Isaya 10:12 - Bhiblia Yo Sawuleka

¹² Ngu kumaha keto, mbimo yile Mkoma a no heta wotshe mthumo wakwe mmangoni ka Siyoni, kona Jerusalema, sekoko ni na tsayisa mihando ya mfumeli wa Asiriya, ngu mhaka ya kutikulisa ka mbilu yakwe, ni kutiguleta masoni kwakwe.

Isaya 10:12 Referans Kwoze

2 Vafumeli 19:31

Nguko ngu Jerusalema ku na huma vale va nga sala, se ngu mmangoni ka Siyoni avale va nga huluka; kuthembeka ka Mkoma ku na maha eto.

Jeremiya 50:18

Ngu toneto, a khene kha Mkoma wa Mabutho a Tiyimbi, Txizimu txa Israyeli: Wonani ti to ni na tsayisa mfumeli wa Bhabhilona ni ditiko dakwe, nga tile ni nga mahisa tona ka Asiriya.

Isaya 65:7

sionho sanu, kumweko ni sionho sa vatate vanu, kuwomba Mkoma, avale va nga hisa dibaselo mimangoni, ni ku ni ruketela simangwanani; ngu mhaka yeto, ni na tshumela ni va pimela mithumo yawe ya kale, masoni kwawe.

1 Pedro 4:17

Nguko yi hokile mbimo ya kukhata ngu Nyumba ya Txizimu yi txi lamulwa. Se ngako ku txi khatwa ngu ngathu njiavelo muni va nota txi mana ava va si engisiko Evhangeli ya Txizimu, kani?

Matewu 15:19

Nguko mbiluni, ngu kona kuhumako mialakanyo yo biha, kudaya, wugelegele, wugango, wukhamba, kusingeta ni kuruketela.

Matewu 12:33

“Mi txi womba ti to mndonga wuwa mbunene, mihando ya wona ni yona njinene, mwendo kambe mi txi womba ti to mndonga wuwa wu bihile, mihando ya wona ni yona yi bihile; nguko mndonga wu ziwa ngu mihando ya wona.

Dhaniyeli 4:37

Se konkuwa koko, ani Nebhukodhonosori, na bonga, na guleta ni kudhumisa Mfumeli wa nzumani; nguko mithumo yakwe yotshe di ditshuri, ni tinzila takwe do lulama, kambe wa sikota kuveka hahatshi a vale va tikulisako.

Ezekhiyele 31:14

kasi ku yotshe mindonga ya hafuhi ni mati, yi si ti guleti ngu mhaka ya txiemo, hambi kuhumisa tshoka hagari ka madhavi o txhuma, ni ale ma selako mati, ma si ti thembiseli mapune, ngu mhaka ya kulapha ka ona; nguko otshe ma dingana kufa, kala hahatshi ngutu ka mafu, hagari ka vanana va vathu, ni vale va relelako diphalani.

Ezekhiyele 31:10

Ngu tona eto, Mkoma Txizimu a khene: Ngako u nga guleka ngu txiemo, tshoka yako yi txi lapha hagari ka madhavi o txhuma, se mbilu yako yi txi ti kulisa ngu kulapheko,

Isaya 50:11

Anu motshenu mi dhivelako mndilo, se mi ti ranganyeta ngu titshatsha, tsimbilani hagari ka midhikila ya mndilo wanu, ni hagari ka titshatsha tile mi nga ti dhivela; eto ti ta ngu ka dianza dangu, kambe mi na zumba kuxanisekani.

Isaya 27:9

Ngu mhaka yeto, txi na thaveka txionho txa Jakobe, se awuwa wu na va m'hando wotshe wa kuva ku di thavisilwe txionho txakwe; mbimo yi a no maha ti to, otshe marigwi a ha txiluveloni, kufana ni marigwi a dibumba, ma nga khundumuselwa, tiphande ni sithombe sa ditambo, kha si na mbi ema

Isaya 9:9

Se votshe vathu vava va na tiziva, Efrayime ni vaaki va Samariya, vale va wombako ngu kutikulisa ni kutiguleta ngu timbilu, va kha vona:

Isaya 5:15

Sekoko tinganakana ti na xowoka, ni va va ti guletako, va na wa. Ni maso a vale va ti guletako, ma na wiswa tingana.

