Isaya 17:3 - Bhiblia Yo Sawuleka

³ Se mkhokhola wa Efrayime wu na lova, kumweko ni mfumo wa Dhamasku, ni m'boti wa Siriya; yi na nga wudhumo wa vanana va Israyeli, kuwomba Mkoma wa Mabutho a Tiyimbi.

Isaya 17:3 Referans Kwoze

Hoseya 9:11

Ka Efrayime, wudhumo wakwe wu na puruma ku nga txinyana; kha ku na mbi va ni liveleko, kha ku na mbi va ni vanana, hambi sirumbu.

Isaya 8:4

Nguko mwanana na a sinzi kuziva kuwomba ku tate wangu, mwendo ku mame wangu, tithomba ta Dhamasku ni simaha si si nga honyolwa Samariya, si na yiswa masoni ka mfumeli wa Asiriya.

Isaya 7:16

Ngu ditshuri, mwanana wuwa, a sinzi kuziva kulamba to biha ni kusawula tinene, ditiko edo u thavako vafumeli vambidi va dona, di na maha dirumbi.

Isaya 7:8

Nguko m'zinda ka Siriya ngu Dhamasku, ni msungo wa Dhamasku i Rezimi; se mndani ka mtxhanu wa magumi ni dimwedo, ni mtxhanu wa malembe, Efrayime a na xaselwa, e leka kuva ni vathu.

Amosi 8:14

Ava va xambanyako ngu wubihi wa Samariya va txi kha vona: Ndinene ngutu kuhanya ka txizimu txako awe Dhani; kambe ndinene ngutu kuhanya ka nzila ya Bherisebha; vonavo va nawa, kha va na mbi khukha kambe.

Hoseya 10:14

Ngu toneto, hagari ka vathu vako ku na wuka dizunga da hombe, se yotshe mikhokhola yako mi na hoxotwa, ku nga Salimani a nga hoxota Bheti-Arbheli ngu ditshiku da yimbi; mame ahale a phatuletwe ni vanana vakwe.

Hoseya 8:8

Israyeli a khadamutwe; konkuwa, hagari ka matiko a wonekisa ku nga txi maha txi txi si tsakisiko ni wammweyo.

Hoseya 3:4

Nguko vanana va ka Israyeli va na zumba masiku amangi va si na mfumeli, va si na mthangeli, va si na mphaxo, va si na txithombe, va si na efodhe kumbe materafime.

Hoseya 1:6

Se a to tshumela e mana txirumbu e veleka mwanana wa dihorana; se Mkoma a to khene: “Mraye ditina daku i Lo-Ruwama; nguko ani kha ni na mbi tshumela kambe ni pfela wumbilu va nyumba ya ka Israyeli, aniko ni na va tekela sotshe.”

Hoseya 1:4

Se Mkoma a to m'gela ku khene: “Mraye ditina daku i Jezireyeli; nguko mndani ka mbimonyana ni na photela mnoha wa Jezireyeli, txitimwi ka nyumba ya ka Jewu, ni lovisa mfumo wa nyumba ya ka Israyeli.

Isaya 17:4

Se ka ditshiku donedo ku na hungulwa wudhumo wa Jakobe, ni mafura a mmidi wakwe ma na txutxeka.

Isaya 16:14

Aniko, konkuwa, Mkoma a wombile, a txi khene: Mndani ka malembe mararu, ma fanako ni malembe a m'thu wo holelwa, wudhumo wa Mowabhi wu na maha wa kale, ni dotshe dibutho dakwe da hombe; se miboti ya kona yi na va yidotho, kambe kha va na mbiba ni mtamo.

Isaya 10:9

Ina Kalino hi nga ku nga Karkemisi kani? Hamati hi nga ku nga Aripadhe kani? Se Samariya, kha fani ni Dhamasku kani?

2 Vafumeli 17:6

Ka dilembe da digumi ni mune, da kufuma ka Hoseya, mfumeli wa Asiriya a to honyola Samariya, se va ka Israyeli a to va tsulisa Asiriya, kota tikhumbi, eya va veka Hala ni Habhori, hafuhi ni mnambo wa Gozani, ni mu ka madhoropa a Vamidhiyani.

2 Vafumeli 16:9

Se mfumeli wa Asiriya a to mu engisa; sekoko mfumeli wa Asiriya a to lwisa didhoropa da Dhamasku e di teka, vathu va kona a to va tsulisa Kiri, se a to daya Rezini.

Isaya 25:2

Nguko didhoropa u di mahile mmumbu wa marigwi, didhoropa do tsana u di mahile dirumbi, se dizumbo da vamatiko, di nga mahe kambe didhoropa, di nge ngadi di aketwa kambe.