Isaya 33:1 - Bhiblia Yo Sawuleka

¹ Dikhombo kwako u handako na u sa handwa, awe u kanganyisako vale, va nga mbi kukanganyisa! Mbimo yi u no heta kuhanda, u na handwa; u txi na heta kukanganyisa, u na kanganyiswa nawe.

Isaya 33:1 Referans Kwoze

Matewu 7:2

Nguko mi na lamulwa nga ti mi lamulisako tona vamwani; ni mpimo wu mi pimako ngu wona vamwani, mi na pimwa ngu wona nanu.

Isaya 24:16

Kukhukhela magwito ka mafu, hi pfite kuembelala, kaku: Wudhumo ka wule wo lulama; aniko ani ni khani: Na goma, na goma, dikhombo kwangu! Vakanganyisi va kanganyisa, ina, vakanganyisi va kanganyisa.

Mtuletelo 17:17

Nguko Txizimu txi si ningile mbilu ya kumaha makungo a txona, ngu mapimo mamwani: Kuningela wukoma wa digelegele ka txikalani, kala kuza mapswi a Txizimu me hetiseka.

Isaya 21:2

Ni wonisilwe txiwoniso txo thisa: Mkanganyisi wa kanganyisa, ni mxaseli wa xasela. Kwelela awe Elamu, randela awe Medhi; ni malatile miketo yawe yotshe.

Isaya 10:12

Ngu kumaha keto, mbimo yile Mkoma a no heta wotshe mthumo wakwe mmangoni ka Siyoni, kona Jerusalema, sekoko ni na tsayisa mihando ya mfumeli wa Asiriya, ngu mhaka ya kutikulisa ka mbilu yakwe, ni kutiguleta masoni kwakwe.

Mtuletelo 13:10

Awu a nga sikelwa ku khotelwani, a na ya ku khotelwani; awu a nga sikelwa kudawa ngu ditxhari, a na fa ngu dona ditxhari. Atiya ngu tona ti tsanisako kuhonisela ni kukholwa ka vasawuleki.

Isaya 17:14

Ni wusiku, wona taku ku ni kuthava, kambe di si se txa, kha va na mbi vaho. Atxiya njyavelo txa vale va hi handako, ni thomba ya vale va hi hoxotako.

Valamuli 1:7

Sekoko, Adhoni-Bhezeki a to khene: Mtxhanu wa magumi ni mambidi a vafumeli, va nga ti wiletwe titiho ta vanyagotwe, ta manzani ni ta mikondoni, va ti ti rolela maruru hahatshi ka meza yangu; ngu kumaha keto, Txizimu txi ni tshumetete madingano ni ti ni nga va mahela. Se va to tsula nayo Jerusalema, eyo a nga ya fela kona.

Mtuletelo 16:6

Nguko avava ngako va nga theketa mnoha wa vasawuleki ni vaprofeti, na nawe u va ningile mnoha ve sela. Va ni fanelo yeto.

Valamuli 9:23

Txizimu txi to rumela moya wo biha hagari ka Abhimeleki ni ka vathu va Sikemi, se vathu va Sikemi va to wukela Abhimeleki;

Isaya 14:25

Ni na khundumusa Asiriya amu ditikoni kwangu, ni mkandetela ngu mikondo amu ka mimango yangu, kasi ku dikange dakwe di na maneka kule navo, ni mrwalo wakwe wu na habukiswa ha makata kwawe.

Isaya 31:8

Se Asiriya a na wiswa ngu ditxhari, na i si nga ngu m'thu; ditxhari di di si lumbiko m'thu di na mlovisa, kambe a na tutuma masoni ka ditxhari, ni mazambi akwe ma na xulwa.

Isaya 48:8

Hambi awe khwa tipfa, hambi ku tiziva, ni ka kudotho kukhukhela kale kha ya tulwa nzeve yako, nguko ani ni txi tiziva taku, khu na kuthembeka, ni ti to u txi ndaka-milayo kukhukhela mndani ka mame wako.

Ezekhiyele 39:10

Kambe kha va na mbi tisa tikhuni ngu txitingani, hambi kuganga txipoponi, aniko va na turisa mndilo ngu matxhari; va na pa ka vale va nga va pela, ni kuhanda ka vale va nga va handa. Kuwomba Mkoma Txizimu.

Mavingu 22:23

Nguko Mkoma a na emela mhaka ya mxaniseki kulamulwani, kambe a na thavisa wutomi wa vale va va pelako.

Zefaniya 3:19

Wona ti taku, ka yona yile mbimo, ni na wukela votshe vale va kuxanisako, ni hanyisa vale va khwitako, se ni wuyisela avale va nga tutumiswa; kambe ni na va ninga kudhundeka ni wudhumo, ka otshe matiko ale va nga thelwa tingana ka ona.