Isaya 59:9 - Bhiblia Yo Sawuleka

⁹ Ngu mhaka yeto, kulamulwa ku kule ninathu, ni kululama kha ku hi hokeli; hi verela liwoningo, kambe hi mana txidema dwe; hi lava kutsimbila mu ko wonekela, kambe hi tsimbila txidemani.

Isaya 59:9 Referans Kwoze

Isaya 5:30

Ka ditshiku donedo, va na bhonga txitimwi kwawe kufana ni mavimbi a linene; se awule a no wona mafu, a na wona txidema ni kuxaniseka, kuwonekela ku na vhalelwa ngu txidema.

Jobe 30:26

Hambi keto, mbimo yile ani ni nga txi verela wunene, wu to ta kwangu wubihi; ni mbimo yi ni nga txi verela liwoningo, ni to telwa ngu mtema.

1 Vatesalonika 5:3

Mbimo yi vathu va no kha vona: “Ka ho kudikha ni kukhaliseka,” nguyo mbimo ku no humelela dikhombo ngu txidhukisa hagari kwawe, kota nga wamsikati, ngako a txi lumwa; kha va na mbi sikota kupona.

Habhakuki 1:13

Awe u ni maso amanene, ma si dinganiko kuwona to biha, kambe khu tumeli ni kuwona tingana; ngu kutxani koko, u wonako vale va mahako ta walo, u malala, ngako m'bihi a txi mita wule wo lulama kupinda ene kani?

Mika 1:12

Nguko awu a zumbako Maroti, a pfite kupanda ngu kulava wunene; nguko dikhombo di txikile ngu ka Mkoma, kala ha txikeni ka Jerusalema.

Jeremiya 14:19

Ina u mlekete magwito Judha kani? Mwendo u ngava u di swirekile mbiluni ngu Siyoni kani? Ngu kutxani u nga hi pekisa ti to hi si sikoti ni kuthumwa kani? Hi ti verete kuthutha, aniko wunene kha wa woneka; Hi verete mbimo yo thumwa, na kuve kuthava kuho!

Jeremiya 8:15

Hi ti verete kuthutha, aniko kha ka maheka wunene, hi verete ngu mbimo yo thumwa, kuve kuthava kuho!

Masalmo 82:5

Vona vabihi kha va zivi, kambe kha va pimisi; va hanyela txidemani. Ngu konaho, asi si tsanisako mafu sa tsekatseka!

Mavingu 4:19

Nzila ya vaonhi yi fana ni txidema; kha va txi zivi atxile va humbwako ngu txona.

Isaya 8:21

Se va na rendelekela ditiko, ve xaniseka, ni kupfa nzala; ni mbimo yi va pfako nzala, va na henya, ve ruketela mfumeli wawe, ni Txizimu txawe, ve wonetela txitimwi.

Isaya 8:22

Se va txi wonetela ha mafuni, ku nava ni tshani ni txidema, va na xaniseka ve ndindelwa txidemani.

Isaya 59:8

Kha va yi zivi nzila ya kudikha, kambe kha ku nga ni kululama kutsimbilani kwawe; va ti mahete tisoko tawe to gombonyeka vapune; ni wuhi wu a tsimbilako ka tona, kha zivi kudikha.

Isaya 59:11

Athu hotshethu ha bhonga ku nga singwingwi kambe hi simama hi dilisa ku nga situvani; hi verela kulamulwa, aniko kha ku humeleli; hi verela kuhanyiswa aniko ku kule ni nathu.

Isaya 59:14

Ngu kumaha keto, kulamulwa ku tshumelete msana, ni kululama ku ti vekile kule; nguko ditshuri di gutilwe tiruwani, se kululama kha ku sikoti kuwulela.

Jeremiya 13:16

Dhumisani Mkoma, Txizimu txanu, na ku si se maha txidema, mikondo yanu yi si se humbwa mimangoni ko phuma; mi txi ngadi mi verela liwoningo a na li phemberusa li maha mtsudi wa kufa, ni txidema txo phindeletisa kuphuma.

Sidilo 3:2

A ni tekile e ni tsimbilisa txidemani i si nga ha liwoningoni.

Sidilo 4:14

Vo nga mabhofu amu tinzilani, va tsimbila va di nyetisetwe ngu mnoha, a ha ko ni wammweyo kha sikoti kugwesa syambalo sawe.

Amosi 8:9

Ku na maheka taku, ka ditshiku dileya, kuwomba Mkoma; na maha ta ku ditambo diva hagari se mafu ma maha mtema ngu mbimo ya mitshikari.

Jobe 19:8

Txizimu txi kete maphala ka nzila yangu, se kha ni na kupinda; amu ka tisoko tangu txi vekile txidema.