Isaya 45:7 - Bhiblia Yo Sawuleka

⁷ Ani na maha kuwonekela ni va nga txidema; ani na vanga kudikha, ni va nga dikhombo; ani Mkoma, na maha totshe tiya.

Isaya 45:7 Referans Kwoze

Amosi 3:6

Ina ku nga pekwa mpundu didhoropani vathu va si dhudhumeli ngu kuthava kani? Ina ku nga humelela wubihi didhoropani, na wu sa mahwa ngu Mkoma kani?

Masalmo 75:7

Nguko Txizimu ngu txona i ku mlamuli: Vamwani txa va abanisa, aniko vamwani txa va txhatxha.

Jobe 2:10

Aniko ene a to khene: Mawombawombelo a wamsikati wa txiphukuphuku eyo u ma thumisako; hi na amukela wunene ngu ka Txizimu, hi si amukeli ta walo kani? Ka totshe tiya, Jobe kha onha ngu txisofu txakwe.

Amosi 4:13

Nguko ngu txona txi bumbaretelako mimango, ni kuvanga moya, txi zivisa m'thu taku ngu ahi maalakanyo a txona, txi mahako ti to mixo yi ve txidema, txi kanda txitimwi ka mafu; Mkoma, Txizimu txa Mabutho a Tiyimbi, ngu dona ditina dakwe.

Isaya 31:2

Hambi keto kambe, nene ana ni wutxhari, a na tisa wubihi, kha na mbi tshumeta mapswi akwe; a na wukela nyumba ya vamahi va kubiha, ni sivhuno sa vale va mahako kubiha.

Jeremiya 31:35

Mkoma a khene, awu a ningako ditambo kuwoninga ditshiku, ni kuleletela mtxima ni tinyeleti ha wusikuni, a bhandako linene ni kudhindisa mavimbi a lona; ditina dakwe Mkoma wa Mabutho a Tiyimbi.

Jeremiya 13:16

Dhumisani Mkoma, Txizimu txanu, na ku si se maha txidema, mikondo yanu yi si se humbwa mimangoni ko phuma; mi txi ngadi mi verela liwoningo a na li phemberusa li maha mtsudi wa kufa, ni txidema txo phindeletisa kuphuma.

Nahume 1:8

Se ngu ndambi yo khulunga, a na lovisa wukhalo wawe do gwita, se txidema txi na tutumisa valala vakwe.

Jeremiya 51:20

Awe ngawe hamela yangu ni matxhari angu a yimbi, kumweko ni nawe ni na tshatulela matiko, kambe kumweko ni nawe ni na khundumusela vafumeli;

Mithumo 4:28

Ngu konaho vona va mahile totshe ti u nga ti emisa ngu kale ngu diwoko dako ni kuranda kwako, ti to ti na maheka.

Amosi 5:6

Lavani Mkoma mi na hanya, kasi ku si rinzwi mndilo ka nyumba ya ka Josefa, wu txi yi tshokomisa, ku si maneki ni wammweyo Bheteli, wa ku yi tima.

Ezekhiyele 32:8

Otshe malambu o woninga a nzumani ni na ma phumisa kwako, ni txi tisa txidema txitimwi ka mafu ako, kuwomba Mkoma Txizimu.

Masalmo 29:11

Mkoma wa ninga mtamo ngamu yakwe; Mkoma a katekisa ngamu yakwe ngu kudikha.

Masalmo 8:3

Ngako ni txi wonisisa nzuma, mthumo wa manza ako, ni mtxima ni tinyeleti, asi u nga si maha, ni pimisa ni txi khani;

Jobe 34:29

Se ngako Txizimu txi txi malala i mani wa ku txi sola kani? Ngako txi txi ti tsiva khohe, i mani waku a nga txi wona, ka vathu votala, hambi ka m'thu mmweyo kani?

Eksodha 14:20

ngu ka toneto, direfu di manekile di txi zumbela hagari ka dibutho da yimbi ya Vaegipta ni va ka Israyeli; aniko ngu ka Vaegipta direfu i ti da mtema wa hombe, aniko, ka va ka Israyeli di ti ti va woningeta. Ngu mhaka yeto, Vaegipta kha va sikota kumanela va ka Israyeli ka wusiku wotshe.