Isaya 2:11

Maso a vathu vo ti kulisa ma na pfhupeliswa, ni kutikulisa ka vavamna ku na vekwa hahatshi, Mkoma ngene dwe a no dhumiswa ka ditshiku donado.

Mavingu 30:13

Ku ni liveleko lo ti wona li ti gulekile, ni timboni ta kona ti kombako txitimwi.

Masalmo 76:10

Txiviti txako txa kuhenyela vabihi txa hinduka txi maha wudhumo wako; vathu va va nga huluka kufa ngu yimbi va na maha m'buso wa ku kualakanya!

Masalmo 21:10

U na fuvisa mihando yawe ha mafuni, kuwalo ni wammweyo a no sala a txi hanya.

Masalmo 18:27

Awe wa hulukisa avale va ti vekako hahatshi kambe wa wisa hahatshi avale va ti guletako.

Masalmo 76:5

Tindena ta hombe ti honyoletwe sa tona hambiko i nga ti vanyamitamo, kha va sikota kumaha txilo se va otete wukohe wawe wa magwito!

Isaya 24:21

Se ku na maheka taku, ka ditshiku dileya, Mkoma a na endela mabutho a txitimwi nzumani, ni vafumeli va mafu, txitimwi ka mafuni.

Isaya 27:7

Ina ene a ngava a di dayisile Israyeli, kufana ni tile a nga dayisisa tona vale va nga m'dayia kani? Mwendo ene a va date kufana ni tile a nga dayisa tona vale va nga dawa ngu ngene kani?

Isaya 29:14

Wona taku, ni na simama ni maha mthumo wo xamalisa hagari ka vathu vava; i ku mthumo wo xamalisa, kambe wo thisa, nguko wutxhari wa titxhari tawe, wu na fuva, ni mapimo a vathu vawe vo ziva, wu na sisala.

Isaya 33:1

Dikhombo kwako u handako na u sa handwa, awe u kanganyisako vale, va nga mbi kukanganyisa! Mbimo yi u no heta kuhanda, u na handwa; u txi na heta kukanganyisa, u na kanganyiswa nawe.

Isaya 37:23

U sote mani, niku u ruketete mani kani? Niku u kwangute u txi wukela mani, kambe u gulete mani maso kani? U wukete Msawuleki wa Israyeli!

Isaya 37:29

Ngu mhaka ya ku ni henyela kwako, niku kutithemba kwako ku pfate tinzeveni kwangu, wona taku, ni na vekela tximemba txangu thonvuni kwako, ni matomu angu txisofuni kwako, ni kutshumeta ngu nzila yi u ngata ngu yona.

Jeremiya 25:29

Nguko hi nga wonani didhoropa di di dhanwako ngu ditina dangu, na khata ku di tsayisa; ina anu mi na lekwa mi si tsayiswi kani? Kha mi na mbi divalelwa, nguko ni na xomisa ditxhari, di na peka votshe vazumbi mafuni, kuwomba Mkoma wa Mabutho a Tiyimbi.

Jeremiya 50:32

Awule wa kutikulisa, a na ti guta a txi wa, kha ku na mbi va ni wammweyo wa ku mu wusa; ni na dhivela mndilo ka madhoropa akwe, awu wu no hisetela otshe makhalo akwe.

Mitengo 24:24

Se sitimela sa mabambe ka mati a Kitime, si na xanisa Asuri; kambe si na xupha Vahebheri; kuve nene a naya kulovani.

Dhewuteronome 32:27

Aniko ni thavile kurukwa ngu valala vawe, nguko va na ti kulisa, va txi kha vona: “Manza athu ngu ona ma nga humelela, hi nga Mkoma a nga maha toshe tiya!”

Mavingu 21:4

Kuwona ko tikulisa, ni mbilu yo ti guleta, njionho txa wo biha.

Isaya 2:12

Nguko ditshiku da Mkoma wa Mabutho a Tiyimbi, di na va do veka hahatshi votshe va va tikulisako ni ku ti dhumisa.

Dhaniyeli 11:45

A na gwimba matenda akwe a wukoma hagari ka Linene la hombe, ka mmango wo sawuleka wo tshura ngutu, kambe a naya gwitelwa, kupwateka ni wo m'vhuna.