Isaya 2:2 - Bhiblia Yo Sawuleka

² Se ku na maheka to, ka masiku o gwitisa, mmango wa Nyumba ya Mkoma, wu vekwa txitimwi ka mimango, ni kuguleka txitimwi ka simangwana, se matiko otshe ma na tutuma me ya mmangoni.

Isaya 2:2 Referans Kwoze

Isaya 56:7

kambe ni na va yisa mmangoni kwangu ko sawuleka, ni va busisa Nyumbani kwangu ka mikombelo; miningelo yawe ya kuhiswa ni miphaxo yawe, yi na amukeleka txiluveloni kwangu, nguko nyumba yangu yi na dhanwa ku i Nyumba ya mikombelo, ka otshe matiko.

Isaya 27:13

Se ku na maheka ka ditshiku dile, taku ku na vetwa mpundu wa hombe, se vale va nga ti mwalate ditikoni ka Asiriya, ni vale va nga tsuliswa ditikoni ka Egipta, va na tshumela ve wuya, ve ta khozela Mkoma, mmangoni ko sawuleka, kona Jerusalema.

Zakariya 8:3

A womba tiya Mkoma: Ni na tshumela ni ya Siyoni, se ni na ya zumba hagari ka Jerusalema; se Jerusalema a na dhanwa ku didhoropa da ditshuri, ni mmango wa Mkoma wa Mabutho a Tiyimbi, wu na dhanwa ku mmango wo sawuleka.

Mtuletelo 11:15

Se ngelozi ya wutxhanu ni timbidi yi to veta mpundu wa yona. Konako ku to pfala mapswi a mtamo nzumani, ma txi kha ona: “Mfumo wa mafu konkuwa wu lumba Mkoma wathu ni Kristu wakwe, se ene a na fuma ngu ha ku si gumiko.”

2 Pedro 3:3

Kukhata, mi fanete kuziva ti to ka masiku o gwitisa va na humelela vatseketseli ni sipoyilo sawe, va txi hanyisa ku ambi ti pimela, madingano ni minavelo yawe yo biha.

2 Timoti 3:1

Kambe, ziva tiya: Ka masiku a kugwitisa ku na hoka timbimo to karata.

Dhaniyeli 2:45

Nga tile u nga wonisa tona taku ngu mmangoni ku witwe dirigwi, na ku si woneki dianza, ni ku dona di balisete simbi, koporo, dibumba, silivhela ni nzalama, Txizimu txa hombe txi zivisile ka mfumeli a ti ti no maheka msana keto; se mloro wuwa wu tsani, ni txhamuselo ya wona yi thembekile.

Dhaniyeli 2:35

Sekoko txi to koyolelwa kumweko ni txikete, ni dibumba, koporo, silivhela ni nzalama, asi si nga maneka nga mtungu wa timbimo ta kuoma, se moya wu si huhisa, kambe kha wa maneka wukhalo ni wawumwewo wo si lumba; aniko dirigwi di di nga khundumusa txithombe mmumbu wa hombe, di tata otshe mafu.

Isaya 66:20

Se va na wuyisa votshe vananu, va hagari ka otshe matiko, kasi kumaha mningelo ka Mkoma, na va di txitimwi ka mahantxhi, ni mu ka sikotxikani, ni mu ka misingo, ni txitimwi ka mamula, ni txitimwi ka mibhedhu, mmangoni kwangu ko sawuleka, kona Jerusalema, kuwomba Mkoma, kufana ni kuva vanana va ka Israyeli va txi tisa miningelo yawe ngu ka siya so basa, Nyumbani ka Mkoma.

Isaya 11:10

Se ku na maheka tito, ka ditshiku donedo, matiko ma na wotisa ngu mtwi wa Jese, i ku wule wu no mahwa m'jeke wa vathu, se wukhalo wa kuhumula ka wona wu na va ni wudhumo.

Masalmo 86:9

Mkoma, awe u mahile mifumo yotshe, se yona mifumo ya ta masoni kwako yi ta dhumisa ditina dako.

Mtuletelo 20:4

Konako ni to wona sikhalo sa wukoma. Se avava va nga ti khalahatshile ka sona va to ningwa mtamo wo lamula. Ni to wona kambe mimoya ya vale va nga wilwa misungo ngu mhaka ya wufakazi wa Jesu ni Dipswi da Txizimu; ni vale va nga mbi khizamela txikalani ni txithombe txa txona. Kambe kha va amukela txixambanyo txa txona ha timbanza kwawe mwendo manzani kwawe. Vona va tshumete ve hanya ve fuma kumweko ni Kristu, txipimo txa 1.000 wa malembe.

Vahebheru 1:2

Konkuwa, masikwanano, txi wombawombile kwathu, ngu Mwanana wa txona, awu txi nga mmaha txidya-thomba txa sotshe, awu kambe txi nga maha nzuma ni mafu ngu ngene.

