Isaya 49:9 - Bhiblia Yo Sawuleka

⁹ kasi ku txi khawe ka vale vo sungwa: Humani; se ni ka vale va ku txidemani, u txi khawe: Ti wonekiseni. Vona va na dyisela tinzilani, ni ka otshe makhalo o guleka va na mana wudyiselo wawe.

Isaya 49:9 Referans Kwoze

Isaya 42:16

Ni na tsimbitisa mabhofu ngu nzila yi ma si yi ziviko, ni na ma maha me tsimbila ngu magondo ale ma nga mbi ma ziva; ni na hundula txidema txi maha kuwonekela masoni kwawe; ni so maha so gombonyeka ni na si lulamisa. Simaheso ni na si maha, kambe kha ni na mbiswa ni va leka.

Isaya 42:7

kasi kutula maso a mabhofu, kasi kuhumisa vo sungwa kusungwani, ni mkorani avale va ku txidemani.

1 Pedro 2:9

Ngu toneto, anu mi liveleko lo sawuleka, vaphaxeli va wukoma, mfumo wo sawuleka, vathu va va lumbako Txizimu, kasiku mi na tsimbila mi txi rurutela mithumo ya kuxamalisa ya Txizimu, atxi txi nga mi humisa txidemani, txi mi wuyisa liwoningoni ka txona ko xamalisa;

Luka 4:18

“Moya wa Mkoma wu txitimwi kwangu, nguko Ene a ni totile, kasiku ni ya huwelela mahungu amanene ka sisiwana, a ni rumete kuya nuwela mhaka ya kuthukunyulwa ka va vo sungwa, ni ka mabhofu kuningwa kutshumela me wona, kuya thusa ava va xaniswako,

Isaya 61:1

Moya wa Mkoma Txizimu, wu txitimwi kwangu, nguko Mkoma a ni totile, kasi kuya txhumayela mahungu amanene ka sisiwana, a ni rumete kuya tirula vale va ku ni kuxaniseka mbiluni, ni kuya nuwela mhaka ya kuthukunyulwa ka va vo sungwa, ni kutulelwa ka vale vo ñolwa;

Isaya 41:18

Ni na tula minambo ka makhalo o guleka ni sisima hagari ka mikova; txiwula txi na hunduka txi maha maziva a mati, ni mafu a kuoma ma na humisa sisima sa mati.

Isaya 9:2

Vathu va va nga ti tsimbila txidemani, va woni liwoningo la hombe; ni ka va va nga ti zumbile ditikoni ka mtsudi wa lifo, ku humelete liwoningo txitimwi kwawe.

Masalmo 102:20

kasiku engisa kuvilela ka tikhumbi ni kuhulukisa avale va nga abaniselwa kufa.

Masalmo 69:33

nguko Txizimu txa engisa sikulungu txona kha txi tsakeli vathu va txona va di kupandisekani.

Vakolosa 1:13

Ene a hi ponisile ka txidema, a txi hi rurisa hi txi ya mfumoni ka Mwanana wakwe wo randeka,

Vaefesu 5:14

ani sotshe si si humiswako ha kubasani, sa hinduka si maha liwoningo. Ngu toneto, ti wombwako va txi kha vona: “Wuka awe u otelako, wuka hagari ka vafi, se Kristu a na kuwoninga.”

Vaefesu 5:8

Kale mi ti hanyela mtemani, aniko mi hindukile mi maha liwoningo ngu ka Mkoma. Tsimbilani kha kwati, nga ti mi ku vanana va liwoningo.

Mithumo 26:18

Kasi kuya tula maso awe ni ku va humisa mtemani, ve wuya livaningoni, ni ku va humisa nfumoni ka Sathani, ve wuya ka Txizimu, kasiku ve amukela divalelo ya sionho, ni kuavelwa thomba kumweko ni vasawuleki ngu kukholwa ditinani kwangu.’ ”

Johani 10:9

Ani ngani ni ku txike: Ngako m'thu a txi wulela ngu ngani, a na hanyiswa; a na wulela, a txi huma, eya mana lihawu.

Johani 8:12

Jesu a to tshumela a txi womba-womba ni vathu, a txi va gela ku khene: “Ani ni liwoningo la ditiko. Awu a ni londisako, kha tsimbili txidemani, kambe a na va ni kuwonekela ka wutomi.”

Luka 1:79

ku ta woninga ava va manekako mtemani ni mtsudini ka lifo, ni ku hi tsimbilisa ngu nzila ya kudikha.”

Joyeli 3:18

Se ku na maheka taku ka ditshiku dile, mimango yi na vhelisa vhinya ya yiphya, simangwanani ku na khulunga masi, yotshe minambo ya ka Judha yi na va yi di tate ngu mati; se ku na huma txisima ngu Nyumbani ka Mkoma txi theletela mkovani ka Sitime.

Ezekhiyele 34:29

Se ni na ti wusela siyalo sa lisima, kha ti na mbiswa kambe ti hetwa ngu nzala ha mafuni, kambe kha ti na mbi va txiruko ka vamatiko.

Ezekhiyele 34:23

Kambe ni na ti wusela m'dyisi mmweyo dwe, se ene a na ti dyisa; txithumi txangu Dhavhidha a no ti dyisa; ene a na va m'dyisi wa tona.

Isaya 65:13

Ngu kumaha keto, Mkoma Txizimu a womba tiya: Wonani taku sithumi sangu si na dya, aniko anu mi na fa ngu nzala; wonani taku sithumi sangu si na sela, aniko anu mi na pfa ditora, wonani taku sithumi sangu si na tsaka, aniko anu mi na wa tingana;

Isaya 5:17

Sekoko sinvutana si nadya kona, kufana ni kuva si txi dya libalani ka sona; ni vawuyi va na dya ka makhalo a vamatiko.

Masalmo 146:7

a lamulako ngu kululama ava va tsindavetwako; a ningako dipawu ka vale va ku ni nzala.

Masalmo 22:26

Sisiwana si na dya kala si khura; avale va lavako Mkoma va na m'dhumisa. Va na hanye ta tinene kala kupinduka!

Dhewuteronome 32:13

A va kwelisile mimango ya mafu, a txi va dyisa mihando ya txitinga. Ni ku va dyisa wulombe wa dirigwini, ni mtona a kuhuma ngu mu ka dirigwi do banga,

Luka 2:32

I ku liwoningo la kuwoninga matiko ni txipfaliso txa kudhumisa vathu vako va ka Israyeli.”

Isaya 48:17

Mkoma, i ku Mutiruli wako, Msawuleki wa Israyeli, a khene: Ani ngani Mkoma, Txizimu txako, awu a ku gondisako ti ti vhunako, ni ku kukomba nzila yi u felako kutsimbila ngu yona.

Mika 5:4

Se ene a na zumba ni kudyisa vathu ngu mtamo wa Mkoma, ka ditina do tshura da Mkoma, Txizimu txakwe; se vona va na zumba, nguko konkuwa ngene a no kuliswa, kala magwito ka mafu.

Levhi 25:54

Ngako asi tirulwi ngu nzila yiya, a na va a txi tekiswa ngu ka dilembe da kutsaka ka hombe, kumweko ni vanana vakwe.