txikenini ka nyumba; se nyumba yi to tatwa ngu direfu, ni muhubhe wu to tala ngu kuphatima ka wudhundo wa Mkoma.

Mitengo 16:19

Se Kora a to tshanganisa msengeletano wa vathu vakwe votshe, ha txikeni ka ditenda da msengeletano, konaho kuphatima ka Mkoma ku to woneka masoni ka wotshe msengeletano.

Levhi 9:23

Sekoko Mosi, a to wulela ditendani ka msengeletano kumweko ni Aroni, mbimo yi va nga huma, va to katekisa vathu. Se Mkoma a to kombisa mtamo wakwe wo xamalisa ka vathu votshe.

Johani 1:1

Kukhatani ku ti ni Dipswi; Dipswi di ti ni Txizimu, Dipswi i ti Txizimu.

Matewu 23:19

Mabhofu-nu! Kasi nji txani txi ku ni lisima ngutu, kani? Ngu mningelo mwendo ngu txiluvelo txi sawulekisako mningelo, kani?

Matewu 15:14

Va lekeni! Mabhofu ma thangelelako mabhofu-kulowe; se ngako dibhofu di txi ñoleta lisole dimwani dibhofu, votshe va na wela diphalani ngu wumbidi wawe.”

Jeremiya 13:16

Dhumisani Mkoma, Txizimu txanu, na ku si se maha txidema, mikondo yanu yi si se humbwa mimangoni ko phuma; mi txi ngadi mi verela liwoningo a na li phemberusa li maha mtsudi wa kufa, ni txidema txo phindeletisa kuphuma.

Masalmo 80:1

Awe m'dyisi wa ka Israyeli, hi engise u kombisako nzila ka liveleko la ka Josefa kota mtxambi wako, hi engise, awe u ku ha txikhaloni txitimwi ka makerubhima, ti wonekise!

1 Vafumeli 8:11

Se vaphaxeli va si dingani kuthuma va di emile, ngu mhaka ya direfu, nguko kuphatima ka Mkoma ku ti tatile Nyumba ya Mkoma.

Matewu 23:24

Vaxengetelinu va mabhofu, mi sefako tshuna, mi txi mita dikamelu!”

Masalmo 102:16

ngako Mkoma a txi aketa Siyoni a txi ti wonekisa ni wudhumo wakwe;

Isaya 2:5

Ngonani, anu va nyumba ya ka Jokobe, he tsimbileni kuwonekelani ka Mkoma.

Isaya 4:5

Txitimwi ka wotshe wuako wa mmango wa Siyoni, ni txitimwi ka msengeletano wakwe, Mkoma a na maha direfu ni mitshikari ngu wutshi, ni dituro da mndilo ni wusiku; nguko txitimwi ka wotshe wudhumo, ku nava ni kutsivelwa.

Isaya 58:10

se ngako u txi tula muhefemulo wako ka wule a ku ni nzala, ni kukhurisa muhefemulo wo xaniseka, sekoko liwoningo lako li na tura txidemani, ni kuphuma, kwako ku na fana ni hagari ka mitshikari.

Isaya 66:11

Kasi ku mi na mama mi khura, ngu masi a kuthavelela kwakwe; kasi ku mi busa mi tsaka, ngu kuphatima ka wudhundo wakwe.

Isaya 8:22

Se va txi wonetela ha mafuni, ku nava ni tshani ni txidema, va na xaniseka ve ndindelwa txidemani.

Isaya 58:8

Sekoko liwoningo lako li na huma kufana ni wuronga, se kukalamuka kwako ku na mila ngu kukuluveta, ni kululama kwako ku na thangela masoni kwako, se wudhumo wa Mkoma wu na va msana kwako.

Isaya 62:1

Ngu kuranda Siyoni kha ni na mbi malala, ngu mhaka ya kuranda Jerusalema kha ni na mbi bundama, kala kuza kuhuma kululama kwakwe kufana ni liwoningo, ni kuhanyiswa kwakwe kufana ni txisase txa mndilo.