Isaya 44:9 - Bhiblia Yo Sawuleka

⁹ Votshe vathumi va sithombe so vatwa, kha va vhuni txilo, ni simaha sawe sile va tsakako ngu sona, hi nga sa txilo; tifakazi tawe tipune kha ti woni txilo, kambe kha ti pimisi, kala kuza vona ve kanganyiswa.

Isaya 44:9 Referans Kwoze

Isaya 41:24

Wonani taku ma pindwa ngu kuva mi si nga txilo, ni mthumo wanu wa pindwa ngu kuva i si nga txilo; kunyenyeka ngu kona ku mi sawulako.

Isaya 41:29

Wona taku votshe kha va vhuni txilo, mithumo yawe hi nga txilo, sithombe sawe so wumbwa i moya, hi txilo.

Masalmo 97:7

Va na wiswa tingana votshe vale va khozelako sithombe, votshe vale va ti guletako ngu sizimu so mbi vhuna txilo; ni sotshe sizimu si na khizamele Mkoma Txizimu!

Vaefesu 5:8

Kale mi ti hanyela mtemani, aniko mi hindukile mi maha liwoningo ngu ka Mkoma. Tsimbilani kha kwati, nga ti mi ku vanana va liwoningo.

2 Vakorinto 4:4

Ngu vona vale va si kholwiko, ava Txizimu txo biha txa ha mafuni txi nga va maha mabhofu mapimoni kwawe, kasiku va si woni liwoningo la Evhangeli ya wudhumo wa Kristu, awu i ku txifananiso txa Txizimu.

1 Vakorinto 8:4

Ngu toneto, ka mhaka ya sakudya sa timhamba ta kugandela sizimu sa walo, ha tiziva hotshethu ti to Txizimu txa walo hi nga txa txilo ha ditikoni; ha tiziva ti to ku ni Txizimu, txa tximwetxo dwe, hahanze ka txona kuwalo tximwani.

Varoma 1:22

Va kha vona va ziva, kuve nzipumbu.

Dhaniyeli 11:38

Aniko ka wukhalo wa txona a na khozela txizimu txa mikhokhola, a na khozela ngu nzalama txizimu txi txi nga mbi ziwa ngu vatate vakwe, ni silivhela, ni marigwi a lisima, ni siya sa lisima.

Dhaniyeli 5:23

Kambe u ti kulisile masoni ka Mkoma wa nzumani, nguko siya sa Nyumbani ka Mkoma si wuyisilwe masoni kwako, se awe, ni vahombe vako, ni vasikati vako, ni sigango sako, mi sete vhinya ngu sona; Hahanze keto, u to khozela sizimu sa silivhela, ni nzalama, sa koporo, sa tisimbi, sa tiphande, ni sa marigwi, si si woniko, si si engisako, si si zivako; aniko Txizimu txi wutomi wako, ni tinzila tako totshe, si ku manzani ka txona, khwa txi dhumisa.

Jeremiya 14:22

ina txiho txifananiso hagari ka vamatiko txi sikotako kunisa mati kani? Mwendo nzuma yi nga sikota kunisa mati yipune kani? Ina hi ngawe kani Mkoma, Txizimu txathu kani? Ngu konaho, hi na kuverela, nguko ngawe u nga maha sotshe siya.

Jeremiya 2:11

Di ngava di diho ditiko di di nga hundulusa sizimu sa dona, hambiko i singako sizimu kani? Aniko vathu va vangu va lekile wudhumo wawe, ve khozela sisi si vhuniko txilo.

Isaya 45:20

Sengeletanani, mi txita, tshuketani kumweko, anu mi nga huluka ka matiko; kha va zivi ta txilo ava va rwalako sithombe so vatwa, so mahwa ngu mapulango, kambe va khozelako ka txizimu txaku kha txi sikoti kuhanyisa.

Isaya 44:20

Adya dikhuma; mbilu yakwe ya wukanganyisi yi m'hambukisile, aha ko kha na kuhulukisa wutomi wakwe, hambi kuwomba ku khene: Ina kha ku nga ni makuhu ka dianza dangu da txinene kani?

