Isaya 5:5 - Bhiblia Yo Sawuleka

⁵ Konkuwa koko, na mi gela ti ni no maha, ka thembwe yangu ya m'vhinya: Ni na thavisa libhingo la yona, yi na maha lihawu; ni na khundumusa diseta da kona, di na kandetelwa.

Isaya 5:5 Referans Kwoze

Luka 21:24

Va na wa ngu kudawa ngu ditxhari, va na payulwa ve yiswa ka otshe matiko; se Jerusalema a na kandetelwa ngu vamatiko, kala kuza mbimo ya vamatiko yi va yi di tatisekile.

Sidilo 1:15

Mkoma a txhipisile totshe tindena tangu hagari kwangu; a sengeletile vathu vo talwa ni majaha angu a ni kandetete a txi nga o suka mauvha ha libangani, ani ni ku dihorana da Judha.

Isaya 28:18

Se txitumelelano txanu ni lifo, txi na guma; ni txitumelelano txanu ni wukhalo wa vafi, kha txi na mbi timisela. Mbimo yile ndambi ya txitsayiso yi no pinda, sekoko mi na fumwa ngu Mkoma.

Mtuletelo 11:2

Se mtendela wa hahanze ka Dithepele, wu leke u nga wu pime, nguko wona wu ningetwe ka vamatiko, ava va no kandetela ngu mikondo didhoropa do sawuleka txipimo txa mune wa magumi a mitxima ni yimbidi.

Isaya 28:3

M'bhoti wa kutikulisa ka madevi a Efrayime, wu na kandetelwa ngu mikondo.

Isaya 10:6

Ni na mruma ku yalwa ni ditiko da wubihi, ni mleleta kuya wukela vathu vale ni nga va henyela, ku va handa ni ku va honyola siya sawe, se ni va veka ti to ve kandetelwa ku nga ndope ya tinzilani;

Genesisi 11:7

A hi txhikeni hi txi ya hambanisa lidimi lawe, kasi ku mmwani asi swi a txi engisa lidimi la mmwani.”

Genesisi 11:4

Va to kha vona: “A hi ti akeleni didhoropa ni txitezi, atxiya txiroro txa kona txi no hoka nzumani, se ditina dathu di na va ni nduma, kasi ku hi si hangalaswi ka otshe mafu.”

Dhaniyeli 8:13

Msana keto, ni to pfa msawuleki wokari a txi womba-womba; se mmwani msawuleki a to khene ka wule a nga ti womba-womba: Txi na simama kala mbimo muni txiwoniso txa mphaxo wa ditshiku ni ditshiku, ni txa sihambunyeto si si onhako, kasiku kuningelwa wukhalo wo sawuleka, ni dibutho, si txi kandetelwa, kani?

Sidilo 4:12

Vafumeli va hawa mafuni, hambi i di vaaki va ona otshe kha va kholwa ti to valala va nga thuka va di wulete sikenini ka Jerusalema.

Isaya 25:10

Nguko dianza da Mkoma, di na humula ka mmango wuwa; aniko Mowabhi a na ganyatelwa hahatshi ka wona, kufana ni kuganyatelwa ka mwasi ditalani.

Nehemiya 2:3

ni txi khani ka mfumeli: Hanya mfumeli kala kupinduka! Na lambela txani kukarateka mbiluni, na kuve didhoropa, wukhalo wa mathitha a vatate vangu, wu khundumusilwe, ni matimba a kona ma hisilwe ngu mndilo kani?

Masalmo 89:40

U khundumusile otshe maguma a didhoropa; u mahile marumbi mikhokhola ya kona.

Mavingu 24:31

wona taku yotshe thembwe yi ti ti tate ngu mipa, yi ti tshuletwe ngu mimwasi, madhawani ku ti wite diguma da marigwi.

Isaya 32:10

Nguko msana ka dilembe ni masikwanyana, mi na karatwa anu vavasikati vo ti themba; nguko kuhaphelwa ka mihando ku na gwita, hambi kufunyelwa kha ku na mbiswa ku diho.

Jeremiya 18:11

Ngu konaho, gela vavamna va ka Judha ni vazumbi va Jerusalema, u txi khawe: Mkoma a khene: “Na mi longisela dikhombo, ni na maha txikungo txo mi wukela. Ngu konaho, hundulukani mmwani ni mmwani nzilani kwakwe ko biha, mi txhukwatisa mahanyelo anu ni simaho sanu.”

Jeremiya 21:4

“Mkoma, Txizimu txa ka Israyeli, a khene: Wonani, ni na tshumetela matxhari awa ma ku manzani kwanu, awa milwako ngu ona hahanze, mi txi wukela mfumeli wa Bhabhilona ni Makhaldheya, ava va nga mi randela, ni na ma sengeletela ka didhoropa diya.

Jeremiya 28:8

Vaprofeti va va nga ti tiho masoni kwangu ni masoni kwako, kukhukhela kaleko va to profetela matiko o tala ni mifumo ya hombe, ati taku ku na vaho yimbi ni makhombo ni mitungu.

Jeremiya 45:4

U na m'gela tiya: Mkoma a khene: Asi ani ni nga si aka na si khundumusa, asi ni nga phaya ni na si dula, ni na maha eto kotshe ha mafuni.

Hoseya 2:12

Se ni na onhetela mivhinya yakwe, ni mikuwu yakwe, yile a wombako ngu yona, a txi khene: Ayiya i hakhelo yi ni nga ningwa ngu sigango sangu; ani koko, ni na si hundula si maha txitinga, se si na dyiwa ngu sihari sa tshofu sa txitinga.

Masalmo 89:41

Votshe vapindi va nzila va wulela ve handa; vaakelani vakwe va mxowokisela.

Ekleziyaste 3:3

mbimo ya kudaya, ni mbimo ya kuhanyisa; mbimo ya kuhaxula, ni mbimo ya kuaka;

Sidilo 2:6

Ngu mtamo wa hombe a guatile m'dhuti wakwe, nga msakulo; a hasamute msengeletano wa kona. Mkoma a divatisile mibuso ni Sabbata kona Siyoni. Ha kupandisekani kwakwe, a tsukute ngu txieyiso vafumeli ni vaphaxeli.

Hoseya 2:14

Wonani taku, ani ni na mndinda, ni m'yisa txiwulani, ni ya womba-womba mbiluni kwakwe.