Isaya 41:10 - Bhiblia Yo Sawuleka

¹⁰ u nga thave, nguko ani ni ni nawe; u nga gume mtamo, nguko ani ni Txizimu txako; na kutsanisa, kambe na kuvhuna, na kuseketela ngu dianza dangu da txinene da kululama.

Isaya 41:10 Referans Kwoze

Joxuwa 1:9

Ina kha na kugela ani kani? Tsana uva ni mtamo; u nga xamale, kambe u nga thave, nguko Mkoma, Txizimu txako, a ni nawe, ni hani mu uyako kona.”

Varoma 8:31

Hi na khathu txani ngu tona tiya kani? Ngako Txizimu txi di kumweko ni nathu, i mani a no hi wukela kani?

Vafilipiya 4:13

Totshe na ti kota, ngu kutsaniswa ngu wule a ni ningako mtamo.

2 Vakorinto 12:9

aniko, ene a ni gete ku khene: “Kateko yangu yi ku enelete. Nguko, mtamo wangu wu tikomba ngu kuhetiseka ahawa ku ku ni kutandeka.” Ngu toneto, ani ni dhunda ku ti dhumisa ngu kutandeka kwangu, kasiku ni na mana kuvhunwa ngu mtamo wa Kristu.

Masalmo 27:1

Mkoma ngene kuwoninga kwangu ni kuhanyisa kwangu. Ni nga thava mani kani? Mkoma i mkhokhola wa kuhanya kwangu. Ni nga dhukiselwa ngu mani kani?

Masalmo 63:8

Moya wangu wu patanile ni nawe, se dianza dako da ni tsanisa.

2 Makronika 20:17

Ka yimbi yiya anu kha mi na mbilwa, tsulani mi txi ya ema mi wonetela a ti Mkoma a no maha, kasi ku mi hulukisa, anu va ka Judha, ni va Jerusalema; mi nga thaveni, kambe mi nga dhukisweni; mangwana va hingeteni, nguko Mkoma a na va ni nanu.

Masalmo 145:14

Mkoma wa wusa votshe vale va wako, a txi tsanisa votshe vale va khuvekako.

Isaya 12:2

Wona taku, Txizimu i ku muhanyisi wangu, na txi themba, kambe kha ni na mbi thava txilo, nguko Mkoma Txizimu, ngene mtamo wangu, ni ndando yangu, se a mahile kuhanyisa kwangu.

Isaya 60:19

Kha di na mbiswa di kuthumela ditambo kasi ku kuwoninga, hambi kuwoningwa ngu mtxima; aniko Mkoma a na va liwoningo lako la kwa mbi guma, ni Txizimu txako mbudhumo wako.

Dhewuteronome 20:1

“Mbimo yi u no huma ku yalwa yimbi ni valala vako, ngako u txi wona mahantxhi ni sikotxikani ni vathu vavangi, vo pinda awe, u nga va thave, nguko Mkoma, Txizimu txako awu a nga kuhumisa ditikoni ka Egipta, ana ni nawe.

Zakariya 13:9

Se ni na pindisa dile da wuraru ngu ha ka mndilo, ni txi di sawulekisa, ku nga tile yi nga sawulekisa tona silivhela, kambe ni na di duka ku nga ti yi dukiswako tona nzalama, dona di na dhumisa ditina dangu, se ani ni na di engisa; ni na khani: Mbathu vangu; se dona di na kha dona: Mkoma, Njizimu txangu.

Masalmo 37:24

Mlulami hambi a txi wa, kha weli mphelo, nguko Mkoma a na mñola ngu diwoko e mu wusa.

Masalmo 29:11

Mkoma wa ninga mtamo ngamu yakwe; Mkoma a katekisa ngamu yakwe ngu kudikha.

Vaefesu 3:16

Na kombela ti to ene, madingano ni kupfuna ka wudhumo wakwe, e mi tsanisa timbiluni kwanu, ngu mtamo wa moya wakwe,

2 Makronika 32:8

Ene ani diwoko da nyama, kasi athu hi ni Mkoma Txizimu txathu, awu a hi vhunetelako kulwa tiyimbi tathu. Vathu va to tsaniswa ngu mapswi a Ezekhiya, mfumeli wa va ka Judha.

