Isaya 4:2 - Bhiblia Yo Sawuleka

² Ka ditshiku dile, Dikhukhu da Mkoma di na tala ngu wudhumo ni kutshura; se mihando ya mafu nja, Vaisrayeli vale va nga sala.

Isaya 4:2 Referans Kwoze

Zakariya 6:12

Se m'gele, u txi khawe: Mkoma wa Mabutho a Tiyimbi, a khene: Ndiyo m'thu wu ditina dakwe i ku Kuthunga; Ene a na mila ka wukhalo wakwe, kambe a na aka dithepele da Mkoma.

Jeremiya 23:5

Se mata masiku, kuwomba Mkoma, aawa ni no wusela ka ona Dhavhidha dikhukhu do lulama. A nava mfumeli wa txitshurwa, a na humelela, ene a na lamula ngu mlayo ni wululamo, ha ditikoni.

Zakariya 3:8

Engisa koko, awe Joxuwa, mphaxeli wa hombe, awe ni vangana vako, vale va nga khalahatsha masoni kwako, nguko mbavamna va mapimo amanene; wona taku ni na tisa txithumi txangu, atxi i ku kuthunga.

Isaya 27:6

Ma nata masiku ale Jakobe a no mila mitwi, se Israyeli a na veka siluva e mila, kambe va na tata mafu ngu mihando.

Joyeli 2:32

Se ku na maheka taku, votshe vale va no khumbuka ditina da Mkoma, va na hanyiswa; nguko mmangoni ka Siyoni ni Jerusalema ku na veho kuthuseka, madingano ni ti a khalako kuwomba Mkoma, ni ka vamwani ava Mkoma a no va dhana.

Jeremiya 33:15

Keyo masiku ni ka yoneyo mbimo ni na wusela Dhavhidha mpuka wo lulama; ene a na lamula ngu nongameto ni wululamo amu ditikoni.

2 Vakorinto 4:6

Txizimu txi txi nga womba ti to ku na tumbuluke liwoningo mu ka txidema, ngu txona txi nga woninga timbilu tathu, kasiku nanathu hi txi woninga vathu ngu wuzivi wa kuphatima ka Txizimu, aku ku wonekako ka Kristu.

Obhadhiya 1:17

Kambe mmangoni ka Siyoni ku nava ni vahuluki, se mmango wu na va wo sawuleka; va nyumba ya ka Jakobe va na teka tithomba tawe.

Jeremiya 44:14

Aha kaku kha ku na mbi huluka ni wammweyo e maneka didhawa e sala wa ka Judha a nga wulelela ditikoni ka Egipta, kuya luvela, kasi kuteka ditiko da ka Judha, adi a nga txi navelwa kutshumela eya zumba ka dona; kha va na mbi tshumela, hahanze ka vale va nga huluka.

Isaya 60:21

Se votshe vathu va kakwanu va na va vo lulama, mafu ma nava thomba yawe yotshe mbimo; va na va makhukhu o thungiswa ngu ngani, mthumo wa manza angu, kasi ku ani ni dhumiswa.

Isaya 53:2

Nguko a humile masoni ka Mkoma nga txiluva, e fana ni m'twi ka mafu a kuoma; asi nga ni wuwono ni kutshura ka hombe; se mbimo yi athu hi nga muwona, kha ha wona kutshura ni kakumweko, kasi ku hi txi mnavela.

Masalmo 72:16

Ditiko di na talelwe ngu kupfuna ka fulaho, ayi yi zinginikelako txitimwi ka situnga, yi veleka mihando kufana ni Libhanoni ava va nga aka madhoropani va na rumbuka kufana ni mwasi wu nga mila ha mafuni!

2 Pedro 1:16

Nguko, ku mi gondisa kwathu timhaka ta mtamo ni kuta ka Mkoma wathu Jesu Kristu, kha ta khukhela ka mabhulo o sikwa ngu wutxhari wa m'thu, aniko hi mi gondisile ngu ku hi nga wona wuhombe wakwe ngu maso athu mapune.

Johani 1:14

Dipswi di ti mahile m'thu, e aka hagari kwathu; hi wu woni wudhumo wakwe, wudhumo wu Tate a nga ninga Mwanana wakwe wa Mmweyo ekha, wo tala ngu makatekwa ni ditshuri.

