Isaya 45:11 - Bhiblia Yo Sawuleka

¹¹ A womba tiya Mkoma, Msawuleki wa ka Israyeli, wule a nga m'va nga: Ni wotiseni ta masiku ale matako; mi na lava kuziva mhaka ya vanana vangu, ni mhaka ya mthumo wa manza angu.

Isaya 45:11 Referans Kwoze

Isaya 48:17

Mkoma, i ku Mutiruli wako, Msawuleki wa Israyeli, a khene: Ani ngani Mkoma, Txizimu txako, awu a ku gondisako ti ti vhunako, ni ku kukomba nzila yi u felako kutsimbila ngu yona.

Marku 11:24

Ngu konaho ni khani kwanu: Sotshe si mi si kombelako ngu kukhongela, tumelani ti to mi si amukete, si na va sanu.

Ezekhiyele 36:37

Mkoma Txizimu a khene: Kambe ngu mhaka ya tona eto, nyumba ya ka Israyeli yi na ni kombela, ati to ni txi yi mahela: Kuandisa vathu va yona, kufana ni mtxhambi.

Jeremiya 33:3

Kwangula kwangu ni na kuxamula, ni na kukomba silo sa hombe, u si si ziviko.

Isaya 29:23

Aniko mbimo yile vanana vanu va no wona mthumo wa manza angu, hagari kwawe, va na sawulekisa ditina dangu, ni kusawulekisa Msawuleki wa Jakobe, se va na thava Txizimu txa ka Israyeli.

Vaefesu 2:10

Nguko athu hi mthumo wa kuhuma manzani ka Txizimu txi nga hi va nga ngu ka Kristu Jesu ngu mhaka ya mithumo ya yinene yi Txizimu txi nga hi sikela ngu kale, kasiku hi yi maha.

Hoseya 1:10

Ngu kumaha keto, mtengo wa vanana va ka Israyeli u na nga mtxhefa wa lineneni, awule wu si pimwiko mwendo kubalwa; se ku na maheka tito, ka wukhalo wu va nga gelwa ku kha vona: Anu kha mi nga vathu vangu, va na kha vona: Anu mi vanana va Txizimu txi txi hanyako.

Isaya 60:21

Se votshe vathu va kakwanu va na va vo lulama, mafu ma nava thomba yawe yotshe mbimo; va na va makhukhu o thungiswa ngu ngani, mthumo wa manza angu, kasi ku ani ni dhumiswa.

Isaya 43:21

Vathuvo ni nga ti wumbela, kasi ku va na ni dhumisa.

Joxuwa 10:12

Sekoko Joxuwa a wombile ka Mkoma, ka ditshiku dile Mkoma a nga ningela Vaamori manzani ka vanana va ka vanana va ka Israyeli, a txi khene: “Ditambo, ema txitimwi ka Gibheyoni, ni nawe mtxima, ema mkovani ka Ajaloni!”

Hoseya 12:4

Ku nga mthangeli a lwite ni ngelozi, a txi yi xula; a dite, a txi yi kombela; kambe a to mana Txizimu kona Bheteli, se txona txi womba-womba ni nathu koneyo;

Jeremiya 31:9

Va na wuya va txi dila, ni txi va heleketa na va txi khongela; ni na va thangela minamboni ka mati, ngu nzila yo basa, eyo va na kwa mbi huma ka yona; ngu ku ni ku tate ka Israyeli, matiwula angu ngu Efrayime.

Isaya 64:8

Kambe konkuwa, awe Mkoma, awe ngawe tate wathu; athu hi dibumba, se awe u muwumbi wathu; kambe athu hotshethu hi mthumo wa manza ako.

Isaya 43:15

Ani ngani Mkoma, Msawuleki wanu, Muvangi wa Israyeli, Mfumeli wanu.

Isaya 43:7

ka votshe vale va dhanwako ngu ditina dangu, ni vale ni nga va wunja, kasi kuva wudhumo wangu; ani ni va wumbile, ina, ani ni va vangile.

