Isaya 3:26 - Bhiblia Yo Sawuleka

²⁶ Se sike sa didhoropa si na va kupandisekani ni kudilani; ene a na handwa e khalahatshi hahatshi.

Isaya 3:26 Referans Kwoze

Sidilo 2:10

Sekoko madhota a dihorana da Siyoni ma khalahatshile ha ka mafu, ma txi dwe; me ti theletela lithulu ha misungo ma txi ambala masaka; votuma va Jerusalema va namisile misungo ha mafuni.

Jeremiya 14:2

Judha wa dila, miti yakwe yi gumile mtamo, va khalahatsha na va di ambate mizila; Huwa ya pfala ngu Jerusalema.

Sidilo 1:4

Tinzila ta Siyoni ta dila nguko kha nga ho wu a tako ha msengeletanoni ka habanza; sike sakwe sotshe si savatisilwe vaphaxeli vakwe vatilaya; votuma vakwe va pandisekile, ni nene apune a ni kupandiseka.

Jobe 2:13

Se va to khalahatsha nayo ha ka mafu, mtxhanu wa masiku ni mambidi ni mtxhanu wa wusiku ni wumbidi; ku si maneki ni wammweyo wo womba dipswi ni da dimwedo, nguko va woni taku kupandiseka i ti ti ka hombe ngutu.

Luka 19:44

“Va na kudikha hahatshi, awe ni vanana vako, va ku kwako. Kambe kha va na mbi siya kwako dirigwi txitimwi ka dirigwi, nguko khwa ziva mbimo yi u nga endelwa ngu yona.”

Ezekhiyele 26:16

Se vathangeli va lineneni va na txhika ngu situluni kwawe ka wukoma, kambe va na thavisa sifenengelo sawe, ve ambula simaha sawe so lukelwa; va na ambekwa kudhudhumela, va khalahatsha ha mafuni, va txi dhudhumela yotshe mbimo; kambe ngu mhaka yako, va na xamala.

Jobe 2:8

Se Jobe a to teka txirengele e halela ngu txona silonda, e khalahatsha hagari ka dikhuma.

Isaya 47:1

Txhika u khalahatsha ha lithuluni, awe wotuma, mwanana wa muhorana wa Bhabhilona; khalahatsha hahatshi; kha ku ngadi ni txitulu txa wukoma, awe mwanana wa muhorana wa Vakaldheya, nguko khu na mbiswa u dhanwa ku umnene, niku u tshurile.

Matewu 11:17

‘Hi mi vetete misengele, aniko kha ma sinya; hi embelete tindando ta masaluko, aniko kha ma dila.’ ”

Isaya 6:11

Sekoko ani ni to khani: Kala yihi mbimo kani Mkoma? A to xamula a txi khene: Kala kuza madhoropa me maha marumbi, kupwateka ni vaaki, ni tinyumba ti si nga ni vathu, ni ditiko dotshe di maha dirumbi.

Isaya 14:31

Peka huwa awe txike; kwangula, awe didhoropa; nyunguluka awe ditiko dotshe da Vafilista; nguko ku na huma wutshi ngu Wutxani, ka mbimo ya kona kha ku na mbiva ni wammweyo wo sala ekha.

Isaya 29:2

Hambi keto, ni na veka Ariyeli kuxanisekani, se ku nava ni kudila ni kupandiseka; kambe dona di na va didhoropa dangu kufana ni Ariyeli.

Isaya 33:9

Ditiko da kuma ni kupeka huwa, Libhanoni a ni tingana, a wunile, Xaroni a hindukile e fana ni txiwula, Bhasani ni Karmeli va zuzilwe.

Jeremiya 15:8

Tinoni tawe ti engetekelani kupinda mtxhefa wa linene. Ni nehile mlovisi wu a dayako vamame va mazambi ni mitshikari. Ngu txidhukisa ni rumete txitimwi kwawe kuxaniseka ni kuthava.

Sidilo 1:1

Hi nga wonani txiwunda txa didhoropa dileya, adiya kale di nga ti ti ni vathu votala! Se konkuwa di hundukile nga noni adi i nga ti da hombe hagari ka matiko; ni mfumeli wa txisikati ka sidhoropana, di hundukile di txi maha m'dihi wa resa.

Sidilo 2:8

Mkoma a ni txikungo txo hoxota diguma da muhorana wa Siyoni; a txi ganyatela asi divaleli a mahile ti to ku va ni dikhodho nguko ku fayetetwe diguma ni lithango se ve maneka va si tsana.

Ezekhiyele 12:20

Kambe madhoropa ma ku ni vathu ma na fuviswa, se mafu ma na maha sisapa; se mi na tiziva taku ani ngani Mkoma.

Mika 1:9

Nguko txilonda txako kha txi holiswi, nguko txi hokile kala ka Judha; txi endelekile kala ha txikeni ka vathu vangu, kona Jerusalema.

Isaya 32:14

Nguko nyumba ya wukoma yi na sala yokha, diguwa da didhoropa di na guma; mimango ni sitezi sa vawoneleti si na maha tiphako ka yotshe mbimo, emo timangwa ti no tutuma-tutuma kona, ku txi maha lihawu la sifuyo.