Isaya 2:4 - Bhiblia Yo Sawuleka

⁴ Se ene a na lamula txitimwi ka matiko, kambe a na tsayisa matiko o tala; a na hundulusa matxhari awe me maha misuka, ni tingove tawe ti maha masikela; ditiko kha di na mbi guleta ditxhari do lwisa dimwani ditiko; kha va na mbi gondela kambe kulwa yimbi.

Isaya 2:4 Referans Kwoze

Mika 4:3

Se txi na lamula vathu vavangi, kambe txi na tsayisa matiko a mtamo, kala ni ale a kule, txi na hundulusa matxhari awe me maha misuka, ni tingove tawe ti maha masikela; ditiko dimwedo kha di na mbi guleta ditxhari do lwisa dimwani ditiko; se kha va na mbi gonda kambe kulwa yimbi.

Hoseya 2:18

Se ka ditshiku dile ni na maha ngu vona txitumelelano, ni sihari sa tshofu sa txitinga, ni sinyana sa nzumani, ni sihari so tsimbila ngu mrumbu sa ha mafuni; kambe ni na thavisa wulaho ni ditxhari, ni gumisa ni yimbi ditikoni, ni va maha ve zumba ngu kutsana.

Zakariya 9:10

Se ni na hoxota sikotxikani sa Efrayime, ni mahantxhi a Jerusalema, ni kufunyeletela wulaho wa yimbi; se ene a na pfalisa kudikha matikoni; se kufuma kwakwe ku na nava, kukhukhela ka linene limwelo, kala ka limwani linene, ni kukhukhela ka mnambo kala magwito ka mafu.

Isaya 32:18

Vathu vangu va na zumba ditikoni ka kudikha, ka tinyumba to tsana ngutu, ni ka makhalo o humula ngu kuthutha,

Masalmo 46:9

Mkoma wa fuvisa tiyimbi kotshe ha mafuni; wa funyeletela wulaho, e wila ditxhari; ni kuhisa sikotxikani ha mndiloni!

Isaya 9:7

Kuanda ka kufuma ni kudikha kwakwe, kha ku na mbi va ni magwito txitimwi ka txikhalo txa wukoma txa Dhavhidha, ni ka mfumo wakwe, kasi kutsanisa ni kuseketela ngu wulamuli ni kululama, kukhukhela konkuwa, kala kupinduka; lirando la Mkoma wa Mabutho a Tiyimbi, a na maha eto.

Joyeli 3:10

Mahani matxhari ngu mikwati yanu; ni mipaxwa ngu masikela anu; wa kwa mbi na mtamo a ne khene: Ni ni mtamo.

1 Samuwele 2:10

A va valwako ni Mkoma va na phwaraselwa; a na va dhindela a di nzumani; Mkoma a na lamula magwito a mafu, ni kuninga mtamo ka mfumeli wa ona, kambe a na guleta wukoma wa msawuleki wakwe.

Masalmo 82:8

Ngono, Txizimu, u ta lamula mafu, nguko otshe matiko ma lumba awe!

Mtuletelo 19:11

Se ni to wona nzuma yi di tulekile: Ku to woneka dihantxhi do basa, se mgadhi wa dona a ti dhanwa ku: “Wo thembeka” ni “Wa ditshuri.” Wa lamula, a txi lwa ngu kululama.

Mithumo 17:31

Nguko Txizimu txi vekile ditshiku di txi no lamula mafu ngu dona, ngu malamulelo o lulama, ngu m'thu wu txi nga ti sawulela ene, txi tsanisa mhaka yiya ka votshe ngu ku mu wusa ka vakufa.”

Isaya 9:5

Nguko otshe matxhari a vale va nga lwa yimbini, ni syambalo sile si nga phutela mnoha, si na rinzwa mndiloni, si txi hiswa.

Masalmo 110:6

Ene a na lamula mifumo sirumbi si na mbambamela ka otshe makhalo; ene a na ganyatela vafumeli va dotshe ditiko!

Masalmo 96:13

tsakani masoni ka Mkoma, nguko wata nguko a tela ku ta vhuna mafu; a na lamula ditiko ngu kululama, ni vathu ngu ditshuri dakwe.

Isaya 32:17

Se simaho sa kululama si na va kudikha, ni mthumo wa kululana wu na va kuzumbiseka, ni kutsana ko mbi guma.

Isaya 33:22

Nguko Mkoma mlamuli wathu, Mkoma mmahi wa milayo yathu; Mkoma ngene Mfumeli wathu, ene a na hi hanyisa.

Isaya 42:1

Wonani Txithumi Txangu, txi ni txi seketelako, Msawulwa wangu, awule moya wangu wu mtsakelako; Ni vekile Moya wangu txitimwi kwakwe; a na humisa kululama hagari ka vamatiko.

Joyeli 3:12

ma na khukhe ma txi ema matiko ma naye mkovani ka Josafati; nguko ni na khalahatsha koneyo ni lamula otshe matiko a madhawani

Masalmo 46:10

“Emani! Ti ziveni ti to ani ngani Txizimu! Ni na guletwa hagari ka mifumo, ni wa hombe txitimwi ka otshe mafu!”

Isaya 42:3

Litshava li li nga thidyaka, kha na mbi li funya, kambe kha na mbi tima ngoti yi yi tuvikako; ngu ditshuri a na humisa wululamo.

Hoseya 2:20

Se ni na kuteka ngu kuthembeka, kambe u na ziva Mkoma.