Isaya 43:3

Nguko ani ngani Mkoma Txizimu txako, Msawuleki wa Israyeli, Mtxhatxhisi wako; ni ningete Egipta kuva mtxhatxhisi wako, ni Etiyopiya, ni Sebha, ka wukhalo wako.

Genesisi 32:26

Ene a wombile, a txi khene: “Ni leke ni txi tsula, nguko wuronga wu gwimbile.” Aniko Jakobe a mxamute, a txi khene: “Ani kha ni na mbi kuleka ngako u si ni katekisi.”

2 Vakorinto 6:18

“Aniko ni na va Tate wanu, anu mi na va vanana vangu va mazambi ni vamahorana,” kuwomba Mkoma wa Mtamo wotshe.

Dhaniyeli 2:18

kasiku ve kombela wumbilu ka Txizimu txa nzumani, madingano ni txihunja txiya, ti to Dhaniyeli ni vangana vakwe va si loviswi kumweko ni titxhari ta Bhabhilona.

Ezekhiyele 39:7

Ni na zivekisa ditina dangu do sawuleka, hagari ka vathu vangu va Israyeli, kambe kha ni na mbiswa ni leka ditina dangu do sawuleka di txi nyenyeziswa; kambe matiko ma na tiziva taku, ani ngani Mkoma, wo Sawuleka kona Israyeli.

Jeremiya 3:19

Se ani ni txi khani: Ni na kuvekisa kutxani hagari ka vanana, ni na kuninga ditiko da kunaveleka, i kuthomba ya mabutho a matiko kani? Ni txi khani: Mi na ni dhana mi txi khanu: Tata. Kha mi na mbiswa mi phawuka mi txi ni siya.

Isaya 19:25

Nguko Mkoma wa Mabutho a Tiyimbi, a na va katekisa, a txi khene: Va na kateke Vaegipta, vathu vangu, ni Vasiriya, i ku mthumo wa manza angu, ni Israyeli, i kuthomba yangu.

Jeremiya 31:1

Ka yona yile mbimo, kuwomba Mkoma, ni na va Txizimu txa totshe tihunzu ta ka Israyeli, vona va na va vathu vangu.

Valamuli 16:23

Sekoko vathangeli va Vafilista va to tshangana, kasi kuningela mphaxo wa hombe ka txizimu txawe Dhagoni, ni kutitsakela, va txi kha vona: Txizimu txathu txi ningete Samusoni mlala wathu manzani kwathu.

Isaya 8:19

Va txi mi gela va txi kha vona: Wotisani ava va ku ni mimoya ya vafi, ni vahuti vale va lengako, ni kungungurukela, mi txi khanu: Vathu kha va faneli ku wotisa Txizimu txawe kani? Ku nga wotiswa ka vafi timhaka ta va va hanyako kani?

Isaya 44:2

Mkoma wu a nga kuvanga, e kuwumba kukhukhela mndani, ni ti to a na kuvhuna, a khene: U nga thave awe Jakobe, txithumi txangu, ni nawe Jesurumi, awe ni nga kusawula.

Isaya 45:10

Dikhombo ka wule a ku khene ka tate wakwe: U velekile txani kani? Se ka wamsikati a txi khene: U hefemulete txani kani?

Isaya 54:5

Nguko M'vangi wako i mwamna wako; ditina dakwe Mkoma wa Mabutho a Tiyimbi; se Msawuleki wa Israyeli, ngene mtiruli wako; ene a na dhanwa ku Txizimu txa otshe mafu.

Isaya 43:1

Se konkuwa, kuwomba Mkoma, wule a nga kuvanga, awe Jakobe, kambe a nga kuwumba awe Israyeli, a khene: U nga thave, nguko ani ni ku tirute; ni kudhani ngu ditina dako; awe u wangu.

Isaya 63:16

Aniko awe u Tate wathu, hambi kule Abrahamu asi hi ziviko, ni Israyeli asi hi alakanyiko. Awe Mkoma, u Tate; Mtiruli wathu, kukhukhela kaleko, ditina dako.