Isaya 5:13 - Bhiblia Yo Sawuleka

¹³ Ngu kumaha keto, vathu vangu va na yiswa wukhumbini ngu mhaka ya kwa mbi ziva, vathangeli vawe va na fa ngu nzala, ni dibutho da vathu di na oma ngu ditora.

Isaya 5:13 Referans Kwoze

Hoseya 4:6

Vathu vangu va lovisilwe, ngu kule va nga pwata wuzivi; nguko awe u lambile wuzivi, se nani na kulamba, kasiku u si mahi mphaxeli masoni kwangu; akule u nga divala mlayo wa Txizimu txako, nanani ni na divala vanana vako.

Isaya 1:3

Homu ya ziva nyamne wa yona, ni mbongola ya wu ziva mkawu wa nyamne wa yona; aniko Israyeli kha zivi txilo, vathu vangu kha va pfisisi txilo.

Isaya 27:11

Mbimo yile madhavi a kona ma no oma, ma na funywa; vavasikati va nata ma dhivela, nguko vathu vava, hi nga vathu vo pfisisa; ngu toneto, wule a nga m'va nga kha na mbi mpfela wusiwana, ni wule a nga muwumba, kha na mbi va mahela wumbilu.

Varoma 1:28

Se aku va nga mbi lava kuziva txilo ngu didhawa da Txizimu, txona Txizimu txi va ningete ka mialakanyo yawe yo mbi vhuna txilo, veza ve maha ti ti si lavekiko.

Isaya 1:7

Mafu anu ma mahile txisapa, madhoropa anu ma hisilwe ngu mndilo; vathu vamatiko va mi tekete ditiko, na mi txi ti wona; di mahilwe txiwula ngu vathu vamatiko.

2 Pedro 3:5

Kambe vona va maha khakwenye, va txi nga vo ti timelela tito: I kale yi diho nzuma ni mafu, mafu awa ma nga thaviswa ka mati, ma txi vekwa hagari ka mati ngu Dipswi da Txizimu.

Sidilo 4:9

Avale va nga dawa ngu ditxhari, va katekile kupinda vale va nga dawa ngu nzala, i ku vale va nga sika va txi goma, ngu kupwateka ka mihando tithembweni.

Jeremiya 14:18

Nguko ni txi ya wona thembweni vaho va va nga dayiswa ngu ditxhari. Ni ku ngako ni txi wulela m'tini ni wona va va fako ngu nzala: Ina ngu wumbidi wawe mprofeti ni mphaxeli va zungulukela na va si kuzivi aha vayako kona.

Jeremiya 14:3

Vahombe vawe va rumile vavadotho kuya lava mati. Va txita sisimani kha va mani mati, va tshumela ni tifuko tawe ta maphanga. Vapfa tingana va txi goo! Na va txi fenengeta misungo yawe.

Jeremiya 8:7

Hambi nyawukolwe wa ndengalengani, wa ziva timbimo takwe. Dituva, ni nyawukolwe ni mbeluvelu, sa ziva mbimo yo tshumela ngu yona. Aniko vathu vangu kha va zivi milayo ya Mkoma.

Luka 19:44

“Va na kudikha hahatshi, awe ni vanana vako, va ku kwako. Kambe kha va na mbi siya kwako dirigwi txitimwi ka dirigwi, nguko khwa ziva mbimo yi u nga endelwa ngu yona.”

Amosi 8:13

Ditshiku dileya, mahorana ni mazambi o tutuma ma na tsivala ngu ditora.

2 Vafumeli 17:6

Ka dilembe da digumi ni mune, da kufuma ka Hoseya, mfumeli wa Asiriya a to honyola Samariya, se va ka Israyeli a to va tsulisa Asiriya, kota tikhumbi, eya va veka Hala ni Habhori, hafuhi ni mnambo wa Gozani, ni mu ka madhoropa a Vamidhiyani.

Isaya 3:1

Nguko wona taku Mkoma, Txizimu txa Mabutho a Tiyimbi, a na thavisa ka Jerusalema ni ka Judha, ndonga ni mtxheketelo, ni otshe mati o tima ditora.

Isaya 3:3

mthangeli wa mtxhanu wa magumi a masotxhwa, ni vathangeli, didhota ni m'thu wo ziva kuthuma ni wa kuziva kuwombawomba;

Isaya 23:9

Mkoma wa Mabutho a Tiyimbi, ngene a nga lulamisa txikungo txiya, kasi kuonha ku tikulisa ka sotshe siphatiphati, ni kuveka hahatshi vale vo dhundeka ngutu va ha mafuni.

Isaya 44:19

Se kha ku nga ni wammweyo kwawe a khatalako ngutu, a ku ni wuzivi mwendo mapimo, kasi ku khene: Hafu ni hisile, ni bhikile dipawu txitimwi ka makala a mndilo, kambe ni yokile nyama txitimwi ka ona, nidya; se ni nga maha manyala ngu yile yi nga sala kani? Ina ni nga khizamela phande ya mndonga kani?

Isaya 49:21

Se u na khawe mbiluni kwako: I mani a nga ni velekela wuwa kani? Nguko ni ti si nga ni vanana, ni di nokha; ni ti ti khumbi, ni khukha; sekoko, i mani a ngani wunjela vava kani? Wona taku ani ni ti sate nokha; se avava va ti ti hani kani?

Isaya 65:13

Ngu kumaha keto, Mkoma Txizimu a womba tiya: Wonani taku sithumi sangu si na dya, aniko anu mi na fa ngu nzala; wonani taku sithumi sangu si na sela, aniko anu mi na pfa ditora, wonani taku sithumi sangu si na tsaka, aniko anu mi na wa tingana;

Ezekhiyele 7:12

Yata mbimo, da hoka ditshiku; wule a xavako a nga tsake, ni wule a xavisako a nga henye; nguko txiviti txa tura txitimwi ka mtalo wawe.

Mavingu 10:21

Txisofu txa m'thu wo lulama txa dyisa votala, aniko siphukuphuku ngu kupwata mapimo, sa fa.