Isaya 30:10 - Bhiblia Yo Sawuleka

¹⁰ Va ku kha vona ka tiñanga: Mi nga ti woneni; ni ka vaprofeti va txi kha vona: Mi nga profeteni kwathu ti i ku to lulama; hi geleni ti to tsakisa, kambe mi dingana ku hi guleta;

Isaya 30:10 Referans Kwoze

Varoma 16:18

Nguko ava vo ngeto kha va thumeli Mkoma wathu Jesu Kristu, kambe va thumela masusu awe dwe; va hambukisa timbilu ta va vo divala ngu mapswi o tshamba ni kukanganyisa.

Amosi 7:13

Kambe a ha Bheteli, kukhukhela kuwa kala kupinduka, khu na mbi ngadi u profeta kambe, nguko wukhalo wo sawuleka wa mfumeli ni nyumba ya mfumo.

Amosi 2:12

Aniko anu, Vanazira mi va ningile vhinya ve sela, vaprofeti mi ruma mi txi khanu: Mi nga profeteni.

Jeremiya 11:21

Ngu konaho, Mkoma a womba tiya ngu vathu va Anatote, ava va lavako ku kudaya, va txi kha vona: U nga profete ditinani ka Mkoma, kasi u si feli manzani kwathu!

Mtuletelo 11:7

Mbimo yi ti no heta kufakaza ka tona, txikalani txi txi humako ngu diphalani ko hokoma txi na lwa nato, txi ti xula, txi ti daya.

Jeremiya 23:17

Va txhumayela va di ka so vavalu ka va va ni kanyisako, va txi kha vona: Mkoma a khene: Mi na zumbiseka kha kwati. Ni ka votshe va tsimbilako ngu kubanga ka timbilu tawe, va txi kha vona: Kha di na mbi ta dikhombo txitimwi kwathu.

Mika 2:11

Ku txo maneka wokari wa zumbelo ya walo, e hemba a txi khene: Ani ni na ku profetela ngu vhinya ni wusuke wa mtamo; eyo a na va mprofeti wa vathu vava.

Mika 2:6

Mi nga profeteni; ava va profetako, va nga profete ngu mahelo yiya, nguko ku nga humelela tingana.

1 Vafumeli 22:27

se mi na khanu: Mfumeli a khene: Wuletani wamwamna wuwa mkorani, mi txi mninga sakudya so mbi tshamba, ni mati o bava, kala kuza ni txi wuya ngu kuthutha.

1 Vafumeli 21:20

Se Akabe a to khene ka Elija: Se u ni mani awe mlala wangu kani? Se Elija a to khene: Ni ku mani; nguko se u ti xavisile, ngu kumaha to biha masoni ka Mkoma.

Vagalatiya 4:16

Se konkuwa ni phindukile ni txi maha mlala kwanu, nguko ni nga mi gela ditshuri kani?

Mithumo 5:28

“Hi mi tsimbile ngu mthetho wa kupfala, ti to mi si gondisi ngu ditinedo. Aniko anu mi tatile Jerusalema ngu kugondisa kwanu; mi lava ti to mnoha wa m'thu wuwa wu txi thekelela txitimwi kwathu.”

Mithumo 4:17

Kambe kufela ku timhaka tiya ti si thuki ti ya masoni ngu kuhangalaka hagari ka vathu, he va layeni ni ku va dhukisa, ti to va si nga ngadi ve gondisa m'thu, wuhi ni wuhi, ngu ditinedo.”

Johani 8:45

Aniko ani, ngu kuwa ni wombako ditshuri, kha mi kholwi kwangu.

Johani 7:7

Ditiko kha di na ku mi vengela, kambe ani da ni vengela, nguko na fakaza ti to mithumo ya dona yi bihile.

Jeremiya 38:4

Sekoko vathangeli va to gela mfumeli va txi kha vona: Awuwa m'thu a na dawe, nguko wa rera mawoko a tindena ti ti nga sala ka diya didhoropa, ni mawoko a votshe vathu ngu ku va gela timhaka to nga tiya; m'thu wuwa kha xuveli wunene amu ka ditiko diya, aniko a di xuvela makhombo.

Jeremiya 29:27

Ngu kutxani u nga mbi kawuka Jeremiya wa niya Anatote, awu a profetako hagari kwanu?

Jeremiya 26:11

Vaphaxeli ni vaprofeti va to gela tinduna ni vathu votshe, va txi kha vona: Awuwa m'thu a fanetwe ngu kufa, nguko a profetile e wukela didhoropa diya, nga ha mi nga tipfa ngu tinzeve tanu.

Jeremiya 5:31

Vaprofeti va profeta makuhu, hambi vaphaxeli va fumela va txi laywa ngu vona; ngu toneto vathu vangu va ti lavako. Aniko mi na maha txani magwito ka kona kani?

2 Makronika 25:16

Se ku to maheka taku, mbimo yile a nga txi womba-womba nayo, a to mxamula a txi khene: Va kuvekile kuva didhota da mfumeli kani? Malala, u lava kudawelwa txani kani? Sekoko mprofeti a to khukha a txi khene: Na ti wona ti to Txizimu txi navete ku kulovisa ngu mhaka ya timhaka tiya u nga timaha; khwa engisa dipswi dangu.

2 Makronika 16:10

Se Asa a to kwatela m'huti e mu rinza ka txigodho. Ati ti henyile ngutu ngu mhaka eyo. A to xanisa vathu vamwani ka mbimo yoneyo.

2 Timoti 4:3

Nguko yi nata mbimo yi vathu va no mbi dhunda kuengisa gondo ya yinene, aniko, madingano ni mixuvo yawe ni kulava kutsakisa tinzeve tawe, ti nyakatelwako, va na ti lavela mtengo wa vagondisi.

2 Timoti 4:4

Vona va na hambukisa tinzeve tawe ka ditshuri, se va na rendekela mabhulo awalo.

1 Samuwele 9:9

(Kale ditikoni ka Israyeli, ngako va txi ya wotisa ka Txizimu, va ti ti kha vona: Ngonani, hi tsimbile ka m'huti; nguko ka mprofeti wa nyamsi kale a ti dhanwa ku m'huti.)

Isaya 5:20

Dikhombo ka vale va ku kha vona to biha ndinene, se ta tinene va txi ndo biha! Va tekako txidema ve txi maha kuwonekela, ni kuwonekela ve kumaha txidema, so bava ve si maha so lombela, se so lombela ve si maha so bava!

Isaya 29:10

Nguko Mkoma a mi thete moya wa wukohe wa hombe, kambe a tsivile maso anu, i ku vaprofeti, a fenengetile vathangeli vanu, i ku vahuti.

Jeremiya 36:29

U na gela Jehoyakimu mfumeli wa ka Judha, u txi: Mkoma a khene: Awe u hisile dibhuku diya, u txi: Ngu kutxani u nga bhala ka dona ti taku mfumeli wa Bhabhilona a nata hasamula ditiko diya, a txi heta vathu ni sihari kani?

Jobe 41:3

Ina mwendo yi nga dilela kwako kani? Mwendo yi nga kukombela ku yi tsetsa kani?

Isaya 28:15

Nguko mi khanu: Hi mahile txitumelelano ni lifo, hi mahile txitumelelano ni wukhalo wa vafi; mbimo yi ku no pinda ndambi ya txitsayiso, kha yi na mbi hi hokela, nguko hi tekile makuhu hi ma maha wuthavelo wathu, se hi baramile hahatshi ka wukanganyisi.