Isaya 16:5 - Bhiblia Yo Sawuleka

⁵ Nguko txikhalo txa wukoma txi na tsaniswa ngu wumbilu, se txitimwi ka txona ku na zumba mlamuli, amu ditendani ka Dhavhidha, awu a no lamula, a lavako wululamo, kambe a kuluvetako kumaha ta tinene.

Isaya 16:5 Referans Kwoze

Dhaniyeli 7:14

Se a to ningwa kufuma, ni wudhumo, ni mfumo, kasi ku votshe vathu, matiko, ni tidimi si mthumela; kufuma kwakwe ngu fuma ka kwa mbi gwita, kha ku na mbi pinda, kambe mfumo wakwe, ngu wona wokha wa kwa mbi khundumuswa.

Mika 4:7

Se avale va nga ti ti khwita ni na va maha miboti, se avale va nga ti ti tsulisilwe kule, va na va ditiko da mtamo; se Mkoma a na fuma txitimwi kwawe mmangoni ka Siyoni, kukhukhela konkuwa kala kupinduka.

Dhaniyeli 7:27

Se mfumo, ni mtamo, ni wuhombe wa mifumo hahatshi ka yotshe nzuma si na ningelwa ka vathu vo sawuleka va Nyatxitimwi; mfumo wawe mfumo wa kwa mbi guma, ni yotshe mitamo yi na mthumela ni ku muengisa.

Zakariya 9:9

Tsaka ngutu awe muhorana wa Siyoni; kulungela awe Jerusalema; wona taku mfumeli wako a nata kwako, wo lulama kambe Muhanyisi; wa txisiwana, a di gadhile mbongola, txitimwi ka tximbongolana, mwanana wa mbongola.

Mavingu 20:28

Wunene ni ditshuri ngu sona si xayisako mfumeli, se wukoma wakwe wu tsaniswa ngu wunene.

2 Samuwele 7:16

Aniko nyumba yako ni mfumo wako si na tsaniswa kala kupinduka masoni kwako; txikhalo txako txa wukoma txi na tsana kala kupinduka.

Amosi 9:11

Ka ditshiku dile, ni na tshumela ni guleta ditenda da Dhavhidha, di nga wa, ni vhaletela amule ku nga vharuka, ni tshumela ni wusa marumbi, ni ma aketa kufana ni masiku a kale;

Isaya 55:4

Wonani taku ani ni m'vekile kuva fakazi ka vathu, kuva mthangeli ni mfumeli wa vathu.

Mavingu 29:14

Mfumeli wu a lamulako sisiwana madingano ni ditshuri, a na tsanisa wukoma wakwe yotshe mbimo.

Masalmo 99:4

Awe u mfumeli wa mtamo, u randa kululama, ngawe u nga tsanisa asi i ku sa fanelo; u lamula ngu fanelo ni kululama vanana va Jakobe.

Masalmo 98:9

masoni ka Mkoma, a tako ku ta lamula ditiko, ku ta lamula ditiko ngu kululama, a txi lamula vathu ngu fanelo.

Masalmo 96:13

tsakani masoni ka Mkoma, nguko wata nguko a tela ku ta vhuna mafu; a na lamula ditiko ngu kululama, ni vathu ngu ditshuri dakwe.

Masalmo 89:14

Mfumo wako wu tsanisilwe ngu kululama ni ditshuri, lirando ni ditshuri si ni nawe masoni kwako.

Masalmo 85:10

Lirando ni ditshuri si na manana; kululama ni kudikha si na pswopswana.

2 Makronika 31:20

Ezekhiya a to mahisa toneto ka ditiko dotshe da Judha, e maha ta tinene, ni to lulama, ni ta ditshuri masoni ka Mkoma Txizimu txakwe.

1 Vafumeli 10:9

A na Bongwe Mkoma Txizimu txako, a nga mana kutsakiswa ngu ngawe, kasi e kuveka ha txituluni ka wukoma ka Israyeli; nguko Mkoma wa randa Israyeli yotshe mbimo; ngu mhaka yeto, a kumahile mfumeli, kasi uva ni kupimisa ni wululamo.

2 Samuwele 23:3

Kuwombile Txizimu txa ka Israyeli Dirigwi da Israyeli di wombile tiya kwangu: Ku nava ni mlulami wu a no fumela txitimwi ka vathu, a na fuma ngu kuthava Txizimu.

2 Samuwele 5:9

Ngu kumaha keto, Dhavhidha a to zumba mkhokholani, e wu dhana ku Didhoropa da Dhavhidha; a to aka madhawani, kukhukhela Milo kala mndani ka dona.

Isaya 33:22

Nguko Mkoma mlamuli wathu, Mkoma mmahi wa milayo yathu; Mkoma ngene Mfumeli wathu, ene a na hi hanyisa.