Isaya 60:1 - Bhiblia Yo Sawuleka

¹ Wuka, woninga, nguko liwoningo lako lata, ni wudhumo wa Mkoma wa humelela txitimwi kwako.

Isaya 60:1 Referans Kwoze

Vaefesu 5:14

ani sotshe si si humiswako ha kubasani, sa hinduka si maha liwoningo. Ngu toneto, ti wombwako va txi kha vona: “Wuka awe u otelako, wuka hagari ka vafi, se Kristu a na kuwoninga.”

Vaefesu 5:8

Kale mi ti hanyela mtemani, aniko mi hindukile mi maha liwoningo ngu ka Mkoma. Tsimbilani kha kwati, nga ti mi ku vanana va liwoningo.

Johani 8:12

Jesu a to tshumela a txi womba-womba ni vathu, a txi va gela ku khene: “Ani ni liwoningo la ditiko. Awu a ni londisako, kha tsimbili txidemani, kambe a na va ni kuwonekela ka wutomi.”

Isaya 58:8

Sekoko liwoningo lako li na huma kufana ni wuronga, se kukalamuka kwako ku na mila ngu kukuluveta, ni kululama kwako ku na thangela masoni kwako, se wudhumo wa Mkoma wu na va msana kwako.

Johani 12:46

Ani ni liwoningo, ni tile ha mafuni, kasiku wuhi ni wuhi a kholwako kwangu, asi thuki e zumba txidemani.

Matewu 5:16

Ngu toneto, kwanu ku na woninge masoni ka vathu, kasiku, ngako va txi wona mithumo yanu ya yinene, va na dhumisa Tate wanu a ku nzumani.”

Malakiya 4:2

Aniko kwanu anu mi thavako ditina dangu, ku na huma ditambo da wululamo, se wuhulukisi wu na va hahatshi ka tibhapi ta dona; kambe mi na huma mi txi ndaka-ndaka ku nga marole hahanze ka txibala.

Johani 1:9

Dipswi i ti liwoningo la ditshuri, aliya li woningako votshe vathu, li txi ta ha mafuni.

Mtuletelo 22:5

Kha ku na mbiswa ku di ni wusiku; ni wammweyo kha na mbiswa e lava kuwoninga ka dilambu, hambi kuwoninga ka ditambo, nguko Mkoma Txizimu a na va woninga, se vona va na fuma ngu ha ku si gumiko.

1 Pedro 4:14

Ngako mi txi xaniswa ngu ditina da Kristu, mi katekile, nguko moya wa kupfaliswa, Moya wa Txizimu, wu zumbile hagari kwanu.

Vafilipiya 2:15

kasiku mi va mi si nga ni txisolo na mi di basile, mi va vanana va Txizimu vo mbi na nzambwa, hagari ka liveleko lo soholoka, na li di xangile; mi fanete kuphatima hagari kwawe, nga malambu ha mafuni;

Mtuletelo 21:23

Didhoropa kha di lavi kuwoninga ka ditambo, hambi ka ntxima, nguko dona di woningwa ngu wudhumo wa Txizimu, ani dilambu da kona ngu Txinvutana.

Matewu 4:16

vathu va va nga ti zumbile ditikoni ka kuphuma, va woni liwoningo la hombe; ni ka va va nga ti zumbile ditikoni ka mtsudi wa lifo, ku humelete liwoningo txitimwi kwawe.”

Isaya 9:2

Vathu va va nga ti tsimbila txidemani, va woni liwoningo la hombe; ni ka va va nga ti zumbile ditikoni ka mtsudi wa lifo, ku humelete liwoningo txitimwi kwawe.

Johani 3:19

Txigelo txa kuabaniswa ngu txiya: Kuwonekela kutile ha mafuni, aniko vathu va randile ngutu txidema kupinda kuwonekela, nguko mithumo yawe i ti yo biha.

Luka 2:32

I ku liwoningo la kuwoninga matiko ni txipfaliso txa kudhumisa vathu vako va ka Israyeli.”

Mtuletelo 21:11

Di ti ni kuphatima ka wudhumo wa Txizimu. Kuphatima ka dona ku txi fanana ni ka dirigwi da lisima ngutu, kufana ni dirigwi da Jasperi do basa, nga kristali.

Masalmo 87:3

Awe didhoropa da Txizimu, ta tsakisa ngutu ati Txizimu txi wombawombako, na txi txi dhumisa awe:

Masalmo 102:16

ngako Mkoma a txi aketa Siyoni a txi ti wonekisa ni wudhumo wakwe;

Isaya 2:5

Ngonani, anu va nyumba ya ka Jokobe, he tsimbileni kuwonekelani ka Mkoma.

Isaya 4:5

Txitimwi ka wotshe wuako wa mmango wa Siyoni, ni txitimwi ka msengeletano wakwe, Mkoma a na maha direfu ni mitshikari ngu wutshi, ni dituro da mndilo ni wusiku; nguko txitimwi ka wotshe wudhumo, ku nava ni kutsivelwa.

Isaya 24:23

Se mtxima wu na va ni tingana, ni ditambo di na kanganyiseka, mbimo yi Mkoma wa Mabutho a Tiyimbi, a no fuma mmangoni ka Siyoni ni Jerusalema; sekoko, masoni ka vathangeli vakwe, ku nava ni wudhumo.

Isaya 28:5

Ka ditshiku dile, Mkoma wa Mabutho a Tiyimbi, a na va i ti m'bhoti wa wudhumo, ni m'bhoti wo tshura ka misalelwa ya vathu vakwe.

Isaya 35:2

Li na rumbuka ngutu ni kundakandaka ngu litsako, kambe li na peka mikulungwani; li na ningwa wudhumo wa Libhanoni, kufana ni kunona ka Karmeli, ni ka Xaromi; vona va na wona wudhumo wa Mkoma, ni kuphatima ka Txizimu txathu.

Isaya 42:6

Ani Mkoma ni ku dhani ngu kululama, kambe ni na kuñola ngu dianza, ni na kuxayisa; ni na kuningela uva txitumelelano txa vathu, ni kuva liwoningo ka vamatiko;

Isaya 66:11

Kasi ku mi na mama mi khura, ngu masi a kuthavelela kwakwe; kasi ku mi busa mi tsaka, ngu kuphatima ka wudhundo wakwe.

Isaya 62:1

Ngu kuranda Siyoni kha ni na mbi malala, ngu mhaka ya kuranda Jerusalema kha ni na mbi bundama, kala kuza kuhuma kululama kwakwe kufana ni liwoningo, ni kuhanyiswa kwakwe kufana ni txisase txa mndilo.

Isaya 62:2

Se matiko ma na wona kululama kwako, ni votshe vafumeli va na wona wudhumo wako; se va na ku dhana ngu ditina dadiphya, adi txisofu txa Mkoma txi no di raya.

Ezekhiyele 43:4

Se kuphatima ka Mkoma ku to wulela dithepeleni ngu nzila ya ditimba di nga ti rendekete wulambwe.