Isaya 26:14 - Bhiblia Yo Sawuleka

¹⁴ Va txi fa vona, kha va na mbi tshumela ve hanya; va txifa, kha va na mbi wuka; ngu toneto, u va endete, u va lovisile, u fuvisa ni ku va alakanya ka kona.

Isaya 26:14 Referans Kwoze

Mavingu 10:7

Ku alakanywa ka wo lulama ku katekile, aniko ditina da vaonhi di na sina.

Isaya 8:19

Va txi mi gela va txi kha vona: Wotisani ava va ku ni mimoya ya vafi, ni vahuti vale va lengako, ni kungungurukela, mi txi khanu: Vathu kha va faneli ku wotisa Txizimu txawe kani? Ku nga wotiswa ka vafi timhaka ta va va hanyako kani?

Masalmo 106:28

Se va to khozela Bhahali-Peyori, va txi dya timhamba to mahelwa vafi.

Mtuletelo 20:5

Aniko vamwani vafi, kha va tshumela ve hanya kala kuza kuguma digumi da mazana a malembe. Akuwa ngu kona kuwuka ko khata ka vafi.

Matewu 2:20

“Khukha u teka mwanana ni mame wakwe, u txi tsula ditikoni ka Israyeli, nguko avale va nga ti bheja kudaya mwanana se va fite.”

Isaya 10:3

Mi na maha txani anu vamwani ngu ditshiku da txitsayiso, ni da kulovisa kule ku nota ngu kule kani? Mi na tutumela ka mani kuya lava kuvhunwa kani? Tithomba tanu mi na ti veka hani kani?

Masalmo 109:13

Liveleko lakwe li na gume ni txibongo txakwe txi na fuve ka liveleko li litako.

Masalmo 9:6

Valala va fite, va lovile kala kupinduka; u khundumusete madhoropa awe, kuwalo wu a no va alakanya kambe.

Dhewuteronome 4:28

Koneyo mi na ya khozela sizimu so mahwa ngu manza a vathu, sa mapulango ni sa marigwi, si si woniko mwendo kuengisa, kudya mwendo kupfa kubhumula.

Eksodha 14:30

Ka ditshiku donedo, Mkoma a hulukisa va ka Israyeli manzani ka Vaegipta, ni va ka Israyeli va woni Vaegipta va di fite ha likasani ka mati a linene.

Isaya 26:19

Vafi vako va na hanya, vafi vako va na wuka; vhumukani, kambe giyani, anu mi zumbako lithuluni, nguko mwando wako, awe Txizimu, wu na fana ni mwando wa mwasi, se mafu ma na tshotsha mapune vafi.

Masalmo 36:12

Ndiva vabihi va wite hahatshi, va wite, kha va na mbiswa ve wuka.

Masalmo 59:5

Awe koko Mkoma, Txizimu txa Mabutho a Tiyimbi, Txizimu txa Israyeli, wuka u tsayisa otshe matiko: U ngave ni wumbilu ka ni wihi wa votshe vale va mahako kubiha.

Masalmo 135:17

sina ni tinzeve, aniko kha si engisi; kuwalo muhefemulo mkanani ka sona!

Ekleziyaste 9:5

Nguko avale va hanyako va tiziva ti to va nafa, aniko vofa kha va zivi txilo ni txa tximwetxo, hambi kuva ni txhatxhazelo ni ka kudotho, kambe mapimo awe ma kudivalani.

Isaya 29:6

U na endelwa ngu Mkoma wa Mabutho a Tiyimbi, ngu kudhinda, ni kuzinginika ka mafu, ni diguwa da hombe, ni kupeka ka txihuhuri, ni txingulu, ni m'dhikila wa mndilo wo tshokomisa.

Isaya 37:19

Kambe va rinzile ha mndiloni sizimu sa ona; nguko i si nga sizimu, aniko i ti mithumo ya manza a vathu, yo mahwa ngu mapulango ni marigwi; ngu mhaka yeto, va si khundumusete.

Jobe 7:9

Ku nga direfu di hangalakako di pinda, awule a relelako dithithani, kha na mbi dhuka e kwelela kambe.

Jobe 18:17

Maalakanyo akwe ma na lova mafuni, ditina dakwe kha di na mbi maneka mithandani.

Jobe 24:20

Mndani mule ku nga va veleka ku na va divala, timbungu ti na vadya ti txi pfa kutshamba; kha va na mbi ngadi ve va alakanywa, se wubihi wu na funyekisa ku nga mndonga.