Isaya 40:12 - Bhiblia Yo Sawuleka

¹² I mani a nga pima linene ngu dianza dakwe, awu a nga teka lipimo la nzuma ngu manza akwe, se e sengeleta lithulu la mafu, ka mpimo wokari, ni kupima mimango ni simangwana txikaloni kani?

Isaya 40:12 Referans Kwoze

Mavingu 30:4

I mani a nga nga kwela nzumani, e gwita e txhika kani? I mani a nga nga fumbareta moya ngu manza kani? I mani a nga nga phutela mati amu ka simaha kani? I mani a nga nga veka mihingano ya mafu kani? I mani ditina dakwe, ni ditina da mwanana wakwe, mwendo wa di ziva kani?

Isaya 48:13

Kambe dianza dangu di mahile mafu, ni dianza dangu da txinene di to pima nzuma; ni na si dhana si na woneka ngu mbimo yimweyo.

Mtuletelo 20:11

Ngu msana ni to wona txikhalo txa hombe txa wukoma txo basa ni wule a khalahatshako ka txona. Nzuma ni mafu si tutuma si mu thava, ku si sali txikombiso txa hawa si nga ti kona.

Jobe 28:25

Mbimo yile txi nga ninga mtamo ka moya, se txi teka tipimo ta mati txi veketela;

Jeremiya 31:37

Mkoma a ti khene: Ku txi koteka kupimwa kudemba ka tinzuma, ni kutumbulwa kutshima ka sitshuwa sa mafu, nani ni na lamba yotshe mbewu ya ka Israyeli, ngu totshe ti va nga ti maha, kuwomba Mkoma.

Amosi 4:13

Nguko ngu txona txi bumbaretelako mimango, ni kuvanga moya, txi zivisa m'thu taku ngu ahi maalakanyo a txona, txi mahako ti to mixo yi ve txidema, txi kanda txitimwi ka mafu; Mkoma, Txizimu txa Mabutho a Tiyimbi, ngu dona ditina dakwe.