Isaya 5:21 - Bhiblia Yo Sawuleka

²¹ Dikhombo ka vale va alakanyako to va txharihile, ni kutithemba kupinda mpimo.

Isaya 5:21 Referans Kwoze

Varoma 12:16

Zumbani ngu kuengisana; mi nga naveleni sa kuguleka; kambe sengelani ni va va ti vekako hahatshi; mi nga laveni ku ti maha titxhari mialakanyoni kwanu.

Mavingu 3:7

U nga ti wone u di txharihile upune; thava Mkoma, kambe hambana ni kubiha.

Mavingu 26:12

Ina u ti nga wona m'thu wo ti wona apune taku a txharihile kani? I txhuko txiphukuphuku kupinda eyo m'thu.

Varoma 1:22

Va kha vona va ziva, kuve nzipumbu.

Johani 9:41

Jesu a to va xamula, a txi khene: “Idiku kha mi nga mabhofu, nga mi si nga ni mnandu. Aniko ngako mi ku khanu: ‘Ha wona!’ Ngu toneto, txionho txanu txi namarete.”

Mavingu 26:16

Txiphukuphuku txi ti wona txi di txharihile ngutu, kupinda mtxhanu wa vavamna ni vambidi vo xamula ta tinene.

Varoma 11:25

Nguko, vanathu, kha ni ti dhundi ti to mi timelelwa ngu msisalo wuwa, kasiku mi si thuki mi txi alakanya ti to mi txharihile: Va ka Israyeli vokari va bangisilwe timbilu, kala kuza ve wulela votshe vamatiko;

Jobe 11:12

Aniko m'thu wa diphanga mbwo pwata mapimo; ina, m'thu a velekwa kufana ni mbongola ya txitinga.

Isaya 37:23

U sote mani, niku u ruketete mani kani? Niku u kwangute u txi wukela mani, kambe u gulete mani maso kani? U wukete Msawuleki wa Israyeli!

Isaya 40:23

awu a tshumetako vathangeli ve maneka i si nga va txilo, kambe a maha ti to valamuli va ditiko va si vhuni txilo.

Isaya 47:10

Nguko u thembile wubihi wako, se u txi khawe: Kha ni wonwi ngu m'thu; wutxhari wako ni wuzivi wako, eso si ku hambukisile, se u ti khawe mbiluni kwako: “Ani ngani, hahanze kwangu, kuwalo mmwani.”

Isaya 10:13

Nguko a khene: Ni mahile eto ngu mtamo wa dianza dangu, ni wutxhari wangu, nguko ni txharihile; Ani ni thavisile mihingano ya vathu, ni handa tithomba tawe, kufana ni ndena, ni wisile vale va nga ti situluni ka wukoma.