Isaya 48:8 - Bhiblia Yo Sawuleka

⁸ Hambi awe khwa tipfa, hambi ku tiziva, ni ka kudotho kukhukhela kale kha ya tulwa nzeve yako, nguko ani ni txi tiziva taku, khu na kuthembeka, ni ti to u txi ndaka-milayo kukhukhela mndani ka mame wako.

Isaya 48:8 Referans Kwoze

Masalmo 58:3

Vobiha va ti hambukisile kukhukhela kuvelekwani kwawe; avale va wombako makuhu va phazamile kukhukhela ha wananani kwawe.

Malakiya 2:11

Judha a lekile mlayo, se a mahile manyala ka Israyeli ni Jerusalema; nguko Judha a nyenyezisile wukhalo wo sawuleka wa Mkoma, awule ene a wu dhundako, se e teka mwanana wa dihorana da txizimu txa walo.

Hoseya 5:7

Ngu wubihi va ti hambukisile ka Mkoma, nguko va velekile vanana va wugango; se konkuwa, mtxima wo ngadi kumeka, u na va lovisa ni tithembwe tawe.

Jeremiya 6:10

Ni na gela mani, ni maha wufakazi waku va na wu engisa kani? Tinzeve tawe maphanzeve, kha va sikoti kuengisa. Mhaka ya Mkoma njiruko kwawe kha va yi dhundi.

Vaefesu 2:3

Nanathu hotshethu hi ti fite kale kufana navo, ngu kulondetela minavelo yathu yo biha ni kumaha kuranda ko hambana ka mmidi wathu ni mipimiso yathu. Ngu kota yeto, nathu ngu mtumbuluko wathu hi ti maneka hi di vanana va va fanelwako ngu kutsukulwa ngu Txizimu kufana ni vamwani.

Jeremiya 5:11

Nguko nyumba ya ka Israyeli ni nyumba ya ka Judha ti ni ongile ngutu, kuwomba Mkoma!”

Jeremiya 3:20

Ngu ditshuri nga ha wamsikati a mahako wubhemba ha mwayani kwakwe, ngu toneto, nyumba ya ka Israyeli mi si thembeki kwangu, kuwomba Mkoma.

Isaya 50:5

Mkoma Txizimu a ni tute tinzeve, se kha na mueyisa; kha ni tshumeleli msana.

Isaya 48:4

Nguko ni ti tiziva ta ku u bangi msungo, thamo yako yi fana ni msiha wa simbi, ni mbanza yako yi fana ni suku.

Isaya 46:8

Alakanyani eto, se mi tsana; mi ti vekisa timbiluni kwanu, anu vahambunyeti.

Isaya 26:11

Mkoma, dianza dako di guletilwe, hambi keto, kha va di woni; va na di wona, hambiko va no kanganyiseka, ngu mhaka ya ku u pfelako vathu vako; kambe mndilo wu na tshokomisa valala vako.

Isaya 21:2

Ni wonisilwe txiwoniso txo thisa: Mkanganyisi wa kanganyisa, ni mxaseli wa xasela. Kwelela awe Elamu, randela awe Medhi; ni malatile miketo yawe yotshe.

Masalmo 51:5

Kha ditshuri, ni m'bihi kukhukhela ni txi velekwa; ni muonhi kukhukhela mndani ka mame wangu.

Masalmo 40:6

Awe khu naveli timhamba ta sihari mwendo ta mitxelo ya mafu, khu vileli kambe timhamba to hiswa, to dihela sionho.

Hoseya 6:7

Kambe vona va ndakile txitumelelano kufana ni Adhamu; se vona va tsimbite ngu nzila yo ni kanganyisa.

Jeremiya 5:21

Engisani koko, anu vathu vo bharuka, mi singako ni mapimo, mi ku ni maso ma si woniko, ni tinzeve ti si engisiko!

Isaya 33:1

Dikhombo kwako u handako na u sa handwa, awe u kanganyisako vale, va nga mbi kukanganyisa! Mbimo yi u no heta kuhanda, u na handwa; u txi na heta kukanganyisa, u na kanganyiswa nawe.

Isaya 42:25

Ngu mhaka yeto, a tshakunutile kuhenya kwakwe txitimwi kwawe, ni mtamo wa yimbi. Se a va vekete m'dhikila madhawani, kambe kha va tipfisisa txilo keto; a va hisile aniko kha va veka mbilu yawe keto.

Isaya 47:11

Ngu kumaha keto, txitimwi kwako, ku nata dikhombo, di u no mbi ziva mu di tako ngu kona, se kuhaxulwa ko ngeko, ku nata txitimwi kwako, kambe khu na mbi sikota ku kuretha; nguko ku nata tximwi kwako ngu txidhukisa, kuxasela ka txihuhuri, kaku khu na mbi sikota ku kuziva.

Isaya 48:7

Konkuwa, sa vangwa, i si nga kukhukhela kale; ngu masoni ka ditshiku diya, khu khali ku tiengisa, kasi ku u si khawe: Wona taku ani ni txi tiziva.

Isaya 57:4

I mani wu mi msekako kani? I mani wu mi asamako sisofu kwakwe, ni ku mi humisela mani lidimi kani? Ina kha mi nga vanana va wuhambunyeti, liveleko la makuhu,

Hoseya 7:9

Vamatiko va mu haxulete ngu mtamo, kambe ene kha ti zivi; ni wunvi u mite txitimwi kwakwe, aniko ene kha ti zivi.

Dhewuteronome 31:16

Se Mkoma a wombile ka Mosi a txi khene: Wona, u hafuhi ni kutsula u txi ya humula kumweko ni vatate vako; se vathu vava, va na khukha va txi ya maha wugango ni simwani sizimu sa ditiko dile u lavako kuwulela ka dona. Vona va na ni leka va txi ndaka mlayo wa txitumelelano, txi ni nga txi sunga navo.

Dhewuteronome 31:18

Kunene ka ditshiku donedo, ani ni na va sisela khohe yangu do gwita ngu mhaka ya totshe to biha, tile vona va no ti maha ngu kutshumelela ka simwani sizimu.