Isaya 1:5 - Bhiblia Yo Sawuleka

⁵ Ngu kutxani mi no tsayiswa, nga kusimama miya masoni ngu kueyisa kani? Wotshe msungo wa lwala, ni yotshe mbilu yi pandisekile.

Isaya 1:5 Referans Kwoze

Ezekhiyele 24:13

Amu ka wubihi wako ku ni nduma yo biha, nguko ni ku sawulekisile, aniko awe khwa ti sawulekisa; khu na mbiswa u sawulekiswa ka wubihi wako, ngako ni si leki ku ku henyela.

Jeremiya 5:3

O Mkoma, ina maso ako kha ma vereli tinene kani? Awe u va pekile, aniko kha vapfa kupanda. U va lovisile, aniko kha va tumela kulaywa. Va bangisile tikhohe tawe kupinda ni dirigwi Va lambile kuhunduluka.

Isaya 31:6

Hundulukelani ka wule koko vanana va ka Israyeli va nga mtshuralela ngutu.

Jeremiya 5:31

Vaprofeti va profeta makuhu, hambi vaphaxeli va fumela va txi laywa ngu vona; ngu toneto vathu vangu va ti lavako. Aniko mi na maha txani magwito ka kona kani?

Jeremiya 9:3

Se va domba tidimi tawe nga malaho kasi kuhemba makuhu, va na ni mtamo ditikoni, aniko kha va wu thumisi kumaha ta tinene, nguko vaya masoni ngu kubiha ni kubiha, kha va ti zivi, kuwomba Mkoma.

Jeremiya 2:30

Ni pekile walo vanana vanu, kha va tumela kukawukwa. Ditxhari danu di date vaprofeti vanu nga ngonyamo yi hasamulako.

Nehemiya 9:34

Se vafumeli vathu, vathangeli vathu, vaphaxeli vathu ni vatate vathu kha va xayisa mlayo wako, hambi kuengisa sirumo sako ni wufakazi wako, mbimo yi u nga va sola.

Jeremiya 5:5

Naya ka vahombe, ni naya womba-womba navo; nguko va ziva nzila ya Mkoma, ni milayo ya Txizimu txawe.” Aniko votshe va ti ti funyile dikange, ni kubhenula majoke.

Isaya 33:24

Se muaki ni wammweyo kha na mbi khene: Na lwala; nguko vathu va va no zumba ka dona, va na divalelwa ka wubihi wawe.

Isaya 9:21

Manasi a na wukela Efrayime, se Efrayime a na wukela Manasi, se ngu wumbidi wawe va na wukela Judha. Se ngu totshe tiya, txiviti txakwe kha txi gumi, ni dianza dakwe a nga ti di guletile.

Isaya 9:13

Hambi keto, vathu vava, kha va tshumelela ka wule a va lwisako, kha va lava Mkoma wa Mabutho a Tiyimbi.

Isaya 1:23

Vathangeli vako va ni eyisa, va timaha vangana va makhamba; votshe va dhunda kuxavelelwa ni kuhakelwa; kha va mahi wunene ka vo felwa ngu vaveleki, ni timhaka ta tinoni kha ti hoki masoni kwawe.

2 Makronika 28:22

Hambi kule a nga ti ti kuxanisekani, mfumeli Akazi a toya masoni e onhela Mkoma.

2 Vafumeli 1:13

Se mfumeli a to engeta e rumela mmwani mthangeli wa wuraru, ni vathu va mtxhanu wa magumi; sekoko mthangeli wule a to kwela eya khizama ngu mazolo masoni ka Elija, e mkhongotela a txi khene: Awe m'thu wa Txizimu, na ku kombela ti to uva ni wumbilu ngu wutomi wangu, ni wutomi wa sithumi siya sako sa mtxhanu wa magumi.

Jeremiya 13:23

Ina Muetiyopiya a nga txitxa mxowo wakwe kani? I di ku ngeto, nanu mi nga sikota kumaha tinene, anu mi nga tolovela kumaha kubiha.

Jeremiya 17:9

Se mbilu mkanganyisi kupinda sotshe silo, yi sinile; i mani a no yi ziva kani?

Jeremiya 44:15

Sekoko va to mu xamula Jeremiya votshe vavamna vale va nga ti tiziva ti to vasikati vawe va hisela dibaselo sizimu sa walo, ni dotshe dibutho da hombe da vavasikati vale va nga ti emile, kumweko ni votshe vathu vale va nga ti ti zumba Patrosi ditikoni ka Egipta, va txi kha vona:

Sidilo 5:17

Ngu toneto, ti tsivalisilwe timbilu tathu; kambe ni maso athu ma pfhupete.

Ezekhiyele 34:4

Kha ma tsanisa yile yo pwata mtamo, kha ma thuma yile yo lwala, kha ma lunganyetela yile yo khudukiswa, ayile yo penga kha ma yi wuyisa, kambe kha ma tsimbila mi lava yile yo mwalala; aniko mo ti khozisa ngu kunemetisa ni kukarata.

Ezekhiyele 34:16

Ni na tsimbila ni lava yile yo mwalala, kambe ni na wuyisa yile yo penga, ni txi tsanisa yile yo khudukiswa, ni kuthuma yile yo lwala; aniko ayile yo ena ni yile ya mtamo ni na ti khundumusa; tona ni na ti dyisa ngu wululamo.