Isaya 22:12 - Bhiblia Yo Sawuleka

¹² Se Mkoma, Mkoma wa Mabutho a Tiyimbi, a na mi dhana ka ditshiku dile, kuya dila, ni kuya peka huwa, ni ku kuyula misungo, ni ka muambalisi wa masaka.

Isaya 22:12 Referans Kwoze

Joyeli 2:17

Va na dile vaphaxeli, va thumelako Mkoma, hagari ka m'hubhe ni txiluvelo, va ne kha vona: Tsetsa vathu vako, awe Mkoma, kambe u nga ningele thomba yako tinganani, kasi ku matiko ma txi yi xakela: Nguko kutxani va no kha vona ka vathu: Txi hayi Txizimu txawe, kani?

Joyeli 1:13

Ti khutareleni mi ti dilela anu vaphaxeli; kumani anu vathumeli va txiluvelo; wulelani mi pinda mi di ambate masaka, ni wusiku anu, vathumeli va Txizimu txangu; nguko miningelo ya sakudya ni sa kusela si nga wilwa, nza nyumbani ka Txizimu txanu.

Mika 1:16

Ti mahele lipala, u yola misisi, ngu mhaka ya vanana vako vo tsakisa; kulisa lipala lako kufana ni digama, nguko va tekilwe kwako ve yiswa wukhumbini.

Jakobe 5:1

Engisani, anu vanyatithombe, dilani mi txi peka tihuwa ta hombe ngu makhombo awa ma no mi wela.

Amosi 8:10

Na phindula mibuso yanu yi maha txidilo, kotshe kuembelela kwanu ku na maha kutitsetsa, kuhumelela masaka ka makata anu ni ligwayi ha misungo kwanu, ni maha ti to a siya si txi nga mizila ya mwanana mmweyo wa dizambi, se magwitelo akwe ma na nga ditshiku da kupandiseka.

Jona 3:6

Nguko dipwsi diya di hokile ka mfumeli wa Ninivha, se a to khukha ha txituluni kwakwe ka wukoma, a txi thavisa syambalo sakwe, e fenengela masaka, e khalahatsha hadikhumani.

Isaya 15:2

Vaaki va Bhajite ni Dhibhoni, va kwelela ka makhalo o guleka, kuya dila kona; Mowabhi wa peka huwa ngu mhaka ya Nebho ni Medhebha; yotshe misungo yi na maha tigwayi, ni sotshe siletu si na va si di yotwe.

Ekleziyaste 3:11

Txi mahile sotshe si di tshurile ngutu, ngu mbimo ya sona; kambe txi vekile timbiluni kwawe kualakanya ka yotshe mbimo; hambi keto, kha ku na m'thu wule a zivako mthumo wu Txizimu txi nga wu maha, kukhukhela makhatoni, kala magwito.

Ekleziyaste 3:4

mbimo ya kudila, ni mbimo ya kuseka; mbimo ya xomulo, ni mbimo ya kusinya;

Jobe 1:20

Sekoko Jobe a to khukha, e vharulela syambalo sakwe, e yola msungo wakwe, e ti wisa hahatshi, e khongela.

Nehemiya 9:9

U woni kuxupheka ka vatate vathu kona Egipta, u engisile kudila kwawe, hafuhi ni linene lo Bhilivila.

Ezra 9:3

Se mbimo yile ni nga tipfa toneto, ni to vharulela syambalo sangu, ni xurula misisi ha msungo kwangu, ni maletu angu, ni khalahatsha ni so goo.

2 Makronika 35:25

Se Jeremiya a to maha txidilo txo dila Josiya; se votshe vaembeleli vavamna ni vavasikati va to womba-womba ngu timhaka ta Josiya tindandoni kwawe, kala ka ditshiku da nyamsi; nguko va ti mahile txileleto ka Israyeli; wonani taku “ti bhatwe ka dibhuku da sidilo.”

Isaya 3:24

Se ku na maheka taku, wukhaloni ko bhumula, ku nava ni kununga; se wukhaloni ka libhande, ku nava ni ngoti; wukhaloni ka misisi, ku na maneka tipala; wukhaloni ka syambalo sa mibuso, ku na ambalwa masaka; wukhaloni ka kutshura ngutu, ku nava ni sibawa so hiswa ngu mndilo.

Isaya 26:10

Hambi ku txi divalelwa m'bihi, kha ti mmahi e gonda wululamo, hambi ditikoni ka wululamo, ene a maha kubiha, kambe kha nga ni mhaka ni wuhombe wa Mkoma.

Isaya 29:1

Dikhombo ka Ariyeli, ka didhoropa da Ariyeli, adile Dhavhidha a nga veka ka dona wugovelo! Engetelani dilembe ni dilembe, kambe yi na ningetane mibuso.

Isaya 32:11

Dhudhumelani, anu vavasikati vo zumbiseka, kambe karatekani anu mi ti thembako ngutu; thavisani syambalo sanu, mi sala mi di simbwiri, se mi ambala masaka siwununi kwanu.

Isaya 58:3

Va txi kha vona: Se hi titonela txani sakudya, na u si hi woni kani? Hi txanisela txani muhefemulo wathu, na awe u si ti zivi kani? Wonani taku, ditshiku di mi ti tonako sakudya, mo mana ku ti tsakisa mipune, kambe mi lwela wotshe mthumo wanu.

Jeremiya 4:8

Ngu konaho, ambalani masaka mi dila, ni kudikwila. Nguko kutura ka txiviti txa Mkoma kha ka khukha kwathu.

Jeremiya 7:29

Yola misisi ya msungo wako, u txi yi tshotsha kule, indaya peka huwa mimangoni, nguko Mkoma a lambile ni kuleka lihunzu li li nga wusa kuhenya kwakwe.

Jeremiya 16:6

Vahombe ni vanana va na fa ngu wubihi wawe ditikoni muwa, va si tshotshwi; vathu kha va na mbi va dilela, hambi ku ti txhavela ni kuyola misungo.

Jeremiya 16:8

Kambe u nga dhuke u wulela nyumbani ka m'buso, u khalahatsha udya ni kusela kumweko navo.

Ezekhiyele 27:31

Kambe va na yola misungo ngu mhaka yako, ve ambala masaka va na dila kwako ngu kupandiseka ka moya, ngu kudila ka hombe.

Dhaniyeli 5:1

Mfumeli Bhelxazari a to maha m'buso wa hombe, e ramba 1.000 wa vahombe vakwe, e sela vhinya masoni kwawe.

Hoseya 9:1

U nga tsake, awe Israyeli, u tshumela u ndaka-ndaka, kufana ni vathu; nguko u lekile Txizimu txako kufana ni digelegele; U randile kuholelwa ngu otshe mathala a fulaho.

Joyeli 1:8

Dila nga m'horana wotuma wo ambekwa masaka, ngu mwamna wa wuphya wakwe.

Isaya 37:1

Se ku to maheka taku, a di pfite tiya mfumeli Ezekhiya, e vharulela syambalo sakwe, e ti fenengeta ngu disaka da koni, e wulela Nyumbani ka Mkoma.

Isaya 37:2

Se mfumeli a to rumela Eliyakimu, mxayisi wa nyumba ya wukoma, Sebhina, mabhalani, ni madhota a vaphaxeli, va di fengete masaka a tikoni, ka Isaya, mwana Amosi, mprofeti.

Joyeli 2:12

Hambi keto, konkuwa, kuwomba Mkoma: Hundulukelani kwangu ngu mbilu yanu yotshe; totshe eto, ngu kutitona, ni kudila, ni huwa.