Isaya 2:11 - Bhiblia Yo Sawuleka

¹¹ Maso a vathu vo ti kulisa ma na pfhupeliswa, ni kutikulisa ka vavamna ku na vekwa hahatshi, Mkoma ngene dwe a no dhumiswa ka ditshiku donado.

Isaya 2:11 Referans Kwoze

Masalmo 18:27

Awe wa hulukisa avale va ti vekako hahatshi kambe wa wisa hahatshi avale va ti guletako.

Isaya 2:17

Kutikulisa ka m'thu ku na vekwa hahatshi, ni kutikukumukisa ka wamwamna, ku na wiswa hahatshi; Mkoma ngene dwe a no guletwa ka ditshiku donedo.

Malakiya 4:1

Nguko wonani taku ditshiku dile, dita di txi tura nga m'dhikila; votshe va va ti kulisako ni votshe va va mahako wubihi, va na nga mwasi, se ditshiku di di nota di na va tshokomisa, kuwomba Mkoma wa Mabutho a Tiyimbi, taku kha di na mbi va siyela mkoloti, mwendo didhavi.

Isaya 24:21

Se ku na maheka taku, ka ditshiku dileya, Mkoma a na endela mabutho a txitimwi nzumani, ni vafumeli va mafu, txitimwi ka mafuni.

Isaya 13:11

Se ni na tsayisa mafu ngu mhaka ya kubiha ka ona, ni vabihi ngu mhaka ya sionho sawe, ni na heta kutikulisa ka va makolo, vanyamitamo ni vathu wo ti guleta ni na va veka hahatshi.

Isaya 12:4

Se ka ditshiku donedo, mi na khanu: Bongani Mkoma, mi pfalisa ditina dakwe, gelani vathu simaho sakwe, embelelani ti to ditina dakwe di txitimwi ngutu.

Mika 4:6

Ka dona ditshiku dile, kuwomba Mkoma: Ni na sengeleta vale va nga ti ti khwita, kambe ni na wuyisela vale ni nga ti ti va tovete, ni vale ani ni nga ti ti va xanisile.

Hoseya 2:18

Se ka ditshiku dile ni na maha ngu vona txitumelelano, ni sihari sa tshofu sa txitinga, ni sinyana sa nzumani, ni sihari so tsimbila ngu mrumbu sa ha mafuni; kambe ni na thavisa wulaho ni ditxhari, ni gumisa ni yimbi ditikoni, ni va maha ve zumba ngu kutsana.

Ezekhiyele 39:22

Va nyumba ya ka Israyeli, va na tiziva taku ani ngani Mkoma, Txizimu txawe, kukhukhela ka ditshiku dile, ni kuya masoni.

1 Pedro 5:5

Nananu, vavaphya, ti vekeni hahatshi ka madhota. Ambalani moya wa kutiveka hahatshi, mmwani masoni ka mmwani; nguko, Txizimu txi nyenyana ni va va kutikulisa, kambe txi ninga makatekwa a txona ka vale va kutiveka hahatshi.

2 Vakorinto 10:17

Awu a ti dhumisako a na ti dhumise ditinani ka Mkoma.

2 Vakorinto 10:5

ni wotshe mtamo wa kutikulisa wu wu lwako ni kuziva ka Txizimu. Ha khozisa mialakanyo yotshe yi txi maha ya kuengisa Kristu.

Luka 18:14

“Na mi gela ku khani awuwa ngene a nga tshumela e tsula m'tini kwakwe, a di basisilwe, ani wule mmwani mahala, nguko awuwa a ti guletako, a na vekwa hahatshi, ani wu a ti vekako hahatshi, a na guletwa.”

Zakariya 9:16

Se Mkoma, Txizimu txawe, ka ditshiku donedo, a na va hanyisa, kufana ni mtxhambi wa vathu vakwe; nga marigwi a m'bhoti, va na guletwa ditikoni kwawe.

Zefaniya 3:16

Ka ditshiku dileya, ku na wombwa ka Jerusalema ti taku: U nga thave awe Siyoni, mawoko ako ma nga gume mtamo.

Zefaniya 3:11

Ka ditshiku dile, khu na mbi wa tingana ngu mthumo wako ni wawumwewo, awu u nga ni lwisa ngu wona; sekoko ni na thavisa hagari kwako, ava va giyako ngu kutikulisa, se awe khu na mbi ngadi u txi ti kukumukisa kambe, mmangoni kwangu ko sawuleka.

