Isaya 37:2 - Bhiblia Yo Sawuleka

² Se mfumeli a to rumela Eliyakimu, mxayisi wa nyumba ya wukoma, Sebhina, mabhalani, ni madhota a vaphaxeli, va di fengete masaka a tikoni, ka Isaya, mwana Amosi, mprofeti.

Isaya 37:2 Referans Kwoze

Isaya 1:1

Txiwoniso txa Isaya, txile a nga txi wona mwana Amosi, awule a nga wu wona madingano ni Judha ni Jerusalema, ka masiku a Uziya, Jothamu, Akazi, ni Ezekhiya, vafumeli va ka Judha.

Joyeli 1:13

Ti khutareleni mi ti dilela anu vaphaxeli; kumani anu vathumeli va txiluvelo; wulelani mi pinda mi di ambate masaka, ni wusiku anu, vathumeli va Txizimu txangu; nguko miningelo ya sakudya ni sa kusela si nga wilwa, nza nyumbani ka Txizimu txanu.

Isaya 37:14

Mbimo yile koko Ezekhiya a nga amukela mapapilo, ngu manzani ka mitumi, e ma gonda, a to kwelela eya Nyumbani ka Mkoma; se Ezekhiya a to ya ateta mapapilo masoni ka Mkoma.

Isaya 36:3

Sekoko a to hingetwa ngu Eliyakimu, mwana Hilikiya, mxayisi wa tithomba, ni Sebhina, mabhalani, ni Jowa, mwana Asafe, didhota da mfumeli.

2 Makronika 20:20

Se magwanani ka kona, va to wuka ni mixo veya txiwulani ka Tekowa; Mbimo yi va nga ti ti tsula, Josafati a to va ngela ku khene: Ni engiseni anu va ka Judha, ni nanu vazumbi va Jerusalema: Thembani Mkoma Txizimu txanu kasi ku mi na tsana; thembani vaprofeti vakwe mi na xula.

2 Vafumeli 19:2

Sekoko a to rumela Eliyakimu, mthangeli wa nyumba ya wukoma, ni mabhalani i ku Sebhina, ni madhota a vaphaxeli va di fenengete masaka, ka mprofeti Isaya, mwana Amosi.

2 Vafumeli 18:18

Se va ti dhanile mfumeli, ku to humelela masoni kwawe Eliyakimu, mwana Hilikiya, mthangeli wa nyumba ya wukoma, ni mabhalani wa kona Sebhina, ni Jowa mwana Asafe, didhota da mfumeli.

Isaya 20:2

Mkoma a to womba-womba ka mbimo yoneyo, ngu txisofu txa Isaya, mwana Amoni, a txi khene: Tsula u ya txhatxha syambalo sa mkhwasi txiwununi kwako, u thavisa tikathula mikondoni kwako. A to maha toneto, e tsimbila-tsimbila i di tximbwiri, na asi nga ni tikathula.

Isaya 22:15

Mkoma, Txizimu txa Mabutho a Tiyimbi, a khene: Tsula u ya wonana ni Sebhina, mxayisi wa timale, mxayisi wa tithomba, u txi m'gela ku khawe:

Isaya 22:20

Se ka dona ditshiku dile ku na maheka ti to ni dhana txithumi txangu Eliyakimu, mwana Hilikiya.

Isaya 37:21

Sekoko Isaya, mwana Amosi, a to rumela kuya womba ka mfumeli Ezekhiya, a txi khene: Mkoma, Txizimu txa ka Israyeli, a khene: Ka tile u nga ni kombela ngu mhaka ya Senakeribhe, mfumeli wa Asiriya,

Isaya 38:1

Ka masiku ale, Ezekhiya a lwate ngu malwati o daya; se a tota kwakwe Isaya, mwana Amosi, mprofeti, a txi ta khene kwakwe: Mkoma a khene: Lulamisela nyumba yako, nguko u nafa, khu na mbi hanya.

Esteri 4:1

Mbimo yile Mordhekayi a nga ziva totshe tile ti ngadi mahekile, a to vharulela syambalo sakwe, se e ambala syambalo sa masaka ni ku ti theletela dikhuma, kambe a to huma eya hagari ka didhoropa, a txi peka huwa, e dila ngu txiviti;

Isaya 22:12

Se Mkoma, Mkoma wa Mabutho a Tiyimbi, a na mi dhana ka ditshiku dile, kuya dila, ni kuya peka huwa, ni ku kuyula misungo, ni ka muambalisi wa masaka.