Isaya 24:6 - Bhiblia Yo Sawuleka

⁶ Ngu mhaka yeto, txiruko txa heta mafu, se avale va hanyako ka ona, va na koneka; ngu mhaka yeto, vaaki va ha mafuni, va na hiswa, mbadotho ava va no sala.

Isaya 24:6 Referans Kwoze

Malakiya 4:1

Nguko wonani taku ditshiku dile, dita di txi tura nga m'dhikila; votshe va va ti kulisako ni votshe va va mahako wubihi, va na nga mwasi, se ditshiku di di nota di na va tshokomisa, kuwomba Mkoma wa Mabutho a Tiyimbi, taku kha di na mbi va siyela mkoloti, mwendo didhavi.

Matewu 7:14

Nguko txike txi songile, ni nzila ya kona yi khwete, ayi yi yisako wutomini, kambe mbadotho va yi manako.”

Varoma 9:27

Isaya nene wa huwelela ta Israyeli, a txi khene: “Hambiko mtengo wa vanana va ka Israyeli wu fanako ni mtxhefa wa lineneni, miboti yokha ngu yona yi no poniswa;

Malakiya 4:6

Se a na hundulusa timbilu ta vatate ka vanana vawe, ni timbilu ta vanana ka vatate vawe; kasi ku ni si ti ni ta peka ditiko ngu txiruko.

Levhi 26:22

Ni na leka sihari sa txitinga si dayela vanana vanu, si na heta sifuyo sanu, si mi heta nanu mi sala mi di vadotho, se tinzila tanu ti na maha mapfhela.

2 Pedro 3:10

Kambe ditshiku da Mkoma di na tisa ku nga dikhamba; ka donedo ditshiku, tinzuma ti na pinda ti txi dhinda ngutu, tinyeleti ti na nyivilika ngu kupfa kuhisa ka hombe; ditiko ni mithumo ya dona si na hya si txi guma.

Malakiya 3:9

I di kuruketelwa mi ruketetwe, nguko ma ni pela, anu motshenu va ditiko diya.

Malakiya 2:2

Ngako mi si txi engisi, mi si ti emiseli timbiluni kwanu, kuninga txithavo ka ditina dangu, kuwomba Mkoma wa Mabutho a Tiyimbi, ni na rumela makhombo txitimwi kwanu, kambe ni na ruketela tithomba tanu, se ni ti ruketete nguko anu kha mi ti veki eto timbiluni kwanu.

Ezekhiyele 5:3

Se u na teka mtengo wa wudotho wa misisi, u sungelela ka titshulu ta txyambalo txako.

Isaya 1:31

Se m'thu wa mtamo a na fana ni wufemu wa txikwenga, ni mthumo wa kona wu na fana ni tshatsha ya mndilo, aniko va na tura ngu wumbidi wawe, kupwateka ni wo va timela.

Dhewuteronome 28:62

Ku na sala vathu vavadotho kwanu, anu mi nga ti vavangi nga tinyeleti ta nzumani. Ngu mhaka ya kwa mbi engisa kwanu dipswi da Mkoma, Txizimu txanu.

Dhewuteronome 4:27

Mkoma a na mi hangalasa hagari ka vamatiko, se mi na sala mi di va mtengo wa wudotho, hagari ka mifumo yiya, Mkoma a no va a txi mi yisa ka yona.

Matewu 27:25

Se votshe va to angula va txi kha vona: “Mnoha wakwe wu na thekele txitimwi kwathu ni txitimwi ka vanana vathu!”

Isaya 5:24

Ngu toneto, va na loviswa, kufana ni titshava ti txi hiswa ngu mndilo, va na fana ni kuhiswa ka mwasi wa kuoma, se mkoloti wawe wu na sina, ni siluva sa kona si na puruma ku nga lithulu; Nguko va lekile Mlayo wa Mkoma wa Mabutho a Tiyimbi, ve eyisa dipswi da Msawuleki wa Israyeli.

Isaya 9:19

Ngu mhaka ya kuhenya ka Mkoma wa Mabutho a Tiyimbi, ditiko di na phuma, vathu va na nga tikhuni ha mndiloni; kha ku nga ni kudivalela mkwawe.

Isaya 34:5

Nguko ditxhari dangu di levile nzumani; wona taku di na wela txitimwi ka Edhomi, ni txitimwi ka vathu vangu, vo ruketelwa, kasi kuya lamula.

Isaya 43:28

Ngu mhaka yeto ni na nyenyezisa vahombe va wukhalo wo sawuleka, kambe ni maha ti to Jakobe e loviswa, ni Israyeli kuva e rukwa.

Jeremiya 5:14

Ngu konaho, Mkoma, Txizimu txa Mabutho a Tiyimbi, a khene: Ngako va nga womba mhaka ya ku nga tiya, wona taku ni na phemberusa mapswi angu me maha mndilo txisofuni kwako, se vathu vava ve maha tikhuni, se vona va na tshokomiswa.

2 Vafumeli 24:12

Sekoko a to huma Jowakimu, mfumeli wa ka Judha, eya ka mfumeli wa Bhabhilona, kumweko ni mwamwakwe ni sithumi sakwe, ni madhota akwe, ni mithenwa yakwe; se mfumeli wa Bhabhilona a to mñola, ka dilembe da wutxhanu ni mararu da kufuma kwakwe.

2 Vafumeli 25:12

Sekoko avale va sisiwana ngutu ditikoni a to va leka, mthangeli wa yimbi, ve thuma amu ka mivhinya, ni kudima.

Isaya 1:9

I ti ku Mkoma wa Mabutho a Tiyimbi a sa hi siyela miboti, hi ndi na nga Sodhoma, di fana ni Gomora.

Jeremiya 12:4

Ina ditiko di na keta kala yihi mbimo kani? Mwasi wu txi oma txitingani, ngukonaho ka wubihi wa va va zumbako emo kani? Sihari ni sinyana sa lova, nguko va kha vona: Kha na mbi wona kugwitelwa kwathu.