Isaya 34:16 - Bhiblia Yo Sawuleka

¹⁶ Lavani mu ka dibhuku da Mkoma, mi gonda: Kha txi ngaho ni txa tximwetxo txi no tandeka, kha ku na mbi pwateka ni txa tximwetxo hambi tximwani; nguko txisofu txakwe txipune txi leletile, kambe moya wakwe wupune wu na si sengela.

Isaya 34:16 Referans Kwoze

Masalmo 33:9

Nguko a to womba, se sotshe si maheka; a to ruma, se sotshe si humelela.

Joxuwa 1:8

Dibhuku diya da mlayo u nga thuke u txi hambana nado; aniko zumba u txi di alakanya wusiku ni mitshikari, kasi ku u txi khutalela kuxayisa totshe ti ti nga bhalwa ka dona, nguko di kumaha u humelela ka totshe tinzila tako, se u tsimbila kha kwati.

Matewu 5:18

Nguko kha ditshuri na mi gela ku khani: Ku na za ku txi pinda nzuma ni mafu, na txima ku sa pfhutwa ni m'bhalo wawumwewo hambi ni txisesana txidotho txa Mlayo kala totshe ti txi tatiseka!

Masalmo 33:6

Ngu dipswi da Mkoma; ku vangilwe nzuma ni sotshe sasingi sikuho ngu moya wa txisofu txakwe.

Isaya 30:8

Tsula koko konkuwa, u txi ya bhala tiya aha ka dipulango, masoni kwawe, kambe ti bhale amu ka dibhuku; kasi ku ti zumba ti di bhatwe, ka mbimo yitako, ngu ha ku si gwitiko, kala kupinduka.

Johani 10:35

Amu ka Mlayo va dhanwa ku i sizimu ava dipswi da Txizimu di nga rumelwa kwawe; se awalo wu a sikotako kufuvisa Mibhalo.

Mavingu 23:12

Ningetetela mbilu yako kulaywani, ni tinzeve tako ka mapswi a wuzivi.

Luka 21:33

Nzuma ni mafu si na pinda, aniko mapswi angu kha ma na mbi pinda.”

Malakiya 3:16

Sekoko avale va thavako Mkoma, mmwani ni mmwani wa womba-womba ni mkwawe; se Mkoma wa riya nzeve a txi engisela; mwendo kubhatwe dibhuku da syalakanyiso masoni kwakwe, di lumbako vale va thavako Mkoma, ni vale va alakanyako ditina dakwe.

Amosi 3:7

Ngu ditshuri, Mkoma Txizimu, a na mbi maha txilo na a sa kombisa txihunga txakwe ka sithumi sakwe, vaprofeti.

Dhaniyeli 10:21

Aniko ni na kugela ti ti nga bhalwa dibhukuni ka ditshuri; kha ku na wu a ni vhunako kulwa ni vale, hahanze ka Migeli mthangeli wanu.

Isaya 58:14

sekoko, u na tsaka ka Mkoma, kambe ni na ku maha u guleka txitimwi ka mafu, ni ku kutsanisa ngu thomba ya tate wako Jakobe; nguko txisofu txa Mkoma txi wombile.

2 Pedro 1:19

Se kambe, hi ngadi ni dipswi do tsana ngutu da vaprofeti, adi mi mahako ta tinene ngu ku di engisa, nga liwoningo li phatimako ha wukhaloni ka txidema, kala mbimo yi ditambo di nota woninga ni nyezi yi yi nota humelela timbiluni kwanu.

Isaya 1:20

Aniko ngako mi txi ni tshuralela mi si ni engisi, mi na guma ngu ditxhari, nguko txisofu txa Mkoma txi wombile.

Genesisi 6:17

Nguko ni na wuyisa ndambi ya mati ha ditikoni, a ha ku no tala, ku na fuviswa hahatshi ka nzuma sotshe sivangwa si si hanyako, asi si ku ni muhefemulo wa wutomi. Sotshe si si kuho mafuni, si na fuva.

Johani 5:39

Anu mi wonisisa Mibhalo ngu kualakanya tito, mi na mana wutomi wo mbi guma ka yona, kasi ngu yona yi ni fakazelako.

Dhewuteronome 31:21

Ngu mhaka yeto, ngako makhombo amangi ni sikarato, si txi va tela txitimwi kwawe, ndando yiya yi na maha fakazi, nguko kha yi na mbi divalwa sisofuni ka liveleko lawe; nguko ani na yi ziva mialakanyo yawe, ayile va ku nayo nyamsi.

Isaya 14:31

Peka huwa awe txike; kwangula, awe didhoropa; nyunguluka awe ditiko dotshe da Vafilista; nguko ku na huma wutshi ngu Wutxani, ka mbimo ya kona kha ku na mbiva ni wammweyo wo sala ekha.

Isaya 40:5

Se wudhumo wa Mkoma wu na wonekiswa, kambe yotshe nyama yi na ti wona tito, txisofu txa Mkoma txi wombile tiya.

Isaya 40:26

Gulani maso mi wona txitimwi, mi wona taku i mani a nga vanga sona siya. I mani a nga ti vangela so talisa tiya, i mani asi dhanako sotshe ngu matina a sona; ngu mhaka ya wuhombe wa mtamo wakwe, ni kutsana ka mtamo wakwe, kha ku na mbi pwateka ni txa tximwetxo.

Isaya 21:17

Se mtengo wule wu no sala wa vafuli, tindena ta vanana va ka Kedhari, wu na hungulwa, nguko a wombisile eto Mkoma, Txizimu txa ka Israyeli.

Zakariya 4:6

Se a to xamula a txi khene kwangu: Adiya dipswi da Mkoma ka Zorobhabheli, do khene: Hi nga ngu mtamo, hambi ngu yimbi, aniko ngu moya wangu, kuwomba Mkoma wa Mabutho a Tiyimbi.