Isaya 23:11 - Bhiblia Yo Sawuleka

¹¹ A nawulutile dianza txitimwi ka linene, kambe a vhinganyisile mifumo; Mkoma a rumile kuwukela Kanana, ati to ku txi khundumuswa mikhokhola yakwe.

Isaya 23:11 Referans Kwoze

Eksodha 14:21

Sekoko Mosi a to nawuluta dianza dakwe txitimwi ka linene, se Mkoma a to abanisa mati ka wotshe wusiku wule, ngu moya wa mtamo, wa kuta ngu wutxani; se linene li txi maneka li di omile.

Johani 2:16

A txi gela va va xavisako situvani a txi khene: “Thavisani sotshe siya hawa; mi nga tekeni nyumba ya Tate wangu mi yi maha nyumba ya mabhindu.”

Marku 11:17

Se a to va gondisa a txi khene kwawe: “Ina kha ka bhalwa tito: ‘Nyumba yangu yi na dhanwa ku i nyumba ya kukhongela ka otshe matiko kani?’ Kasi anu mi yi maha mkele wa makhokhokho.”

Zakariya 14:21

Se totshe tikhadi ta Jerusalema ni ta Judha, ti na sawulekiselwa Mkoma wa Mabutho a Tiyimbi, ni votshe vale va no phaxela va nata, ve ta teka ve bhikela ka tona; kambe ka ditshiku donedo, kha ku na mbiswa kumaneka Mkanana Nyumbani ka Mkoma wa Mabutho a Tiyimbi.

Hagayi 2:7

ni na dekadekisa otshe matiko, se ti nata tithomba ngu ka matiko, ni na tata nyumba yiya ngu wudhumo, kuwomba Mkoma wa Mabutho a Tiyimbi.

Nahume 1:14

Mkoma a vekile mlayo wa ku kuwukela, waku ku si maneki ni wammweyo wo dhanwa ngu ditina dako; kukhukhela nyumbani ka txizimu txako, ni na fuvisa sithombe so vatwa ni sa kunyekiswa; koneho ni na maha kona dithitha dako, nguko u txhipile.

Ezekhiyele 31:16

Ngu diguwa da kuwa ka wona, ni zinginisile matiko, mbimo yile ni nga wu releta mndiloni, ni vale va relelako diphalani; se yotshe mindonga ya Edheni, ni mindonga ya yinene ya Libhanoni, votshe vale va selako mati hahatshi ngutu ka mafu va to thavelelwa.

Ezekhiyele 26:10

A na ku fenengeta ngu lithulu la mahantxhi akwe o tala; maguma ako ma na zinginika ngu sigingo sa mahantxhi, ni sa madangarita, ni sa sikotxikani, mbimo yile mlala a no wulela ngu matimba ako, nga o wulela ngu sike si nga tuletelwa sa didhoropa.

Jeremiya 47:7

U nga humulisa kutxani na u ti ningilwe mlayo ngu Mkoma, wo wukela Asloni, ni ku vhinganyisela mabambe ka linene kani? Ngumo u nga rumwa kona.

Isaya 25:2

Nguko didhoropa u di mahile mmumbu wa marigwi, didhoropa do tsana u di mahile dirumbi, se dizumbo da vamatiko, di nga mahe kambe didhoropa, di nge ngadi di aketwa kambe.

Isaya 23:3

Se thomba yakwe i ti ti mbewu ya mnamboni, yi nga ti tita ni mati amangi, ni sa kufunyelwa mnamboni ka Nilo; kambe ene i ti ti txikombiso txa matiko.

Isaya 10:6

Ni na mruma ku yalwa ni ditiko da wubihi, ni mleleta kuya wukela vathu vale ni nga va henyela, ku va handa ni ku va honyola siya sawe, se ni va veka ti to ve kandetelwa ku nga ndope ya tinzilani;

Isaya 2:19

Sekoko vathu va na wulela tiphakoni ka marigwi, ni mu ka maphala a mafuni, ngu mhaka ya kuthava Mkoma, ni kudhumiswa ka wuhombe wakwe, ngako a txi khukha kasi kuxamalisa ditiko.

Masalmo 71:3

Awe maha m'vhikeli wangu ni wuthavelo wangu, awe u nga thembisa ku ni vhuna yotshe mbimo. Awe u dirigwi dangu ni mkhokhola wangu!

Masalmo 46:6

Matiko ma ngungurukela, mifumo ya gingiseka. Kambe Txizimu txi womba dipswi, mafu ma so bhandekela.

Genesisi 9:25

Se Nowa a to khene: “A na ruketelwe Kanana, ka vanawe a na va khumbi ya tikhumbi!”

Isaya 5:25

Ngu kumaha keto, kuhenya ka Mkoma, kuturile txitimwi ka vathu vakwe, se a nawulutile dianza dakwe, e va daya; mimango yi to zinginika, sirumbi sawe si hangalaka, ku nga nzokoro hagari ka tinzila; hambi keto, kuhenya kwakwe ku toya masoni, ni dianza dakwe di ngadi nawulukile.

Isaya 13:13

Ngu toneto, ni na dhudhumelisa nzuma, ni mafu ma na khukha ha wukhaloni ka ona, ngu mhaka ya kuhenya ka Mkoma wa Mabutho a Tiyimbi, ngu ditshiku da kuhenya kwakwe.

Isaya 14:26

Ngu txona txikungo txi txi nga sungwa txitimwi ka otshe mafu, adiya dianza di nga nawulutwa txitimwi ka matiko otshe.

Isaya 19:5

Se ma na phwa mati a linene, ni mnambo wu na phwa wu oma.

Isaya 23:10

Tshawunyeta kufana ni Nilo, ngu ditikoni kwako, awe mwanana wa muhorana wa Tarxixi; kha ku ngadi ni libhande madhawani kwako.

Isaya 50:2

Ngu kutxani ni ngata ni si ta mana m'thu kani? Ngu kutxani ni nga mi dhana, ku si oroveli ni wammweyo kani? Ina dianza dangu di to khwanyela, niza ni si sikoti kutirula kani? Ni ku mwendo kha ni ngadi ni mtamo kasi kutxhatxhisa kani? Wonani taku, ngu kukawuka kwangu na omisa linene, ni maha ti to minambo yi hunduluka yiva siwula, kala kuza sihaka sa kona si nunga, nguko kha ku nga ni mati, se sa fa ngu ditora.

Ezekhiyele 26:4

Ona ma na khundumusa maguma a Tiro ni sitezi sa kona, kambe ani ni na hiyela lithulu la kona, ni wumba dirigwi do kenyeka.