Isaya 4:5 - Bhiblia Yo Sawuleka

⁵ Txitimwi ka wotshe wuako wa mmango wa Siyoni, ni txitimwi ka msengeletano wakwe, Mkoma a na maha direfu ni mitshikari ngu wutshi, ni dituro da mndilo ni wusiku; nguko txitimwi ka wotshe wudhumo, ku nava ni kutsivelwa.

Isaya 4:5 Referans Kwoze

Nehemiya 9:12

Se u va kombile nzila ni mitshikari ngu direfu, ni wusiku u va kombile nzila ngu phande ya mndilo, kasi kuwoninga nzila yi va no tsimbila ngu yona.

Masalmo 78:14

Ni mitshikari, txi ti va komba nzila ngu direfu se, ni wusiku, txi ti va woninga nzila ngu mndilo.

Isaya 60:1

Wuka, woninga, nguko liwoningo lako lata, ni wudhumo wa Mkoma wa humelela txitimwi kwako.

Isaya 46:13

Na tshuketisa wululamo wangu, kambe kha wu na mbi va kule, ni kuhanyisa kwangu kha ku na mbi swela; aniko ni na veka kuhanyisa kwangu kona Siyoni, ni wudhumo wangu kona Israyeli.

Isaya 33:20

Wona Siyoni, didhoropa da mibuso yathu ya lisima, maso ako ma na wona Jerusalema, dizumbo da kudikha, ditenda di di na kwa mbi thaviswa, adi tiphande ta dona ti a kwa mbi dulwa, ni tighoti ta dona kha ti na mbi bhenuka.

Masalmo 85:9

Kha ditshuri kuhanyisa kwakwe ku hafuhi ka vale va m'thavako ni wudhumo wakwe wu na aka ditikoni kwathu.

Matewu 28:20

mi txi va gondisa kuvekisa totshe tiya ni nga mi leleta tona. Se wonani, ni ni nanu yotshe mbimo, kala kugumani ka mafu.”

Masalmo 89:7

Txizimu njo dingana kuthaviseka, ngutu msengeletanoni ka vasawuleki; txona nja hombe ni kuguletwa ngutu ngu votshe va txi randelako.

Eksodha 14:24

Ngu mbimo ya mixo, Mkoma a to wona ngu mu ka phande ya mndilo ni ya direfu ngu didhawa da wugovelo wa Vaegipta, se e va vinganyisa.

Isaya 37:35

Nguko ani ni na emela didhoropa diya, kasi ku di hulukisa, ngu kuranda kwangu ni kuranda ka txithumi txangu Dhavhidha.

Isaya 32:18

Vathu vangu va na zumba ditikoni ka kudikha, ka tinyumba to tsana ngutu, ni ka makhalo o humula ngu kuthutha,

Masalmo 111:1

Dhumisani Mkoma! Ni na dhumisa Mkoma ngu yotshe mbilu yangu txikungoni ka valulami ni msengeletanoni ka vathu.

Eksodha 26:7

U na maha mijiyo ngu matoya a tiphongo, kasi kumaha txifenengeto txitimwi ka ditenda; digumi da mijiyo ni wumwewo u na va u txi maha.

Eksodha 26:1

Se ditenda u na di maha ngu digumi da mijiyo ya linyu yo hehuka yo lukwa, ni nguwo ya mkuxe, ni ya txiwunguwungu ni yo bhilivila; u na yi maha yi di ni sifananiso sa makerubhima, o tshuriselwa.

Matewu 18:20

Ina, nguko ahawa va nga tshangana vambidi mwendo vararu, ngu ditina dangu, ani ni ho hagari kwawe.”

Eksodha 24:16

Se kuphatima ka Mkoma ku to maneka txitimwi ka mmango wa Sinayi, direfu di to wu fenengeta, mtxhanu wa masiku ni dimwedo; se ngu ditshiku da wutxhanu ni mambidi, Mkoma a to dhana Mosi, a di mndani ka direfu.

Masalmo 105:39

Txizimu txi to nawuluta direfu txi fenengeta va ka Israyeli ni mitshikari txi wuyisa mndilo wa ku va woninga ni wusiku.

Isaya 60:2

Nguko wona taku, txidema txi fenengetile mafu, ni kuphuma ku fenengetile vathu, se Mkoma a na humelela txitimwi kwako, ni wudhumo wakwe wu na woneka txitimwi kwako.