Isaya 14:1 - Bhiblia Yo Sawuleka

¹ Nguko Mkoma a na pfela wusiwana Jakobe, kambe a na sawula Israyeli, a txi mu veka ditikoni kwakwe. Valuveli va na va kumweko navo, va txi namarela ka nyumba ya va ka Jakobe.

Isaya 14:1 Referans Kwoze

Masalmo 102:13

Wuka, Mkoma, telwa ngu wumbilu ngu Siyoni; se i mbimo ya ku m'divalela! Txi hokile txikhati txa kona!

Zakariya 1:17

Kwangula kambe u txi khawe: A womba tiya Mkoma wa Mabutho a Tiyimbi: Madhoropa angu ma na engeta me anda ni kuhumelela; nguko Mkoma a ngadi a txi na thavelela Siyoni, kambe a ngadi a txi na sawula Jerusalema.

Malakiya 1:11

Se kukhukhela wutxani, kala mswa-ditambo, ditina dangu di na va da hombe hagari ka matiko, aniko ka otshe makhalo, ku na ningelwa dibaselo ni mphaxo wo sawuleka ditinani kwangu; nguko ditina dangu di na va da hombe hagari ka matiko, kuwomba Mkoma wa Mabutho a Tiyimbi.

Jeremiya 50:33

Mkoma wa Mabutho a Tiyimbi a khene: Vanana va Israyeli ni vanana va Judha va khozisilwe kumweko; kambe votshe vale va nga va yisa wukhumbini, va va ñolisisile, kha va lava ku va txhatxha.

Isaya 49:13

Giya awe nzuma, se tsaka nawe mafu, kambe anu mimango kulungelani ngu kutsaka ka hombe, nguko Mkoma a thavelete vathu vakwe, a na pfela wusiwana vaxaniseki vakwe.

Jeremiya 29:14

Ni na manwa ngu nganu, kuwomba Mkoma, ni na tshumeta va va nga ñolwa, ni na mi sengeleta ngu ka otshe matiko, ni ka otshe madhawa, awa ni nga mi hangalasa ka ona, kuwomba Mkoma; ni na tshumela ni txi mi wuyisa ka wukhalo wu ni nga mi tutumisa ka wona, mi txi ya wukhumbini.

Isaya 66:20

Se va na wuyisa votshe vananu, va hagari ka otshe matiko, kasi kumaha mningelo ka Mkoma, na va di txitimwi ka mahantxhi, ni mu ka sikotxikani, ni mu ka misingo, ni txitimwi ka mamula, ni txitimwi ka mibhedhu, mmangoni kwangu ko sawuleka, kona Jerusalema, kuwomba Mkoma, kufana ni kuva vanana va ka Israyeli va txi tisa miningelo yawe ngu ka siya so basa, Nyumbani ka Mkoma.

Isaya 49:7

Mkoma a womba tiya, Mtiruli wa Israyeli, Msawuleki wakwe, ka dihika do eyiswa, do yenywa ngu matiko, ka txithumi txa vale va fumako: Vafumeli va na mu wona va txi khukha, ve ema; vathangeli va na nama masoni kwako, ngu lirando la Mkoma, i ku wo thembeka, ni Msawuleki wa ka Israyeli, a nga kusawula.

Isaya 44:1

Konkuwa koko, engisa awe Jakobe, txithumi txangu, ni nawe Israyeli, awe ni nga kusawula.

Isaya 41:8

Aniko awe Israyeli, txithumi txangu. Awe Jakobe, awe ni nga kusawula, liveleko la Abrahamu, mngana wangu.

Isaya 27:6

Ma nata masiku ale Jakobe a no mila mitwi, se Israyeli a na veka siluva e mila, kambe va na tata mafu ngu mihando.

Masalmo 143:12

Fuvisa valala vangu, ngu mhaka ya wumbilu wako; kambe va khundumuse votshe vale va xomulako m'hefemulo wangu, nguko ani ni txithumi txako.

Masalmo 98:3

A alakanyile lirando lakwe ni kuthembeka kwakwe ka vathu va ka Israyeli. Hambi vathu va va ku magemeta-mitshi ka ditiko va ku woni kuhanyisa ka Txizimu.

Esteri 8:17

Kambe ka otshe matiko a hombe ni ka otshe madhoropa ale di nga ti ti hoka dipswi da mfumeli ni txileleto txakwe, hagari ka Vajudha, ku ti ti ni kutsaka ni wudhundo, masiku a mibuso ya hombe ni a misakano; votala hagari ka vathu va ditiko, va to ti maha Vajudha; nguko Vajudha va ti ti vekelwa txithavo txa hombe.

Luka 2:32

I ku liwoningo la kuwoninga matiko ni txipfaliso txa kudhumisa vathu vako va ka Israyeli.”

Luka 1:54

A vhunetete Israyeli, i ku txithumi txakwe, na a txi alakanya wumbilu wakwe,

Isaya 41:9

Awe ni nga kuteka kukhukhela magwito ka mafu, ni txi kudhana ngu hagari ka makhalo ako amanene ngutu, ni txi khani: Awe u txithumi txangu, ni kusawute, kha na kuleka;

Isaya 45:14

Mkoma a wombisa tiya: Mthumo wa Egipta, ni dibhindu da Vaetiyopiya, ni Vasabhi, vathu va txiemo txo lapha, si na pinda sita kwako, si na kulumba; va na kulondeta, va nata va di sungilwe ngu titxhini, kambe va nata khizama masoni kwako; va na maha mikombelo yawe kwako, va txi kha vona: Kha ditshuri Txizimu txi kwako, kha ku na tximwani txizimu kambe.