Mika 5:10

Se ku na maheka ka dile ditshiku, kuwomba Mkoma ku khene: Ni na fuvisa hagari kwako mahantxhi ako, kambe ni na khundumusela sikotxikani sako;

Obhadhiya 1:8

Kambe kha ti na mbi humelela ka edo ditshiku, kuwomba Mkoma; dile ni no lovisa titxhari ta Edhomi, ni kupfana mmangoni ka Esawu kani?

Amosi 9:11

Ka ditshiku dile, ni na tshumela ni guleta ditenda da Dhavhidha, di nga wa, ni vhaletela amule ku nga vharuka, ni tshumela ni wusa marumbi, ni ma aketa kufana ni masiku a kale;

Joyeli 3:18

Se ku na maheka taku ka ditshiku dile, mimango yi na vhelisa vhinya ya yiphya, simangwanani ku na khulunga masi, yotshe minambo ya ka Judha yi na va yi di tate ngu mati; se ku na huma txisima ngu Nyumbani ka Mkoma txi theletela mkovani ka Sitime.

Hoseya 2:21

Se ku na maheka ka dona ditshiku dile ani ni no xamula, kuwomba Mkoma, ani ni na xamula nzuma, kambe yona yi na xamula mafu.

Hoseya 2:16

Se ku na maheka ka dona ditshiku dile, kuwomba Mkoma, ti to u ni dhana, ku khawe: “Mkatangu, kambe khu na mbi ni dhana kambe ku khawe: Bhahali wangu.”

Ezekhiyele 39:11

Ku na maheka taku, ka ditshiku dile, Goge ni na mninga wukhalo kona Israyeli, wa kutshotshwa ka wona, i ku mkova wa vale va pindako wutxani ka linene; se va na xamala va le va no pinda ngu kwakwe; a na tshotshwa kona Goge ni dotshe dibutho dakwe, se va na kha vona Mkova wa Dibutho da Goge.

Ezekhiyele 38:19

Nguko ku ti hita kwangu ku ni gete, amu ka mndilo wa kuhenya kwangu, taku ka dona ditshiku dile ku nava ni kudhudhumela ka hombe, txitimwi ka ditiko da ka Israyeli,

Ezekhiyele 38:14

Ngu tona eto, profeta awe mwanana wa m'thu, u txi khawe ka Goge: Mkoma Txizimu a khene: Ina khu na mbi tiziva ka dona ditshiku dile, mbimo yile vathu vangu va ka Israyeli, va no zumba ngu kutsana kani?

Jeremiya 9:24

Aniko awu a ti dhundako e ti dhundela ka yiya mhaka, ti taku a di ni kupfisisa e ni ziva, ti taku ngani Mkoma ni mahako wumbilu, ni kupamula ni wululamo ha mafuni; nguko na xalaliswa ngu sa ku ngeto, kuwomba Mkoma.

Isaya 52:6

Ngu kumaha keto, vathu vangu va na ziva ditina dangu, ngu mhaka yiya ka ditshiku dile, nguko ani nipune ngani ni wombako: “Ngani wuwa!”

Isaya 37:23

U sote mani, niku u ruketete mani kani? Niku u kwangute u txi wukela mani, kambe u gulete mani maso kani? U wukete Msawuleki wa Israyeli!

Isaya 30:23

Sekoko a na nisa mati txitimwi ka mbweu yi u no phaya mafuni; kumweko ni dipawu dadiphya da mafuni; mafu ma na nona me pfuna; ka ditshiku dile, sifuyo sako si nadya ka makhalo o anama a wudyiselo.

Isaya 29:18

Se ka ditshiku dile, maphanzeve ma napfa mapswi a dibhuku, ni mabhofu ma na thaviswa mphume me wona txidemani.

Isaya 28:5

Ka ditshiku dile, Mkoma wa Mabutho a Tiyimbi, a na va i ti m'bhoti wa wudhumo, ni m'bhoti wo tshura ka misalelwa ya vathu vakwe.

Isaya 26:1

Ka ditshiku dile, ku na embelelwa ndando ditikoni ka Judha: Hi ni didhoropa do tsana, adi Txizimu txi nga veka ka dona kuhuluka ngu maguma ni tibhingo.

Isaya 25:9

Se ka ditshiku donedo, va na kha vona: Wonani Txizimu txathu, hi nga ti txi verela, txi na hi hulukisa; awuwa ngene Mkoma, wule hi nga txi m'verela; hi na m'guleta ni kutsaka, kuhanyisani kwakwe.

