Isaya 10:22 - Bhiblia Yo Sawuleka

²² Nguko hambi ku vathu vako, awe Israyeli, va fanako ni mtxhefa wa lineneni, miboti yokha ngu yona yi no hulukiswa; kulovisa kutsanisilwe, ka thekelela ngu kululama.

Isaya 10:22 Referans Kwoze

Isaya 6:13

Kambe ngako ku txi sala mmweyo hagari ka va digumi, nene a na pinda hagari ka mndilo, kufana ni mndonga wa mkusu ni wa mtshula, hambi yi di witwe, txitsha txa thunga, txi humisa mazokoro. Se mbewu yo sawuleka, i nava kutsana kwakwe.

Mtuletelo 20:8

a na huma kasiku e kanganyisa mifumo ya mune wa madhawa a mafu, Goge ni Magoge, e va tshanganisa kasiku ve lwa yimbi; mtengo wawe wu ti dingana ni kutala ka mafu a linene.

Dhaniyeli 9:27

Aniko ene a na tsanisa txitumelelano ni votala ngu divhiki dimwedo; se ka hafu ya divhiki a na emisa miphaxo ni miningelo ya sakudya; muhoxoti a nata ngu tibhapini ka vanyenyeki, kambe eto ngu ha ku sigwitiko; ni sile si nga emiswa si na theketwa txitimwi ka muxaseli.

Varoma 2:5

Kambe ngu kubanga ka mbilu yako, ayi yi si laviko kuhunduluka, wa ti sengeletela txiviti txi u nota txi mana ka ditshiku da txiviti, ahawa ku nota humelela kulamula ku ko lulama ka Txizimu;

Mithumo 17:31

Nguko Txizimu txi vekile ditshiku di txi no lamula mafu ngu dona, ngu malamulelo o lulama, ngu m'thu wu txi nga ti sawulela ene, txi tsanisa mhaka yiya ka votshe ngu ku mu wusa ka vakufa.”

Isaya 8:8

a na wulela ditikoni ka Judha kufana ni ndambi, e kukumuka kala mikoloni ka vathu. Kunawuluka ka tibhapi tako, ku na fenengeta kuanama ka ditiko dako, awe Emanuweli.

Isaya 6:11

Sekoko ani ni to khani: Kala yihi mbimo kani Mkoma? A to xamula a txi khene: Kala kuza madhoropa me maha marumbi, kupwateka ni vaaki, ni tinyumba ti si nga ni vathu, ni ditiko dotshe di maha dirumbi.

1 Vafumeli 4:20

Kunene, va ka Judha ni va ka Israyeli i ti vavangi, kufana ni mtxhefa wa mabambe ka linene, ngu wungi wawe, vedya, ve sela, ni kutitsakela.

Genesisi 18:25

Lambi, ti nave kule ni nawe eto ta kufuvisa valulami kumweko ni vabihi, u txi teka mlulami ni m'bihi u txi va maha vamwevo. Eyo mapimo ma nave kule ni nawe. Mlamuli wa ditiko dotshe, kha na mbi lamula ngu kululama kani?”

Hoseya 1:10

Ngu kumaha keto, mtengo wa vanana va ka Israyeli u na nga mtxhefa wa lineneni, awule wu si pimwiko mwendo kubalwa; se ku na maheka tito, ka wukhalo wu va nga gelwa ku kha vona: Anu kha mi nga vathu vangu, va na kha vona: Anu mi vanana va Txizimu txi txi hanyako.

Isaya 46:3

Ni engiseni anu va nyumba ya Jakobe, ni motshenu mi nga sala va nyumba ya ka Israyeli; anu ni nga mi khutarela ngu mawoko kukhukhela mndani, ni mi beleka kukhukhela mndani ka mame.

Isaya 48:19

Hambi liveleko lako li ndi na fana ni mafu, ni vale va humako disembeni kwako, va ndi na tala nga mtxhefa wa lineneni; ditina dako di si dhuki di thaviswa, hambi kuloviswa masoni kwangu.

Isaya 60:22

Vathu vavadotho va na va 1.000; ni vavadotho ngutu, va na va vathu vavangi ngutu. Ani Mkoma, ngu mbimo ya kona, ni na ti maha eto.

Isaya 65:8

Mkoma a womba tiya: Kufana ni kungako ku txi manwa dosi amu ka txizangwa txa mauvha, va kha vona: U nga txi xakele, nguko ku ni makatekwa ka txona, ni na mahisa toneto ngu kuranda sithumi sangu, kasi ku ni si va hoxoti votshe.

2 Vafumeli 19:31

Nguko ngu Jerusalema ku na huma vale va nga sala, se ngu mmangoni ka Siyoni avale va nga huluka; kuthembeka ka Mkoma ku na maha eto.

Isaya 37:31

Nguko avale va nga huluka va nyumba ya ka Judha, vale va nga sala, va na tshumela ve zima mikoloti hahatshi, kambe va na wonekisa mihando txitimwi.

Isaya 59:20

Se ku nata Muhanyisi ka Siyoni, ni ka va ka Jakobe avale va nga leka tinzila to biha, kuwomba Mkoma.

Jeremiya 3:14

Wuyani, anu vanana vo tiwuka, kuwomba Mkoma, nguko ni nyamne wanu. Ni na teka mmweyo ka m'ti ni m'ti, ni vambidi ka lihunzu ni lihunzu, mi siya Siyoni.

Jeremiya 44:28

Se avale va no huluka ditxhari va na khukha ngu ditikoni ka Egipta va txiya ditikoni ka Judha, na i ti vadotho ngu mtengo; se yotshe misalela ya ka Judha yile yi nga wulela ditikoni ka Egipta, kuya luvela kona, yi na tiziva taku ngu kuhi kuwomba ku nga tatiseka, ngwangu mwendo ngwawe.