Zakariya 10:12

Se ani ni na va tsanisa ka Mkoma, kambe va na tsimbila ditinani kwakwe, kuwomba Mkoma.

Isaya 43:5

U nga thave koko, nguko ni ni nawe, ni na wuyisa vanana vako ngu wutxani, ni kusengeleta kukhukhela mswa-ditambo.

Masalmo 46:11

Mkoma wa Mabutho a Tiyimbi ana ni nathu Txizimu txa Jakobe ngu txona i ku wuthavelo wathu!

Isaya 49:8

Mkoma a womba tiya: Ni ku engisile ngu mbimo ya yinene, ni kuvhuni ngu ditshiku da kuhanyiswa, ni na kuxayisa, ni na kumaha txitumelelano ka vathu kasi ku u na wusa ditiko ni kuvaninga kuva tithomba tawe tile ti nga xaselwa;

Masalmo 37:17

Nguko Mkoma wa funyeletela mawoko a vabihi, e tsanisa ava va mahako ta tinene.

Isaya 44:2

Mkoma wu a nga kuvanga, e kuwumba kukhukhela mndani, ni ti to a na kuvhuna, a khene: U nga thave awe Jakobe, txithumi txangu, ni nawe Jesurumi, awe ni nga kusawula.

Masalmo 144:11

Ni txhatxhise u ni thavisa ka manza a vanana va vamatiko, avale sisofu sawe si wombawombako wukanganganyisi avale manza awe a txinene i ku a wubihi.

Masalmo 41:12

Awe u na ni vhuna, nguko ani ni hanya mndani ka ditshuri, u na ni ninga kuhanya yotshe mbimo masoni kwako.

Masalmo 46:7

Mkoma wa Mabutho a Tiyimbi ana ni nathu Txizimu txa Jakobe ngu txona i ku wuthavelo wathu.

Isaya 52:7

Hi nga kutshura ka yona txitimwi ka mimango mikondo ya wu a zivisako mahungu amanene, a wu a huwelelako kudikha, a zivisako wunene, a pfalisako kuhanyisa, a ku khene ka Siyoni: “Txizimu txako txa fuma.”

Genesisi 15:1

Msana ka totshe tiya, dipswi da Mkoma di tile ka Abramu, ngu txiwoniso, di txi kha dona: “U nga thave awe Abramu, ani ngani txitxhavangu txako, hakhelo yako yi na va ya hombe ngutu.”

Masalmo 65:5

Awe wa hi xamula, Txizimu, muhanyisi wathu, ngu mithumo yo xamalisa ya kululama; otshe mafu ma themba awe ni kotshe kuanama ka linene.

Luka 1:30

Se ngelozi yi wombile kwakwe yi txi kha yona: “Mariya, u nga thave, nguko u mani dithomo masoni ka Txizimu;

Masalmo 147:12

Jerusalema, dhumisa Mkoma, Siyoni, dhumisa Txizimu txako.

1 Makronika 12:18

Sekoko Moya wu to wulela ka Amasayi, mthangeli wa va magumi mararu, wu txi kha wona: Athu hi vako, awe Dhavhidha! Kambe hi ni nawe, awe mwana Jese! Kudikha, kudikha ku nave ni nawe! Kudikha ku nave ni vale va ku vhunako! Txizimu txako txa kuvhuna. Se Dhavhidha a to va amukela e va maha vathangeli va mabutho a yimbi.

Luka 1:13

Aniko ngelozi yi m'gete, yi txi kha yona: “U nga thave, Zakariya, mkombelo wako wu engisilwe. Izabheli msikati wako, a na kuvelekela mwanana wa m'zambi, awu u no m'raya ditina da Johani.

Masalmo 99:4

Awe u mfumeli wa mtamo, u randa kululama, ngawe u nga tsanisa asi i ku sa fanelo; u lamula ngu fanelo ni kululama vanana va Jakobe.

Masalmo 144:8

avava sisofu sawe si wombawombako wukanganyisi, ni manza awe a txinene ma xambanyako makuhu.

Hoseya 1:9

Se Mkoma a to khene: Mraye ditina daku i Lo-Ami, nguko anu kha mi nga vathu vangu, nani kha ni na mbi va Txizimu txanu.

Genesisi 31:5

a to ta va gela tiya: “Ni wona ti to tate wanu khaswi a txi ni tsakela kufana ni kale, aniko Txizimu txa tate wangu txi ni nani.”