Isaya 12:1

Se ka ditshiku donedo, u na khawe: Na ku bonga, Mkoma, nguko hambi ku u nga ni henyela, kuhenya kwako ku gumile, se u ni tsakisile.

Isaya 4:1

Se mtxhanu wa vavasikati ni vambidi, ka dona ditshiku dile, va na ti ñolela wamwamna mmweyo, va txi kha vona: Athu hi nadya sakudya sathu ni kuambala syambalo sathu; ho lava dwe ti to hi dhanwa ngu ditina dako; hi thavise tingana tathu.

2 Vatesalonika 1:10

mbimo yi a nota ka edo ditshiku, kasi ku ta dhumiswa hagari ka vasawuleki vakwe, ni ku ta xamalwa hagari ka vale va nga kholwa kwakwe, kufana ni nanu mi nga amukela wufakazi wathu.

2 Samuwele 22:28

Se awe wa txhatxhisa vathu va va xanisekako, aniko maso ako ma wukela vale va ti guletako, kambe awe wa va wisa hahatshi.

Masalmo 20:8

Vona va humbwa va txi wa hahatshi, aniko, athu hi tseramile hi di tsani.

Masalmo 46:10

“Emani! Ti ziveni ti to ani ngani Txizimu! Ni na guletwa hagari ka mifumo, ni wa hombe txitimwi ka otshe mafu!”

Mavingu 30:13

Ku ni liveleko lo ti wona li ti gulekile, ni timboni ta kona ti kombako txitimwi.

Isaya 23:9

Mkoma wa Mabutho a Tiyimbi, ngene a nga lulamisa txikungo txiya, kasi kuonha ku tikulisa ka sotshe siphatiphati, ni kuveka hahatshi vale vo dhundeka ngutu va ha mafuni.

Isaya 30:18

Ngu mhaka yeto, Mkoma a na verela ku mi mahela wumbilu; kambe ngu kumaha keto, a na guletwa kasi ku e mi pfela wusiwana, nguko Mkoma Njizimu to dinganisa. Va katekile votshe vale va thembako kwakwe.

Mika 2:3

Ngu toneto, Mkoma a khene: Wonani taku ni na yisa wubihi ka liveleko liya, ka lona kha mi na mbi thavisa tithamo tanu, se kha mi na mbi tsimbila ngu matshanza, nguko mbimo yi na va yi di bihile.

Masalmo 18:28

Mkoma, awe u liwoningo langu, awe, Txizimu txangu ngawe u woningako mtema wangu.

Masalmo 46:11

Mkoma wa Mabutho a Tiyimbi ana ni nathu Txizimu txa Jakobe ngu txona i ku wuthavelo wathu!

Masalmo 94:2

Awe, u ku mlamuli wa ditiko, khukha u txi ninga va va kutikulisa, txhatxhazelo yi va fanelako ku yi amukela!

Mavingu 16:5

Ni wihi a ku ni mbilu yo ti kulisa njinyenyeko ka Mkoma; hambi a txo pata dianza ka dianza, kha na mbi huluka kutsayiswa.

Isaya 10:12

Ngu kumaha keto, mbimo yile Mkoma a no heta wotshe mthumo wakwe mmangoni ka Siyoni, kona Jerusalema, sekoko ni na tsayisa mihando ya mfumeli wa Asiriya, ngu mhaka ya kutikulisa ka mbilu yakwe, ni kutiguleta masoni kwakwe.

Isaya 14:15

Hambi keto, u na yiswa mndiloni, ka diphala do hokoma.

Isaya 40:23

awu a tshumetako vathangeli ve maneka i si nga va txilo, kambe a maha ti to valamuli va ditiko va si vhuni txilo.

Jeremiya 12:9

Ina thomba yangu yi kwangu nga txinyana txa matshakatshaka. Ti di ngeto, makoti a na va wukela ngu ka otshe madhawa. Tsulani mi txi ya mananisa sotshe sihari sa txitinga, si na yi khobweta.

Dhaniyeli 4:34

Aniko kugumani ka masiku ale, ani Nebhukodhonosori, ni to gula maso angu ni wona nzumani, se mapimo angu ma to wuya. Koneko ni to bonga Nyatxitimwi, ni dhumisa ni kulisa wule a hanyako ngu yotshe mbimo, nguko kufuma kwakwe ngu fuma ko mbi gwita, ni mfumo wakwe bwa liveleko ni liveleko.