Isaya 42:15 - Bhiblia Yo Sawuleka

¹⁵ Mimango ni simangwana si na va txiwula, wotshe mwasi wa kona ni na wu omisa, minambo ni na yi maha sitondolo, se ni omisa maziva.

Isaya 42:15 Referans Kwoze

Isaya 50:2

Ngu kutxani ni ngata ni si ta mana m'thu kani? Ngu kutxani ni nga mi dhana, ku si oroveli ni wammweyo kani? Ina dianza dangu di to khwanyela, niza ni si sikoti kutirula kani? Ni ku mwendo kha ni ngadi ni mtamo kasi kutxhatxhisa kani? Wonani taku, ngu kukawuka kwangu na omisa linene, ni maha ti to minambo yi hunduluka yiva siwula, kala kuza sihaka sa kona si nunga, nguko kha ku nga ni mati, se sa fa ngu ditora.

Isaya 44:27

ni ku khani ka kutshima: Phwana! Se ani ni na phywisa minambo yako;

Mtuletelo 20:11

Ngu msana ni to wona txikhalo txa hombe txa wukoma txo basa ni wule a khalahatshako ka txona. Nzuma ni mafu si tutuma si mu thava, ku si sali txikombiso txa hawa si nga ti kona.

Mtuletelo 16:18

Konako ku to humelela kukeluka ka nzuma, mapswi, singwalangwanda ni kudekadeka ka mtamo ka mafu: Kudekadeka ka hombe ngutu akuwa txima kha kuzivi kuhumelela kukhukhela m'thu a di tumbulukile ha mafuni.

Mtuletelo 16:12

Ngelozi ya wutxhanu ni yimweyo yi to theketa digombe da yona txitimwi ka mnambo wa hombe wa Ewufrate, se mati a mnambo ma to phwa me tulela nzila vakoma va Wutxani.

Mtuletelo 11:13

Ka txona txile txikhati ku to humelela kutsekatseka ka hombe ka mafu: Didhawa da wugumi da didhoropa di to khundumuka, se ve fa 7.000 wa vavamna. Ava va nga huluka va to tala ngu kuthava, ve dhumisa Txizimu txa nzumani.

Zakariya 10:11

Ene a na txhatuka linene ngu kukarateka, se a na peka mavimbi a linene, kambe kotshe kutshima ka minambo ku na oma, sekoko kutikulisa ka Asiriya ku na wiswa, ni ndonga ya Egipta yi na khukha.

Hagayi 2:6

Nguko Mkoma wa Mabutho a Tiyimbi a womba tiya: Msana ka mbimonyana, na i si nga kuswela, ni na maha ti taku nzuma, ni mafu, ni linene, ni mafu a kuoma, si txi zinginika;

Ezekhiyele 38:20

ngu kumaha keto, si na thava masoni kwangu, sihaka sa lineneni, ni sinyana sa nzumani, ni sihari sa txitinga, ni sotshe sile si kasako txitimwi ka mafu, ni votshe vathu va ku txitimwi ka mafu; se mimango yi na wa, ni mikova yi na fuva, ni otshe maguma ma na wa hahatshi.

Jeremiya 4:24

Ni to wona mimango, ti woneka to yi txo dhudhumela; ni simangwana sotshe si txi dekandeka.

Isaya 49:11

Se ni na maha tinzila ka yotshe mimango yangu; ni sinzilana sangu si na kuliswa.

Masalmo 18:7

Sekoko mafu ma to zinginika, ma txi dekadeka, makhato a mimango ma to dhudhumela: Ma dhudhumete ngu kuhenya ka Txizimu.

Isaya 41:15

Wona taku, ni ku mahete txigayo txa txiphya, txi ku ni makwasa o hinda; u na hula ni kugaya mimango; se simangwana u na si maha si txi nga mwasi.

Ezekhiyele 38:19

Nguko ku ti hita kwangu ku ni gete, amu ka mndilo wa kuhenya kwangu, taku ka dona ditshiku dile ku nava ni kudhudhumela ka hombe, txitimwi ka ditiko da ka Israyeli,