Isaya 44:18

Kha va zivi txilo, hambi kupfisisa txilo; nguko va vhalekile maso, kasi ku va si woni, ni mbilu kasi ku va si pimi txilo.

Isaya 43:8

Tisani vathu va i ku mabhofu, avale va ku ni maso; ni maphazeve ale ma ku ni tinzeve.

Isaya 42:18

Anu maphazeve engisani, ni nanu mabhofu wonani, kasi ku mi txi na kota kuwona.

Masalmo 135:18

Va na fanane ni sithombe soneso ava va si wumbako ni va va kholwako ka sona.

Masalmo 115:8

Avale va si wumbako, ve tshumela ve themba ka sona va na fane naso sona sithombeso.

Vaefesu 4:18

Mialakanyo yawe yi mtemani, kha va nga ni txyavelo amu ka wutomi wa Txizimu, nguko kwawe kuwalo wuzivi, ni timbilu tawe ti bangi.

Valamuli 10:14

Tsulani mi txi ya dila ka sizimu sile mi nga si sawula; si na mi hulukisa sona, ka mbimo ya kuxaniseka kwanu!”

Dhewuteronome 27:15

“Dikhombo di nave ka m'thu wule a mahako txithombe txo vatwa, mwendo txo bhakwa, nguko manyala ka Mkoma, tximaha txa mthumo wa manza a vathu, a txi txi khozela kusisalani!” Se vathu votshe va na womba va txi kha vona: “Amen!”

2 Vafumeli 19:18

Va tshotshile sizimu sawe mndiloni, ngako i nga si nga sizimu sa txilo, aniko i ti mithumo ya manza ya vathu, nzithombe so mahwa ngu mapulango ni marigwi; ngu mhaka yeto, va si khundumusete.

Isaya 26:11

Mkoma, dianza dako di guletilwe, hambi keto, kha va di woni; va na di wona, hambiko va no kanganyiseka, ngu mhaka ya ku u pfelako vathu vako; kambe mndilo wu na tshokomisa valala vako.

Isaya 42:17

Va na tshumelela msana se va na wa tingana avale va thembako sithombe so vatwa, va ku kha vona ka sithombe so wumbwa: Anu mi sizimu sathu.

Isaya 43:9

Matiko otshe ma na sengeletane, ni vathu va na tshangane; i mani hagari kwawe a nga sikotako kuzivisa tiya, e hi maha hi engisa timhaka ta kale kani? Kombisani tifakazi tanu, kasi ku mi ti basisa, ni ti to ti pfiwa, ni ti to ku txi wombwa taku: Ditshuri!

Isaya 44:11

Wonani taku, votshe vale va si londetako va nawa tingana; nguko vathumi va kona vapune va huma hagari ka vathu; va na sengeletane votshe va txi ema; va na thava, kambe votshe va na wa tingana.

Isaya 45:16

Va nawa tingana, kambe va na kanganyiseka votshe; va nawa kumweko vale va mahako sithombe.

Isaya 65:13

Ngu kumaha keto, Mkoma Txizimu a womba tiya: Wonani taku sithumi sangu si na dya, aniko anu mi na fa ngu nzala; wonani taku sithumi sangu si na sela, aniko anu mi na pfa ditora, wonani taku sithumi sangu si na tsaka, aniko anu mi na wa tingana;

Dhewuteronome 4:28

Koneyo mi na ya khozela sizimu so mahwa ngu manza a vathu, sa mapulango ni sa marigwi, si si woniko mwendo kuengisa, kudya mwendo kupfa kubhumula.

Masalmo 115:4

Sizimu sa vamatiko i silivhela ni nzalama, sithombe so khandwa ngu manza awe:

Isaya 57:12

Ani ni na pfalisa kululama kwako ni mithumo yako, aniko kha va na mbi kulondola.

Jeremiya 2:26

Kufana ni dikhamba di di manwi di ni tingana, ngu toneto ni nyumba ya ka Israyeli yi ni tingana, kumweko ni vafumeli ni vathangeli va yona, vaphaxeli va yona ni vaprofeti va yona.