Isaya 5:1 - Bhiblia Yo Sawuleka

¹ Konkuwa, ni na embelela ka txirandwa txangu, dando ya txirandwa txangu, ngu mhaka ya thembwe ya txona ya mv'hinya. Txirandwa txangu txi ni thembwe ya m'vhinya ka tximangwana txo nona.

Isaya 5:1 Referans Kwoze

Marku 12:1

Se a to khata kuwombawomba kwawe ngu sidinganiso, a txi khene: “M'thu a to phaya mivhinya e mi ranganyeta ngu libhiyo, a txi kelela nzeka yo kamela ka yona mihando, e aka txitezi. Msana keto, a to yi ningela ka vadimi, se ene e teka dipfhumba.

Luka 20:9

Se a to khata kugela vathu txidinganiso txiya: “M'thu wokari a phayile thembwe ya mivhinya, se e yi siyela manzani ka vadimi, se e teka dipfhumba da kuendela matikoni ka kule, mbimo yo lapha.

Johani 15:1

“Ani ngani mndonga wa ditshuri wa m'vhinya. Tate wangu ngene m'dimi wa kona.

Matewu 21:33

“Engisani txidinganiso tximwani: A ti ti ho m'thu, i nga ti di nyamne wa m'ti, awu a nga phaya mivhinya e yi bhiyela ngu libhiyo la mindonga, a txi kelela nzeka ya kukamela ka yona mihando yakwe, e aka txitezi, ngu msana a txi ningela thembwe yiya ka vadimi, se ene a txi teka dipfhumba da kuendela ditikoni ka kule.

Jeremiya 2:21

Ni kuphaya ku nga mndonga wo tshura wa m'vhinya, wa lixaka la linene; u phemberukete txani u maha mndonga wa limwani lixaka kani?

Masalmo 80:8

U wuyisile ngu Egipta mndonga wa m'vhinya, u tutumisile vathu va mahedheni, u txi wu phaya.

Ndando ya Tindando 2:16

Txirandwa txangu njangu, nani ni wa txona; mtxhambi wakwe a wu dyisa hagari ka makhoñwa.

Ndando ya Tindando 6:3

Ani ni wa txirandwa txangu, ni txona txirandwa txangu njangu; txirandwa txangu txi dyela mu ka makhoñwa.

Ndando ya Tindando 5:16

Ka tsakisa kuwombawomba kwakwe ka kunene; ina, ene wa navetisa ngutu. Txirandwa txangu txi zumbisileto, kambe ngu toneto mngana wangu, Anu vanana vamahorana a Jerusalema,

Ndando ya Tindando 5:2

Ni ti otete, kambe mbilu yangu yi ti ti xaniseka, dipswi da txirandwa txangu txi pekako ditimba. A khene: Ni tulele ndiyangu, awe mndoni wangu, dituva dangu da ku ambi na dikhwiti, nguko msungo wangu wu nakani ngu mwando, ni misisi yangu yi nakani ngu mathotho a wusiku.

Masalmo 45:1

Mbilu yangu yi tate ngu mapswi o tshura ngutu; ni na thula ndando yangu ya ku embeleta mfumeli wa ditiko! Lidimi langu i peniselo ya m'bhali wo txhariha.

Masalmo 101:1

Ni lava kuembelela lirando ni kululama; ni txi embelela ngu ngawe, Mkoma.

Masalmo 60:5

Ni ti to ve poniswa avale u va randako. Hi xamule, u txi hi hanyisa ngu diwoko dako da txinene!

Jeremiya 12:10

Vadyisi votala vo onhetela txivhina txangu, va kandile thembweni kwangu; thembwe yangu yo tshura va yi mahile txiwula.

Ezekhiyele 15:2

Awe mwanana wa m'thu, nji txani dipulango da m'vhinya kupinda da yimwani mindonga, aku didhavi da wona, di manekako hagari ka mindonga ya txitinga kani?

Hoseya 10:1

Israyeli m'vhinya wo txhuma ngutu; u veleka mihando ya wona; madingano ni kutala ka mihando ya wona, kufana ni toneto andisile siluvelo sakwe; mdingano ni kunona ka mafu, va mahile sifananiso sa sinene so wumbwa.

Dhewuteronome 8:7

Wona, Mkoma Txizimu txako, a ku heleketako ka ditiko da dinene, ditiko do tala ngu sinambwana, ni sisima, ni maziva a mati, aale ma humako ma txi khulunga ngu mimangoni ni mu mikovani;

Dhewuteronome 8:10

U na ya mana sotshe, u txi dya u txi khura, kambe u na ya bonga Mkoma, Txizimu txako, ngu mhaka ya ditiko di da dinene a nga kuninga.

Ezekhiyele 19:10

Israyeli i ku mame wako a ti ti nga m'vhinya, wu nga phaywa hafuhi ni mati; wu tata madhavi ngu mihando, ngu mhaka ya kutalelwa ngu mati.