Isaya 44:2 - Bhiblia Yo Sawuleka

² Mkoma wu a nga kuvanga, e kuwumba kukhukhela mndani, ni ti to a na kuvhuna, a khene: U nga thave awe Jakobe, txithumi txangu, ni nawe Jesurumi, awe ni nga kusawula.

Isaya 44:2 Referans Kwoze

Jeremiya 1:5

“Ni ku zivile ni si se kuwumba mndani ka mwamwako; kambe na u si se velekwa ni kusawute, kuva mprofeti wa matiko.”

Isaya 43:1

Se konkuwa, kuwomba Mkoma, wule a nga kuvanga, awe Jakobe, kambe a nga kuwumba awe Israyeli, a khene: U nga thave, nguko ani ni ku tirute; ni kudhani ngu ditina dako; awe u wangu.

Isaya 44:24

Mkoma, Mtiruli wako, wule a nga ku wumba kukhukhela mndani, a khene: Ani ngani Mkoma, ni mahako sotshe, ni atetako tinzuma, ni kunawuluta mafu ani nipune;

Isaya 43:7

ka votshe vale va dhanwako ngu ditina dangu, ni vale ni nga va wunja, kasi kuva wudhumo wangu; ani ni va wumbile, ina, ani ni va vangile.

Isaya 49:1

Ni engiseni anu sitondolo, pfisisani anu vathu va kule! Mkoma a ni dhani, kukhukhela mndani ka mame wangu, kukhukhela msembeni ka mame wangu, a ni rayile ditina.

Vaefesu 1:4

Ngu kota yakwe, Txizimu txi hi sawute, di sinzi kumahwa ditiko, kasi ku hi txi mana wululami wa lirando ni kuzumba hi si nga ni txisolo masoni ka txona.

Isaya 41:10

u nga thave, nguko ani ni ni nawe; u nga gume mtamo, nguko ani ni Txizimu txako; na kutsanisa, kambe na kuvhuna, na kuseketela ngu dianza dangu da txinene da kululama.

Varoma 8:30

Avale txi nga va sikela ngu kale, ngu vona va txi nga va dhana; se avale txi nga va dhana, ngu vonavo txi nga va maha valulami; se avale txi nga va maha valulami ngu vona txi nga va ninga wudhumo.

Masalmo 71:6

Awe u m'vhuneteli wangu, kukhukhela mndani ka mame wangu; kukhukhela kuvelekwani kwangu ngawe u ni xayisako! Ni na kudhumisa yotshe mbimo!

Isaya 43:21

Vathuvo ni nga ti wumbela, kasi ku va na ni dhumisa.

1 Vatesalonika 1:4

Ha tiziva, vanathu, ti to anu mi dhundwako ngu Txizimu, mi sawutwe ngu txona.

Luka 12:32

Mi nga thaveni txilo, anu mi ku mtxhambi wa wudothoanyana, nguko ti tsakisile Tate wanu ku mi ninga Mfumo!”

Vahebheru 4:16

Ngu kota yeto, ahi yeni ngu kutsaka txiluveloni ka makatekwa, ahawa hi no ya mana wumbilu ni kateko yi yi no hi vhuna ngu mbimo yi yi fanelako.

Isaya 44:21

Alakanya timhaka eto, awe Jakobe, ni nawe Israyeli, ngako u ku txithumi txangu; ani ni ku vangile, awe Israyeli u txithumi txangu; kha ni na mbi kudivala.

Masalmo 46:5

Txizimu txi hagari ka dona, vathu va dona kha va na kurereka; Txizimu txi na vindukela ku va vhuna ni mixo.

Isaya 43:5

U nga thave koko, nguko ni ni nawe, ni na wuyisa vanana vako ngu wutxani, ni kusengeleta kukhukhela mswa-ditambo.

Isaya 41:14

U nga thave, awe txipungwana txa Jakobe, sivathwana sa ka Israyeli; ani na kuvhuna, kuwomba Mkoma, kambe Mtiruli wako Msawuleki wa Israyeli.

Dhewuteronome 33:5

Se Mkoma a to maha mfumeli kona Jesurumi, mbimo yi ku nga sengeletana vathangeli va vathu, ni tihunzu ta ka Israyeli.

Dhewuteronome 32:15

Se Jesurumi a dyite e khura, a txi ena; u enile, u enile, u tala ngu mafura; se a lekile Txizimu txi txi nga mmaha; kambe a eyisile Dirigwi da kuhanyiswa kwakwe.

Dhewuteronome 33:26

Awe Jesurumi kha nga ho wa kufana ni Txizimu, a tako a di gadhile tinzuma kasi ku ta ku vhuna, a tako ni wuhombe wakwe txitimwi ka marefu!

Isaya 27:11

Mbimo yile madhavi a kona ma no oma, ma na funywa; vavasikati va nata ma dhivela, nguko vathu vava, hi nga vathu vo pfisisa; ngu toneto, wule a nga m'va nga kha na mbi mpfela wusiwana, ni wule a nga muwumba, kha na mbi va mahela wumbilu.

Isaya 41:8

Aniko awe Israyeli, txithumi txangu. Awe Jakobe, awe ni nga kusawula, liveleko la Abrahamu, mngana wangu.

Isaya 45:11

A womba tiya Mkoma, Msawuleki wa ka Israyeli, wule a nga m'va nga: Ni wotiseni ta masiku ale matako; mi na lava kuziva mhaka ya vanana vangu, ni mhaka ya mthumo wa manza angu.

Isaya 49:5

Se konkuwa, kuwomba Mkoma, wule a nga ni wumba khukhela mndani, kasi kuva txithumi txakwe, ti to ni wuyisa Jakobe kwakwe, aniko Israyeli kha ti pata; hambi keto masoni ka Mkoma ni na dhumiswa, ni Txizimu txitxhavangu txi na va mtamo wangu.

Jeremiya 30:10

U nga thave koko, awe txithumi txangu Jakobe, kuwomba Mkoma, kambe u nga xamale, awe Israyeli; nguko ni na kuhumisa ka matiko a kule, ni vanana vako, ngu ditikoni ka wukhumbi wawe; se Jakobe a na wuya, e ta humula, kambe a na zumbiseka, kha ku na mbi vaho wo m'dhukisela.

Masalmo 95:6

Ngonani anu hi ta khozela ni kunama! A hi khizameni masoni ka Mkoma awu a nga hi vanga,