Isaya 49:2 - Bhiblia Yo Sawuleka

² Txisofu txangu a txi mahile txi fanana ni ditxhari do hinda, se a ni fenengetile ngu mtsudi wa dianza dakwe e ni maha lingove lo khetima, e ni sisa amu ka msava wakwe.

Isaya 49:2 Referans Kwoze

Vahebheru 4:12

Dipswi da Txizimu da hanya, di ni mtamo. Da hinda kupinda ditxhari do lotwa ka otshe madhawa, dona da milela mndani, kala kuya abanisa mmidi ni moya, kala kuya thola matshanganoni ka marambu ni mndani ka wuluvi, di ya tumbula mialakanyo ni makungo a mbilu.

Mtuletelo 1:16

Ka dianza dakwe da txinene a ti ñote mtxhanu wa tinyeleti ni timbidi, ngu txisofuni kwakwe ku ti huma ditxhari do hinda, da kulotwa khe ni khe. Ni khohe yakwe yi ti khetima nga ditambo da mitshikari.

Isaya 50:4

Mkoma Txizimu a ni ningile lidimi lo gondisa, kasi ku ni ziva kuwomba ngu mbimo ya kona, dipswi da dinene ka wule wo karala. Ene wa ni wusa mixo ni mixo, wa ti tula tinzeve kasi ku ni engisa, kufana ni vale va gondako.

Isaya 51:16

Ani na veka mapswi angu txisofuni kwako, ni kufenengeta ngu mtsudi wa dianza dangu, kasi kuvanga nzuma, ni kukhata mafu, ni kugela Siyoni kukhani: Anu mi vathu vangu.

Mtuletelo 2:12

Ka ngelozi ya dibanza da Pergamo, bhala u txi khawe: “A womba tiya awule a ku ni ditxhari do hinda, da kulotwa khe ni khe.

Jeremiya 1:18

Nguko nyamsi ni kuvekile kufana ni dikhokhola da mtamo, phande ya txikete, ni diguma da msuku masoni ka ditiko dotshe, masoni ka vafumeli va ka Judha, ni vathangeli vawe, vaphaxeli vawe, ni vathu va ditiko.

Isaya 11:4

kambe a na lamula sisiwana ngu kululama, ni timhaka ta vale vo thutha ha mafuni, a na wila ngu kululama, a na peka mafu ngu donga ya txisofu txakwe, e fuvisa vabihi ngu kufuteta ka txisofu txakwe.

Hoseya 6:5

Ngu toneto, ni va pekile ngu vaprofeti; ni va date ngu dipswi da txisofu txangu; kambe kulamula kwako ku na humelela kufana ni kuwonekela.

Masalmo 91:1

Awule a zumbako kusisalani ka Nyatxitimwi a na humula mtsudini ka Nyamitamo,

Mtuletelo 19:15

Ngu mkanani kwakwe kuhuma ditxhari do lotwa kasi kuwila mifumo ngu dona. Ngene a no yi gola ngu ndonga ya simbi ya wukoma: Ngene a no rukuta nzeka ya vhinya ya kuhenya ko thisa ka Txizimu txa mtamo wotshe.

Luka 23:46

Se Jesu a to huwelela ngu dipswi da hombe, a txi khene: “Tata, na ningela moya wangu manzani kwako.” A di gwitile kuwomba tiya, a to fa.

Isaya 42:1

Wonani Txithumi Txangu, txi ni txi seketelako, Msawulwa wangu, awule moya wangu wu mtsakelako; Ni vekile Moya wangu txitimwi kwakwe; a na humisa kululama hagari ka vamatiko.

Vaefesu 6:17

Amukelani kuhanyiswa ku txi maha txidgoko txanu ha msungo, se dipswi da Txizimu di txi maha ditxhari danu da Moya.

Mtuletelo 2:16

Ngu konaho, hunduluka. U si hunduluki, na kuluveta ni txi ku tela, ni ta lwa navo ngu ditxhari da txisofu txangu.

Eksodha 33:22

Ngako kuphatima kwangu ku txi pinda, ni na ku wuletisa amu phakoni ka dirigwi ni txi kufenengeta ngu dianza dangu, kala kuza ani ni pinda.

Isaya 50:10

I mani hagari kwanu a thavako Mkoma, kambe a engisako dipswi da txithumi txakwe kani? Ngako a txi tsimbila txidemani, ko pwata ni kuwonekela, a na thembe ditina da Mkoma, kambe a na tsane ka Txizimu txakwe.

Habhakuki 3:11

Ditambo ni mtxima si emile makhaloni ka sona; Si nyamalaliswa ngu kuwoninga ka miseve yakwe, ni kuphatima ka kukeluka ka ditxhari dakwe.