Isaya 19:16 - Bhiblia Yo Sawuleka

¹⁶ Ka yona yile mbimo, Vaegipta va na nga vavasikati, va na dhudhumela, va na thava ngu mhaka ya kuthuma ka dianza da Mkoma wa Mabutho a Tiyimbi, nguko di na guleka di va wukela.

Isaya 19:16 Referans Kwoze

Nahume 3:13

Wona taku vathu vako, a va va ku hagari kwako, va na nga vavasikati; sike sa ditiko dako, si tulekile ka valala vako; mndilo wu na tshokomisa sikhoto sa tisimbi.

Jeremiya 51:30

Avale va ku ni mitamo amu Bhabhilona va lekile kulwa, va mule ko wonelela, yi gumile mitamo yawe, va txi nga mbavasikati: Ti hisilwe tinyumba mitini kwawe, kufunyilwe sikhweketo.

Jeremiya 50:37

Di nata ditxhari txitimwi ka mahantxhi awe, ni txitimwi ka sikotxikani sawe, ni txitimwi ka votshe vathu va va nga patanelana, va ku hagari ka dona; se vona va na nga vavasikati: Ditxhari di nata txitimwi ka tithomba tawe, ti na honyolwa.

Isaya 11:15

Se Mkoma a na khundumusa do gwita diwoko da Linene la Egipta, a na guleta dianza dakwe e wukela mnambo ngu mtamo wa moya wakwe, e wu peka wu maha mtxhanu wa minambo ni yimbidi, ti to ni wuhi e txhatuka a di ni tikathula.

Zakariya 2:9

Nguko wonani taku, ni na guleta dianza dangu txitimwi kwawe, se vona va nata maha sikarawa, sa va va nga va thumela. Ngu kumaha keto, mi na tiziva tito, Mkoma wa Mabutho a Tiyimbi a ni rumile.

Isaya 10:32

Ka ditshiku donedo, a na hoka Nobhe, e kombisa txibhakela mmangoni ka dihorana da Siyoni, ni ka mmango wa Jerusalema.

Vahebheru 10:31

Ta thisa ngutu kuwela manzani ka Txizimu txi txi hanyako.

Isaya 30:17

1.000 wa vavamna, va na tutuma, ngu kuviketwa ngu wammweyo, se ku txo viketa va mtxhanu, motshenu mi na tutuma, kala kuza mi lekwa mi di songile nga phande tshokani ka mimango, ni kufana ni m'jeke tximangwanani.

Masalmo 48:6

Va to telwa ngu dizowa va txi pandiseka kufana ni wamsikati wu a lumwako ngu txirumbu;

1 Vakorinto 2:3

Ni tile masoni kwanu ni di ni dizowa ni kuthava ni kudhudhumela ka hombe.

2 Vakorinto 5:11

Ngu konaho, ngako hi zivako kuthisa ka Mkoma, ha khongotela ti to vathu ve kholwa ka Txizimu, txona txa tiziva kha kwati ati hi nga zumbisa tona, kambe na kholwa ti to ha zivaneka kha kwati ni kona livhaloni kwanu.

Isaya 13:2

Gwimbani m'jeke txitimwi ka mmango wa kwa mbi na txilo; va dhaneni ngu dipswi do guleka, mi va dyoweta ngu dianza, kasi kuva txi wulela ngu sike sa vathangeli.

Eksodha 11:6

Ngu konaho ditikoni kotshe ka Egipta ku na vaho tihuwa ta masaluko a hombe, aale ma si ziviko ku nga maheka, kukhukhela ka kale, kha ku na mbi vaho kambe ni ka tximwani txikhati.

Obhadhiya 1:9

Se tindena tako, awe Temani, ti na dhukiswa, kasiku ngu mmangoni ka Esawu, ti txi dawa, yimweyo-yimweyo.

Zakariya 2:13

Yothse nyama yi na malale masoni ka Mkoma, nguko ene a wukile ka wukhalo wakwe wo sawuleka.

Zakariya 10:11

Ene a na txhatuka linene ngu kukarateka, se a na peka mavimbi a linene, kambe kotshe kutshima ka minambo ku na oma, sekoko kutikulisa ka Asiriya ku na wiswa, ni ndonga ya Egipta yi na khukha.