Isaya 23:18 - Bhiblia Yo Sawuleka

¹⁸ Se wukwewu wa dona wu na lumba Mkoma, ni wugwili wa dona wa wugelegele; kha ku na mbi va ni thomba hambi kutsiwa; aniko wukwewu wa dona wu na lumba ava va zumbako masoni ka Mkoma, kasi ku veva ni sakudya so enela, ni syambalo sa lisima.

Isaya 23:18 Referans Kwoze

Masalmo 72:10

Vafumeli va Tarxixi ni va sitondolo va na m'luva; vafumeli va Sabha ni va Sebha va na rumela tinduvo!

Vagalatiya 6:6

Awule a gondiswako Dipswi, a na abane ni m'gondisi wakwe sotshe sa sinene si a ku naso.

Eksodha 28:36

U na maha txileti txa nzalama ya yinene, atxi ka txona u no bhala ngu kukenyela nga ti va bhalisako tona ngu txixambanyo aha ka phera, u txi khawe: “Kusawuleka nga Mkoma.”

Mithumo 9:39

Se Pedro a to khukha e tsula navo. Ku ti ngako a di hokile, va to mu yisa ka nyumba yile ya txitezini. Votshe vavasikati va tinoni va to ta mu randela na va txi dila, va txi mkomba mikhatxwa ni tinguwo ti Dhorkasi a nga va rungela tona, a di ngadi navo.

Luka 12:33

“Xavisani simaha sanu, mi txi vhuna sisiwana. Mahani mikwama yo mbi sakala, mi txi veketa txuma txanu txo mbi guma nzumani, amuwa ku si tshuketiko dikhamba, hambi sumba yi si doliko.

Luka 8:3

Jowana, msikati wa Kuza, nduna ya Herodha; ni Suzana ni vamwani vavasikati, va nga ti ti va vhuna ngu silo sawe.

Marku 3:8

ni Jerusalema, ni Idhumeya ni kheya mtxhatuko ka Jordhani, ni matikoni ka Tiro ni Sidhoni, va to gudhuka ve ta kwakwe, i di vavangi ngutu, ngu kupfa totshe ti ene a nga ti maha.

Malakiya 3:10

Tisani sotshe sa wugumi ka nyumba ya wuxayiselo, ti to ku nava ni sakudya nyumbani kwangu, se ngu kumaha keto ni duketeni, kuwomba Mkoma wa Mabutho a Tiyimbi, ku mwendo na mbi mi tulela mafasitela a nzumani, ni mi tshakunutela makatekwa o tala, aya mi no pwata ni ko thela kona.

Mika 4:13

Khukha u hula, awe dihorana da Siyoni, nguko ani ni na ku mahela tshoka yako ngu simbi, ni syala sako ngu kopora, u na balisela matiko amangi, se kuxula kwako ku na pfaliswa ka Mkoma, ni thomba yako, ka Nyamne wa mafu otshe.

Ekleziyaste 2:26

Nguko Txizimu txa ninga wutxhari, ni wuzivi, ni litsako ka m'thu wule i ku mnene masoni ka txona; aniko ka muonhi txi mninga mthumo, kasi ku e sengeletela ni kuwungeletela, se e ninga wule a nga maha ta tinene masoni ka Txizimu. Eto ni tona mbukanganyisi, ni kuxaniseka ka moya.

Mavingu 28:8

Awule a andisako thomba yakwe ngu dibhindu do biha ni ku honyolela sa vakwawe, a vekela wule a pfelako sisiwana.

Mavingu 13:22

M'thu wa wunene, a siyela thomba vanana va vanana vakwe, aniko thomba ya muonhi yi ningelwa ka wo lulama.

Masalmo 45:12

Se mwanana wa muhorana wa Tiro, a na va koneyo ni ni siningo; vanyatithombe va ku hagari ka vathu, va na kombela wunene wako.

Masalmo 72:11

Vafumeli votshe va na ti namisa masoni kwakwe; yotshe mifumo yi na mthumela!

Ezekhiyele 26:12

Se va na pa tithomba tako, va txi handa siya sako, ve khundumusela maguma ako, ni kukhundumusela tinyumba tako ta lisima; ni marigwi ako, ni mapulango ako, se lithulu lako va na li xwaya hagari ka mati.

Zakariya 14:14

Se nene Judha a na lwa a di Jerusalema, kambe tithomba ta matiko otshe ale ma nga gwatama ni Jerusalema, ti na sengeletelwa, nzalama, ni silivhela, ni syambalo so tala ngutu.

Matewu 25:16

Awule a nga amukela mtxhanu wa titalenta, a to bhindula ngu tona, e mana timwani ta mtxhanu.