Luka 21:36

Khutalani na mi txi khongela txotshe txikhati, kasiku mi va ni mtamo wa kuhuluka ka totshe ti ti no humelela, ni kuema mi di tsani masoni ka Mwanana wa M'thu.”

Matewu 24:22

Se idiku ma sa komiswa masiku ale, kuwalo ni txivangwa tximwetxo txi ndino sikota kuhuluka. Aniko, ngu mhaka ya vasawuleki, masiku ale ma na komiswa.”

Zakariya 9:17

Nguko nga tona ti wu nga kulisa tona wunene wawe! Ni ti va nga tshurisa tona! Se fulaho yi na tshurisa majaha, ni vhinya ya yiphwa yi na tshurisa mahorana.

Joyeli 3:18

Se ku na maheka taku ka ditshiku dile, mimango yi na vhelisa vhinya ya yiphya, simangwanani ku na khulunga masi, yotshe minambo ya ka Judha yi na va yi di tate ngu mati; se ku na huma txisima ngu Nyumbani ka Mkoma txi theletela mkovani ka Sitime.

Ezekhiyele 7:16

Kambe ku no huluka vonevo va no huluka, aniko va na va mimangoni, nga situvani sa mikovani, va txi dila, mmweyo ni mmweyo ngu mhaka ya wubihi wakwe.

Jeremiya 44:28

Se avale va no huluka ditxhari va na khukha ngu ditikoni ka Egipta va txiya ditikoni ka Judha, na i ti vadotho ngu mtengo; se yotshe misalela ya ka Judha yile yi nga wulela ditikoni ka Egipta, kuya luvela kona, yi na tiziva taku ngu kuhi kuwomba ku nga tatiseka, ngwangu mwendo ngwawe.

Isaya 45:8

Anu tizuma nisani mwando, ni marefu ma na nise kululama; ma na tuleke mafu, se kuhuma kuhanyisa, kululama ku na ninge mihando kumweko; ani Mkoma, ni si vangile.

Isaya 30:23

Sekoko a na nisa mati txitimwi ka mbweu yi u no phaya mafuni; kumweko ni dipawu dadiphya da mafuni; mafu ma na nona me pfuna; ka ditshiku dile, sifuyo sako si nadya ka makhalo o anama a wudyiselo.

Isaya 11:4

kambe a na lamula sisiwana ngu kululama, ni timhaka ta vale vo thutha ha mafuni, a na wila ngu kululama, a na peka mafu ngu donga ya txisofu txakwe, e fuvisa vabihi ngu kufuteta ka txisofu txakwe.

Masalmo 67:6

Sekoko mafu ma humisa mihando ya ona; kambe Txizimu, Txizimu txathu, txa hi katekisa!

Eksodha 28:2

Se mwananu Aroni u na mmahela syambalo so sawuleka, so komba wudhundo ni kutshura.

Isaya 26:1

Ka ditshiku dile, ku na embelelwa ndando ditikoni ka Judha: Hi ni didhoropa do tsana, adi Txizimu txi nga veka ka dona kuhuluka ngu maguma ni tibhingo.

Isaya 60:15

Na i si nga kutxhipiswa ni kunyenywa kule u nga mahelwa kona, kuhoka ha ko ni wammweyo asi pindi ngu kwako, ni na veka kwako kudhundeka ka kwa mbi gwita, kuzumbiseka ka liveleko ni liveleko.

Isaya 61:11

Nguko nga kule mafu ma humisako makhukhu a ona, ni ku nga themmbwe yi milisako sile si phaywako ka yona, ngu tona eto Mkoma Txizimu, a na milisa kululama, ni wudhumo ka otshe matiko.

Ezekhiyele 34:29

Se ni na ti wusela siyalo sa lisima, kha ti na mbiswa kambe ti hetwa ngu nzala ha mafuni, kambe kha ti na mbi va txiruko ka vamatiko.

Ezekhiyele 36:8

Aniko anu mimango ya ka Israyeli, mi na humisa madhavi, mi txi ninga mihando ka vathu vangu va ka Israyeli; nguko va hafuhi ni kuwuya.

Malakiya 3:17

Se vona va na va vangu, kuwomba Mkoma wa Mabutho a Tiyimbi, ka dona ditshiku dile ni no maha mthumo wangu, va na va thomba yangu; ni na va divalela, ku nga m'veleki wu a divalelako mwanana wakwe, wu a thumelako.