Isaya 26:8 - Bhiblia Yo Sawuleka

⁸ Nzilani ka wulamuli wako Mkoma, ha kuverela; ditinani kwako ni mapimoni kwako, kuho kualakanya ka mihefemulo yathu.

Isaya 26:8 Referans Kwoze

Isaya 33:2

Mkoma hi mahele wumbilu! Hi verete; u nave awe mtamo wathu ditshiku ni ditshiku, kambe uva m'hulukisi wathu, ka mbimo ya kuxaniseka.

Masalmo 65:6

Awe wa tsanisa mimango ngu wukoma wako ni mtamo wako.

Eksodha 3:15

Se Txizimu txi to kha txona ka Mosi: “U na ya womba ka vanana va ka Israyeli u txi khawe: Mkoma Txizimu txa vatate vanu, Txizimu txa Abrahamu, Txizimu txa Isaake ni Txizimu txa Jakobe txi ni rumile kwanu. Adiya nditina dangu ngu hawa ku si gwitiko, di na va txialakanyiso txangu ka liveleko ni liveleko.”

2 Vatesalonika 3:5

Mkoma a na tsimbitise timbilu tanu a txi ti yisa ka lirando la Txizimu, ni kutimiselani ka Kristu.

Varoma 8:25

Ngako hi txi verela atxi hi si txi woniko, hi txi verela ngu kutimisela.

Mithumo 1:4

Hagari ka kuva a di khalahatshile navo ha sakudyani, a to va gela, a txi khene: “Mi nga khukheni muwa Jerusalema, aniko verelani Txithembiso txa Tate, i ku wule ni khalako ni txi womba-womba ngu ngene.

Isaya 56:1

Mkoma a womba tiya: “Xayisani wulamulo, mi maha kululama, nguko kuhanyisa kwangu ku hafuhi ni kuta, ni kululama kwangu ku na ti wonekiswa.”

Isaya 25:9

Se ka ditshiku donedo, va na kha vona: Wonani Txizimu txathu, hi nga ti txi verela, txi na hi hulukisa; awuwa ngene Mkoma, wule hi nga txi m'verela; hi na m'guleta ni kutsaka, kuhanyisani kwakwe.

Isaya 12:4

Se ka ditshiku donedo, mi na khanu: Bongani Mkoma, mi pfalisa ditina dakwe, gelani vathu simaho sakwe, embelelani ti to ditina dakwe di txitimwi ngutu.

Ndando ya Tindando 5:8

Anu mahorana a Jerusalema, na mi kombela, ti taku ngako mi txi mana txirandwa txangu, txi geleni ti taku nafa ngu lirando.

Masalmo 106:3

Va katekile avale va vekisako milayo yakwe avale va mahako kululama yotshe mbimo.

Masalmo 84:2

Moya wangu wa navela ni kuxuva siluvelo sa Mkoma; yotshe mbilu yangu ya embelela ngu kutsaka ka Txizimu txi txi hanyako!

Masalmo 73:25

I mani ni ku nayo nzumani, hahanze kwako kani? Ha mafuni ani ni navela kuzumba ni nawe dwe.

Masalmo 18:23

Ni m'thu wa ditshuri masoni kwakwe kambe na ti vhikela ka tinzila to biha.

2 Samuwele 23:5

Hambi ku nyumba yangu yi si nga ya mamahelo eyo ka Txizimu, kambe txi mahile txitumelelano txa kwa mbi guma ni nani, txi ka sotshe txi no leletelwa ni kuvekiswa. kotshe kuhulukiswa kwangu ni kutsaka kwangu si na va ka txona, hambi ku asi se kumilisa.

Mitengo 36:13

Ayi ngu yona milayo ni sileleto si Mkoma a nga ruma ngu dianza da Mosi ka vanana va ka Israyeli, libalani ka va ka Mowabhi, hafuhi ni Jordhani, ka Jeriko.

Luka 1:6

I ti vathu vo lulama ngu wumbidi wawe masoni ka Txizimu, va txi veketa va si solwi ngu m'thu, sotshe sirumo ni milayo ya Mkoma.

Malakiya 4:4

Alakanyani Mlayo wa Mosi, txithumi txangu, awu ni nga wu rumela kwakwe kona Horebhi ka votshe va ka Israyeli, awu i ku sileleto ni wulamuli.

Mika 7:7

Ani koko, ni verela ka Mkoma; ni na verela ka Txizimu txa kuhanyiswa kwangu; Txizimu txangu txi na ni engisa.

Isaya 30:18

Ngu mhaka yeto, Mkoma a na verela ku mi mahela wumbilu; kambe ngu kumaha keto, a na guletwa kasi ku e mi pfela wusiwana, nguko Mkoma Njizimu to dinganisa. Va katekile votshe vale va thembako kwakwe.

Masalmo 130:5

Ni verela Mkoma; Moya wangu wa m'verela, se ni verela dipswi dakwe.

Isaya 24:15

Ngu mhaka yeto, dhumisani Mkoma, amu mikovani, ni sitondoloni ka linene, ka ditina da Mkoma, Txizimu txa ka Israyeli.

Isaya 25:1

Awe Mkoma, ngawe Txizimu txangu; ni na kuguleta, ni dhumisa ditina dako, nguko u mahile sixamaliso, makungo ako a kale nga ditshuri, ni kutsana.

Isaya 26:13

Awe Mkoma, Txizimu txathu, vamwani vanyamne va tolovela ku hi fumela, aniko athu hi alakanya ditina dako dwe.

Isaya 49:23

Se vafumeli va na va vaxayise va vona, ni vasikati va kona va na va vamamisi vawe; va na namisa tikhohe hahatshi masoni kwako, ve dazela lithulu la mikondo yako, se u na tiziva ti to ani ngani Mkoma, ni ti to avale va ni thembako kha va na mbi wiswa tingana.

Isaya 51:4

Ni engiseni anu vathu vangu, ni ditiko dangu! Riyani tinzeve kwangu, nguko mlayo wu na huma ngu kwangu, ni kululama kwangu ku na maneka i ti liwoningo la vathu.

Mika 4:5

Nguko votshe vathu va na tsimbila, mmwani ni mmwani ngu ditina da txizimu txakwe, aniko athu hi na tsimbila ditinani ka Mkoma, Txizimu txathu, yotshe mbimo ngu ha ku si gwitiko.

Masalmo 42:2

Moya wangu wu ni ditora do lava Txizimu, Txizimu txo hanya! Ditshiku muni ni no ya wona khohe ya Txizimu kani?