Mithumo 2:17

‘Ngu masiku a magwito, kha Txizimu, ni na thela txitimwi ka votshe vathu, Moya wangu; vanana vanu va mazambi ni vamahorana va na profeta, vavaphya vanu va na wona siwoniso; ni sikosana sanu si na lora miloro.

Malakiya 3:12

Se otshe matiko ma na womba ku mi katekile, nguko anu mi na va ditiko do tsakisa, kuwomba Mkoma wa Mabutho a Tiyimbi.

Dhaniyeli 10:14

Konkuwa ni tile ku ta ku gela ti ti no humelela ka vathu vako masiku a matako, nguko txiwoniso nja masiku a matako.

Dhaniyeli 2:28

Aniko ku ni Txizimu tximwetxo nzumani, txi txi zivisako sihunja; ngu txona txi nga zivisa mfumeli Nebhukodhonosori ti ti no humelela ka masiku a matako. Mloro wako ni siwoniso si u nga si wona ha m'bhedhuni kwako ngu siya:

Jeremiya 3:17

Ka yoneyo mbimo, va na kha vona Jerusalema njikhalo txa “Kufuma ka Mkoma”; matiko otshe ma na sengeletana Jerusalema ditinani ka Mkoma; kha va na mbiswa ve tsimbila madingano ni kuranda ka timbilu tawe to biha.

Isaya 30:29

Ku nava ni ndando hagari kwanu, kufana ni wusiku wu ku mahwako m'buso wo sawuleka; ni kutsaka ka mbilu, ko fana ni ku humako mbimo ku yi ku vetwako tshodi, kasi ku ta mmangoni ka Mkoma, ka dirigwi da ka Israyeli.

Masalmo 2:8

Ni kombele ni na kuninga mifumo yi txi va i di thomba yako mafu otshe ma na lumba awe.

Mitengo 24:14

Konkuwa koko, ani na tsula ka vakakwathu, ngono ni ta kuzivisa ati vathu vava va no maha, ka vathu vako ka masiku o gwitisa.”

Ezekhiyele 38:16

Se u na wukela vathu vangu va ka Israyeli, kufana ni direfu, di txi fenengeta ditiko; ngu magwito ka masiku, ku na maheka taku ni txi kutisa u ta wukela ditiko dangu, kasi ku matiko ma txi na ni ziva, mbimo yi ni no va ni di sawulekisile maso ako, awe Goge.

Jeremiya 49:39

Ngu toneto, ku na maheka ka dimwedo da masiku o gwitisa, ti to ni wuyisa tikhumbi ta Elame, kuwomba Mkoma.

Jeremiya 48:47

Aniko ni na wuyisa tikhumbi ta Mowabhi ka masiku o gwitisa, kuwomba Mkoma. Kala ahawa ngu kona kulamulwa ka Mowabhi.

Jeremiya 30:24

Kuhenya ko thisa ka Mkoma kha ku na mbi boxa, na asi se dinganisa mixuvo ya mbilu yakwe; mi na ti zivisisa kha kwati, ka masiku ma ku ngadi ma txita.

Jeremiya 23:20

Kuhenya ka Mkoma kha ku na mbi boxa na asi se maha ati ti xuvwako ngu mbilu yakwe; mi na ti zivisisa kha kwati ka masiku matako.

Isaya 49:6

A to khene kambe: Ndidotho taku uva txithumi txangu dwe, kasi kuwusa tihunzu ta ka Jakobe, ni kuwuyisa misalelwa ya ka Israyeli; kambe ni ku vekile ku uva liwoningo ka vamatiko, kuva m'hulukisi wangu kala magwito ka mafu.

Masalmo 72:8

Ene a na fume kukhukhela ka limbe linene kala ka limwani, kukhukhela ka mnambo wa Ewufrate kala magemeta-mitshi ka mafu.

Masalmo 22:27

Vathu va yotshe mifumo va na alakanya Mkoma; ngu ka otshe madhawa a ditiko va na wuya kwakwe. Totshe tihunzu ti na mkhozela.

Jobe 19:25

Nguko na tiziva taku Mtiruli wangu wa hanya, niku ngu kugwitisa a na ema txitimwi ka mafu.

Genesisi 49:1

Jakobe a dhani vanana vakwe e va gela tiya: Tshanganani nguko ni lava ku mi gela ti ti no mi humelela ka mbimo yi yitako,

Isaya 25:6

Se Mkoma wa Mabutho a Tiyimbi a na ninga ka mmango wuwa ka votshe vathu, m'buso ngu sihari so nona, m'buso wa vhinya ya yinene, kudya sakudya sa mafura, kuselwa ni vhinya ya yinene, yo surutetwa kha kwati.