Isaya 49:10

Kha va na mbiswa va txi pfa nzala, mwendo ditora, hambi txiwunda mwendo ditambo, kha si na mbi va xanisa, nguko awule a ku ni wumbilu navo, a na va tsimbitisa, e va yisa ngu kuthutha sisimani ka mati.

Isaya 49:15

Ina wamsikati a nga sikota kudivalisa eto mwanana wu a m'wunjako, asi mxanisekeli, mwanana wa mndani kwakwe kani? Aniko hambi i diku o m'divala, ani koko kha ni na mbi kudivala.

Isaya 49:25

Aniko Mkoma a womba tiya: Ngu ditshuri, tikhumbi ti nga thaviswa ka ndena, se sile si nga handwa ngu wa mtamo si na huluka; nguko ani ni nalwa ni vale valwako ni nawe, Kambe ani ni na hulukisa vanana vako.

Isaya 54:3

Nguko u na nava u txiya ka dianza da txinene, se liveleko lako li na lumbwa ngu matiko, li txi wusa madhoropa ale ma nga sala i di marumbi.

Isaya 55:7

M'bihi a na leke nzila yakwe, m'thu wa kwa mbi lulama a na leke mipimiso yakwe, se a na hundulukele ka Mkoma, ene a na mpfele wusiwana; a na tshumelele ka Txizimu txathu, nguko nja hombe ngutu mu ko divalela.

Isaya 56:3

Se mwanana wa mluveli wule a ti ningelako ka Mkoma, a nga wombe ku khene: “Mkoma a na ni hambanisa ni vathu vakwe do gwuita”; hambi ni ka kudotho wu nga wombe mthenwa wu txi kha wona: Wonani taku ani ni mndonga wa kuoma.

Isaya 60:10

Se vanana va vamatiko va na aka maguma ako, ni vafumeli vako va na kuthumela, nguko, kuheyani kwangu ni ku pekile, aniko ka wunene wangu, ni ku pfete wumbilu.

Isaya 60:14

Kambe va nata ve ta nama kwako, vanana va vale va nga kuxanisa, ve ta khizama mikondoni kwako, votshe vale va nga kutxhipisa, se va na kudhana ku Didhoropa da Mkoma, i ku Siyoni wa Msawuleki wa Israyeli.

Ezekhiyele 47:22

Eko mi na xola maabanelo a thomba, ni yi yo ninga valuveli vale va ku hagari kwanu, va nga veleka vanana hagari kwanu; va na nga sizikwa hagari ka va ka Israyeli; va na mana thomba kumweko ni nanu, hagari ka tihunzu ta ka Israyeli.

Masalmo 102:14

Sithumi sako sa ma randa marigwi akwe, si na ni wusiwana ngu marumbi akwe.

Isaya 19:18

Ka yona yile mbimo, ku nava ni mtxhanu wa madhoropa ditikoni ka Egipta, ma no womba-womba lidimi la Kanana, se ma na maha txixambanyo ka Mkoma wa Mabutho a Tiyimbi; dimwedo di na dhanwa ti to Didhoropa da Kuloviswa.

Isaya 21:1

Mahungu a txiwula txa linene. Kufana ni sihuhuri sa Wulambwe, si wisetela sotshe, a nata ngu txiwulani, ka ditiko do thisa.

Isaya 47:1

Txhika u khalahatsha ha lithuluni, awe wotuma, mwanana wa muhorana wa Bhabhilona; khalahatsha hahatshi; kha ku ngadi ni txitulu txa wukoma, awe mwanana wa muhorana wa Vakaldheya, nguko khu na mbiswa u dhanwa ku umnene, niku u tshurile.

Jeremiya 16:15

Aniko va na kha vona: Mkoma a hanyako, awu a nga humisa vanana va ka Israyeli ngu ditikoni ka Wuphemba, ni ka otshe matiko awa a nga ti va tutumisete ka ona. Ni na va wuyisa kambe ditikoni kwawe adi ni nga ninga vatate vawe!

Jeremiya 30:8

Nguko ka ditshikwedo, kuwomba Mkoma wa Mabutho a Tiyimbi, ni na funya dikange thamoni kwako, ni bhenula majoke ako, kha va na mbiswa ve fumwa ngu vamatiko.

Jeremiya 31:4

Ni na kuaketa, u na va u di akilwe, awe wotuma wa Israyeli; u na tshumela u txi ti longisela sikhiti, u txi huma kuya sinya ngu kutsaka.

Jeremiya 51:51

Mi na khanu: Hi thetwe tingana, nguko hi pfite txiruko; tingana ti fenengetile tikhohe tathu, nguko vamatiko va wulete makhaloni ko sawuleka a Nyumbani ka Mkoma.

Ezekhiyele 16:60

Hambi keto, ani ni na alakanya txitumelano txi ni nga txi maha ni nawe, ka masiku a wuhorana wko; kambe ni na maha ni nawe txitumelelano txa kwa mbi gwita.