Isaya 59:1 - Bhiblia Yo Sawuleka

¹ Wonani taku dianza da Mkoma kha da khwanyela, a ti to di si sikoti kuhanyisa; hambi nzeve yakwe, kha ya tsiveka, ko naza yi tandeka kuengisa.

Isaya 59:1 Referans Kwoze

Jeremiya 32:17

O! Mkoma Txizimu! Ngawe u nga maha nzuma ni mafu ngu mtamo wako wa hombe ni diwoko dako di nga nawulutwa; kha ku na txilo txi tandako kwako:

Isaya 50:2

Ngu kutxani ni ngata ni si ta mana m'thu kani? Ngu kutxani ni nga mi dhana, ku si oroveli ni wammweyo kani? Ina dianza dangu di to khwanyela, niza ni si sikoti kutirula kani? Ni ku mwendo kha ni ngadi ni mtamo kasi kutxhatxhisa kani? Wonani taku, ngu kukawuka kwangu na omisa linene, ni maha ti to minambo yi hunduluka yiva siwula, kala kuza sihaka sa kona si nunga, nguko kha ku nga ni mati, se sa fa ngu ditora.

Mitengo 11:23

“Kambe Mkoma a to khene ka Mosi: Ina diwoko da Mkoma di komile kani? Awe verela, konkuwa, u na wona ti to dipswi dangu, di na maheka mwendo kha di na mbi maheka.”

Isaya 65:24

Se ku na maheka ti to ni va xamula, va sanzi kupeka huwa; va txi ngadi ve womba-womba ni na va engisa.

Vahebheru 7:25

Ngu kota yeto, ene wa sikota kuhanyisa, ka mbimo yihi ni yihi, votshe vale va tshuketelako ngu ngene ka Txizimu, nguko ene wa hanya yotshe mbimo kufela ku va kombelela.

Matewu 13:15

Nguko timbilu ta vathu vava ti bangile, kambe tinzeve tawe ti tsivekile, maso awe ma vhalekile, kasiku va si woni ngu maso, va si engisi ngu tinzeve, va si pimisi ngu timbilu tawe, va nga thuka ve hunduluka ve mana kuhanyiswa.”

Genesisi 18:14

Ina txi ho txo tandeka ka Mkoma kani? Ka dilembe di di tako, ngu yona yiya mbimo, ni na wuya kambe kwako, se Sara a na va a di ni mwanana wa dizambi.

Isaya 58:9

Sekoko u na dila, kambe Mkoma a na kuxamula; u na peka huwa, se ene a na khene: “Ngani wuwa hawa.” Eto ti na maheka ngako u txi thavisa hagari kwako dikange, u leka kuxungametela ngu litiho, ni kuwombawomba ka manyala;

Isaya 6:10

Bangisa timbilu ta vathu vava, u tsiva tinzeve tawe, vhala maso awe; kasi ku va si woni ngu maso awe, va si engisi ngu tinzeve tawe, va si pimisi ngu timbilu tawe, va nga thuka ve hunduluka, ve mana kuhanyiswa.

Isaya 63:1

I mani wuwa a tako ngu Edhomi, ka Bhozira, ni syambalo so bhilivila kani? Awu syambalo sakwe i ku so dhundeka, a tsimbilako ngu mtamo wakwe wa hombe kani? Ani ni wombawombako ngu kululama, ni mtamo ngutu kasi kuhanyisa.

Jeremiya 14:9

Ngu kutxani u txi nga u m'thu wo dhukiswa, nga ndena yile yi si sikotiko kuhanyisa kani? Kuve awe waho hagari kwathu, awe Mkoma, hi dhanwa ngu ditina dako; u nga hi leke!

Ezekhiyele 8:18

Ngu kumaha keto, nani ni na va henyela; diso dangu kha di na mbi va tsetsa, kambe kha ni na mbi va ni wumbilu; hambi va txo kwangula tinzeveni kwangu ngu dipswi da hombe, kha ni na mbi va engisa.

Mika 2:7

O, anu mi dhanwako ku nyumba ya Jakobe, ina wu khala ku hungulwa Moya wa Mkoma kani? Ngu yona yiya mithumo yakwe kani? Ina mapswi angu hi nga manene ka wule a tsimbilako ngu kululama kani?

1 Samuwele 4:3

Se mbimo yile vathu va nga tshumela veya wugoveloni, madhota a ka Israyeli, ma to kha ona: A hi lekete txani Mkoma hi xulwa nyamsi masoni ka Vafilista kani? Hi tsimbeleni Silo hi ya teka dibhokiso da txitumelelano txa Mkoma, hi ta di veka hagari kwathu, kasiku di txi hi hulukisa manzani ka valala vathu.

1 Samuwele 8:18

Sekoko ka ditshiku donedo, mi na dila ngu mhaka ya mfumeli wanu, awu anu mi no va mi di msawute; kambe Mkoma kha na mbi mi engisa ka ditshiku donedo.

Masalmo 94:9

Txizimu, txi nga maha tinzeve, kha txi na mbi engisa kani? Txona txi nga maha maso, kha txi na mbi wona kani?

Isaya 50:1

Mkoma a womba tiya: Di hani dipapilo da kulekwa ka mame wanu, adi ni nga mtovela ngu dona kani? Mwendo i mani mxavi wangu, awu ni nga mi xavisa kwakwe kani? Wonani taku mi xavisilwe ngu mhaka ya wubihi wanu, ni mame wanu a tovetwe, ngu mhaka ya kuwekela kwanu.