Judha 1:13

i mavimbi o leva a linene; mithumo yawe ya tingana yi pupuma nga diphutu; ndinyeleti to pepuka ati ti nga lulamiselwa txidema txa hombe txo mbi na magwito.

Judha 1:6

Se tingelozi ti ti nga mbi veketa wukoma wa tona, aniko ti nga leka wukhalo wa tona, a ti vekile mtemani, ti di sungilwe ngu makhodha o mbi guma, ti verela kulamulwa ka ditshiku da hombe.

Jakobe 1:17

Sotshe sihiwa sa lisima, sotshe siningo sa kuhetiseka, si ta ngu txitimwi, si txi txhika ngu ka Tate wa liwoningo, awu a ku si nga ni kutxitxa, awu kuwoninga kwakwe ku ku si nga ni kutxitxa ku txi maha txidema.

2 Vakorinto 4:6

Txizimu txi txi nga womba ti to ku na tumbuluke liwoningo mu ka txidema, ngu txona txi nga woninga timbilu tathu, kasiku nanathu hi txi woninga vathu ngu wuzivi wa kuphatima ka Txizimu, aku ku wonekako ka Kristu.

Joyeli 2:2

ditshiku da txidema ni kupandiseka, da marefu ni txidema txo hangalaka; ku nga wuronga wo hangalaka txitimwi ka mimango, mbathu va hombe va mtamo ngutu, ava kukhukhela ka kale, kha va khali ku nga vaho, hambi msana kwawe kha va na mbi vaho ka malembe matako, ka liveleko ni liveleko.

2 Vafumeli 19:25

Ina u nga va u sa tipfa taku ngu kale ni ti mahile toneto, niku kukhukhela masiku a kale ni si vangile kani? Sekoko konkuwa ni ku tisile, kuva u ta khozisa madhoropa a mtamo me maha situletule sa siwula.

Masalmo 105:28

Txizimu txi rumete txidema txi fenengeta Vaegipta, aniko vona kha va khatala ngu txiziviso txiya.

Isaya 42:16

Ni na tsimbitisa mabhofu ngu nzila yi ma si yi ziviko, ni na ma maha me tsimbila ngu magondo ale ma nga mbi ma ziva; ni na hundula txidema txi maha kuwonekela masoni kwawe; ni so maha so gombonyeka ni na si lulamisa. Simaheso ni na si maha, kambe kha ni na mbiswa ni va leka.

Isaya 47:11

Ngu kumaha keto, txitimwi kwako, ku nata dikhombo, di u no mbi ziva mu di tako ngu kona, se kuhaxulwa ko ngeko, ku nata txitimwi kwako, kambe khu na mbi sikota ku kuretha; nguko ku nata tximwi kwako ngu txidhukisa, kuxasela ka txihuhuri, kaku khu na mbi sikota ku kuziva.

Jeremiya 10:16

Awu i ku txiningo txa ka Jakobe kha fanani naso; nguko ngene mmahi wa silo sotshe; Israyeli lixaka la thomba yakwe, ditina dakwe Mkoma wa Mabutho a Tiyimbi.

Sidilo 3:38

Ina hi nga ngu txisofuni ka Nyatxitimwi kuhumako wubihi ni wunene kani?

Dhaniyeli 2:22

Txi wonekisa timhaka totshe ti ti ku kusisalani, txi ziva totshe ti ku txidemani, ni liwoningo li zumba ni Txizimu.

Jobe 10:13

Aniko totshe tiya u ti sisile mbiluni kwako; ani na tiziva kha kwati taku, totshe tiya ti ti ti kwako.

Masalmo 74:16

Wusiku ni mitshikari si lumba awe; u vangile mtxima ni ditambo.

Isaya 44:24

Mkoma, Mtiruli wako, wule a nga ku wumba kukhukhela mndani, a khene: Ani ngani Mkoma, ni mahako sotshe, ni atetako tinzuma, ni kunawuluta mafu ani nipune;