Genesisi 49:24

Aniko wulaho wakwe wu zumbile wu di tsani, ni misiha ya mawoko akwe yi tsanisilwe, ngu manza a Ndena ya Jakobe (eho i ku M'dyisi ni Dirigwi da Israyeli.)

Eksodha 14:13

Kambe Mosi a to khene ka vathu: “Mi nga thaveni; manekani mi di tsani, nguko nyamsi mi na wona ti Mkoma a no mi hulukisisa tona; nguko Vaegipta vava mi va wonako nyamsi, kha mi na mbiswa mi txi va wona kambe.

Eksodha 20:20

Se Mosi a to khene ka vathu: “Mi nga thaveni. Mkoma a to ta kasi ku ta mi duka, masoni kwanu, kasiku mi txi hambana ni txionho.”

Isaya 50:9

Wonani taku Mkoma Txizimu wa ni vhuna, mlamuli wangu ngu mani kani? Wonani taku votshe va na sakala kufana ni syambalo, se va na dyiwa ngu sumba.

Dhaniyeli 6:16

Sekoko mfumeli a to leleta ti taku kutiswa Dhaniyeli, e rinzwa diphalani ka tingonyamo. Se mfumeli a to womba ka Dhaniyeli, a txi khene: “Txizimu txako, a txi u txi thumelako mbimo yotshe txi na kuhulukisa!”

Dhaniyeli 10:12

Sekoko a to khene kwangu: U nga thave, Dhaniyeli, nguko kukhukhela ditshiku do khata u nga tsanisa mbiluni kwako, kupfisisa ni kutiveka hahatshi masoni ka Txizimu txako, txi engisile kukombela kwako; se ani ni tile ngu mhaka ya mapswi ako.

Hagayi 1:13

Sekoko Hagayi txirumwa txa Mkoma, a to womba-womba ka vathu, mandingano ni mhaka ya Mkoma, a txi khene: Ani ni na ni nanu, kuwomba Mkoma.

Hagayi 2:5

madingano ni dipswi di ni nga pfana ni nanu, mbimo yile mi nga huma ngu Egipta, se Moya wangu wu ti ti zumba hagari kwanu; mi nga thaveni.

Genesisi 26:24

Se Mkoma a to woneka kwakwe ka wona wusiku wule, e m'gela tiya: “Ani ngani Txizimu txa Abrahamu, tate wako; u nga thave txilo, nguko ani nipune ni ni nawe. Ani ni na kukatekisa, ni na andisa liveleko lako, ngu mhaka ya Abrahamu txithumi txangu.”

Valamuli 6:16

Se Mkoma a to mxamula a txi kha ene: “Ani ni na va ni nawe, kambe awe u na va xula Vamidhiyani, ku txi nga u to xula m'thu wammweyo.”

2 Samuwele 22:19

Va to ni mana ngu ditshiku da dikhombo dangu; kambe Mkoma a ti mahile txiseketelo txangu.

Masalmo 18:36

U lulamisile nzila yangu ni mikondo yangu kha ya thidhela.

Masalmo 33:12

Di katekile ditiko dile Txizimu i ku Mkoma wa dona; ni vathu vale txi nga va sawula kuva thomba ya txona.

Isaya 35:4

Gelani va va pandisekako timbiluni, mi txi khanu: Tsanani, mi nga thaveni! Wonani taku Txizimu txanu txi nata, ku ta mi photela, ni txhatxazelo ya Txizimu; txona txi nata, txi ta mi hanyisa.

Isaya 37:6

Se Isaya a to va gela ku khene: Wombani tiya ka nyamne wanu: Mkoma a womba tiya: U nga thave mapswi ale u nga ma pfa, ale si nga ni ruketela ngu ona sithumi sa mfumeli wa Asiriya.

Sidilo 3:57

Ditshiku dile ni nga kudhana, u tshuketile u txi ta khawe: “U nga thave.”

Zakariya 10:6

Se ni na tsanisa nyumba ya ka Judha, ni hanyisa nyumba ya Josefa, ni na tshumela ni va phaya, nguko ni va pfete wusiwana; se va na nga kha ni khali ku va lamba; nguko ani ngani Mkoma, Txizimu txawe, kambe ni na va engisa.