Isaya 56:5

Kambe ni na va ninga nyumbani kwangu, ni mndani ka maguma angu, wukhalo ni ditina, sa txhuko kupinda sa vanana va mazambi ni vanana vamahorana; Ni na ninga ditina do mbi na magwito ka mmweyo ni mmweyo, adi di na kwa mbi pfhiteka.

Isaya 65:11

Aniko kwanu mi nga leka Mkoma, mi divalako mmango wangu wo sawuleka, mi lugisako meza ya Gadhi, se mi patelako vhinya yo lumba Meni,

Jeremiya 16:19

O Mkoma, dikhokhola dangu, ni mtamo wangu, ni wuthavelo wangu ngu ditshiku da kuxaniseka! Matiko ma nata kwako ngu magwito ka mafu, ma txi ta kha ona: Vatate vathu thomba yawe i ti ti makuhu ni kutikulisa dwe, si nga si vhuni txilo.

Jeremiya 26:18

Mika a to profeta, ka masiku a Ezekhiya, mfumeli wa ka Judha, e gela votshe vathu va ka Judha, a txi khene: Mkoma wa Mabutho a Tiyimbi a khene: “Siyoni ku na dimwa nga thembwe. Ni Jerusalema ku na maha mmumbu wa marigwi; ni ku kuguleka ka dithepele ku nava mmango wa txitinga.”

Jeremiya 31:12

Vanata va txi embelela ngu litsako aniya mmangoni ka Siyoni, ve tutumela wunene wa Mkoma, amu ka fulaho, ni vhinya, ni mafura, amu ka tihambana ni marole, dihika dawe di na fana ni thembwe yi yi nga nakaniswa, kha va na mbiswa ve dhindirika.

Jeremiya 51:44

Ni na tsayisa Bheli kona Bhabhilona, ni na mkosisa asile a nga si mita, kha na mbi ngadi e dhundwa kambe ngu matiko. Ni diguma da Bhabhilona di wite.

Ezekhiyele 40:2

Ngu txiwoniso txa Txizimu, di to ni yisa ditikoni ka Israyeli, di txi ya ni veka txitimwi ka mmango wo guleka ngutu; ku ti ti ni so fana ni didhoropa di nga akwa, txitimwi ka mimango, ngu didhawa da wulambwe.

Hoseya 3:5

Msana keto, vanana va ka Israyeli va na tshumela ve lava Mkoma, Txizimu txawe, ni Dhavhidha, mfumeli wawe; ka masiku o gwita va na thava Mkoma ni wumbilu wakwe.

Zakariya 8:22

Ngu kumaha keto, ku nata vathu vavangi, ni matiko a mitamo ngutu, ve ta lava Mkoma wa Mabutho a Tiyimbi kona Jerusalema, ni kukombela makatekwa ka Mkoma.

Zakariya 14:9

Se Mkoma a na maha mfumeli txitimwi ka otshe mafu, ka ditshiku donedo, mmwani a na va Mkoma, se mmwani a na va ditina dakwe.

Zakariya 14:10

Dotshe ditiko di na maha libala, kukhukhela Gebha kala Rimoni, ngu wulambwe ka Jerusalema; ene a na guletwa, ni kuaketwa wukhaloni kwakwe, kukhukhela ka txike txa Bhenjamini, kala ka wukhalo wa txike txo khata, kala ka txike txa Dikhonani, ni kukhukhela ka txitezi txa Hananeli, kala ka mapipa a mfumeli.

Masalmo 22:28

Nguko Txizimu i Mfumeli, ngu txona txi fumako vathu votshe.

Masalmo 48:2

Siyoni, mmango wo tshura ngutu kupinda yotshe mimango, litsako la mafu otshe, ngu wona mmango wa ditshuri wa Txizimu.

Masalmo 68:17

Sikotxikani sa Txizimu magumi mambidi a ma 1.000 a ma 1.000 ni ma 1.000; Mkoma a tile ngu Sinayi a txi ta wukhaloni ko sawuleka.

Masalmo 87:1

Mkoma a akile didhoropa dakwe txitimwi ka mmango wo sawuleka.

Masalmo 87:2

Ene wa di dhunda didhoropa da Jerusalema, wa ma dhunda matimba a Siyoni. Kupinda tinyumba totshe ta ka Jakobe.

Masalmo 102:23

Ene a ni hungute mitamo hagari ka nzila, a komisile masiku a kuhanya kwangu.

Isaya 60:3

Se matiko ma na tsimbila liwoningoni kwako, ni vafumeli va na tsimbila ka liwoningo li li nga kuveleka.

Isaya 66:23

Se ku na maheka taku, kukhukhela ka M'buso wa Kumeka ka Mtxima, kala ka wumwani, ni kukhukhela ka Sabbata kala ka yimwani, va nata votshe vathu, ve ta khozela masoni kwangu, kuwomba Mkoma.