Hoseya 9:17 - Bhiblia Yo Sawuleka

¹⁷ Txizimu txangu txi na va lamba, nguko kha va txi engisi; va na tsimbila-tsimbila hagari ka matiko va si thumi txilo.

Hoseya 9:17 Referans Kwoze

Hoseya 7:13

Dikhombo kwawe, nguko va ni tutumile; va na loviswi, nguko va ni lekile, ani ni va tirute kambe va hembile makuhu ngu ngani.

Mithumo 3:23

se wuhi ni wuhi a no mbi engisa mprofetiyo, a na thaviswa ha ditikoni.’

Zakariya 1:4

Mi nga mahiseni kufana ni vatate vanu, avale vaprofeti vo khata va nga womba-womba kwawe, va txi kha vona: Mkoma wa Mabutho a Tiyimbi a khene: Hundulukani konkuwa ka tinzila tanu to biha, ni ka mithumo yanu yo biha. Aniko kha va ni engisa, hambi ku ni pfisisa, kuwomba Mkoma.

Mika 7:7

Ani koko, ni verela ka Mkoma; ni na verela ka Txizimu txa kuhanyiswa kwangu; Txizimu txangu txi na ni engisa.

Isaya 48:18

O! I tiku u to engisa sileleto sangu! Sekoko, kudikha kwako ku ndi na fana ni mnambo, ni kululama kwako nga mavimbi a linene.

Amosi 9:9

Nguko ni na rumisa ni kuzuza nyumba ya ka Israyeli hagari ka otshe matiko, ku nga tile yi zuziswato tona fulaho amu ka txiselo, ku siwi ni tshenda ni ya yimweyo ha mafuni.

Hoseya 4:10

Va nadya aniko kha va na mbi khura; va na geleza aniko kha va na mbi anda; nguko va lekile kurendekela Mkoma.

Isaya 7:13

Sekoko Isaya a to khene: Engisani konkuwa, anu va nyumba ya ka Dhavhidha! I mhaka yayidotho yo xanisa vathu, koza mi lava ni kuxanisa Txizimu txangu kani?

Mavingu 29:1

M'thu wule a ku a txi kawukwa ko tala e ti bangisa msungo, a na phatulwa ngu txikuluveta, asi kalamuki.

Masalmo 31:14

Aniko themba yangu yi kwako, Mkoma; se ani ni huwelela ti to awe u Txizimu txangu!

Nehemiya 5:19

Awe Txizimu txangu, ni alakanye ka totshe ti ni mahelako vathu vava.

2 Makronika 36:16

Kambe vona va to ruketela mitumi ya Txizimu ve eyisa mapswi awe, va tseketsete vaprofeti vakwe, kala kuza kuhenya ka Mkoma kukwela txitimwi ka vathu vakwe, kupwateka ni wammweyo wo huluka.

2 Makronika 18:13

Sekoko Mikaya a to khene: Ni xambanya ngu Mkoma a hanyako, na womba totshe tile Txizimu txangu txi no ni ruma kuwomba tona.

Dhewuteronome 32:26

Ni ti khani: “Ni na va hangalasa, va si swi va txi alakanywa hagari ka mafu!”

Jakobe 1:1

Ani Jakobe, txithumi txa Txizimu ni txa Mkoma Jesu Kristu, ka tihunzu ta digumi ni timbidi ti nga hangalaka ni otshe matiko, ni mi navelela wutomi.

Vafilipiya 4:19

Txizimu txangu, txi na mi ninga, ngu kutatiseka, sotshe si mi si vilelako, madingano ni kutala ka thomba ya txona ya kuphatima, ngu Kristu Jesu.

Johani 20:28

Se Tomasi a to khene: “Mkoma wangu ni Txizimu txangu!”

Johani 20:17

Jesu a to khene kwakwe: “U nga ni gwese, nguko kha ni nzi kuya ka Tata. Aniko tsula ka vanathu, u txi ya va gela, u txi khawe: Na kwela, ni ya ka Tate wangu, i ku Tate wanu; ka Txizimu txangu, i ku Txizimu txanu.”

Johani 7:35

Ngu kota yeto, Vajudha va to khata kuwotisana, va txi kha vona: “O lava kuya hani, aku hi no tandeka ku mmana kani? O lava kuya ka va va nga hangalaka hagari ka Vagriki. O lava kuya gondisa Vagriki kani?

Amosi 8:2

Se Mkoma a to khene: U wona txani awe Amosi kani? Se ani ni txi khani: I thavangu ya mihando ya malanga. Sekoko, Mkoma a to nigela, a txi khene: Kuhokile magwito ka vathu vangu va ka Israyeli: Kukhukhela kuwa kala kupinduka, na mbi ngadi ni pinda ngu kwawe.

Jeremiya 6:30

Vona va na wombwa ku i silivhela yo lekwa, nguko Mkoma a va lekile.

Dhewuteronome 4:25

Mbimo yile mi no maneka mi di velekile vanana ni vatukulu, ni kuva se mi di kumbile ha mafuni, mi ti bihisa ngu ku ti khandela sithombe sokari, mi txi maha ati i ku to biha masoni ka Mkoma, Txizimu txanu, miza mi txi mu henyisa,

Dhewuteronome 4:27

Mkoma a na mi hangalasa hagari ka vamatiko, se mi na sala mi di va mtengo wa wudotho, hagari ka mifumo yiya, Mkoma a no va a txi mi yisa ka yona.

Jeremiya 7:13

Kona kuwa koko, mi di mahile totshe tiya, kuwomba Mkoma, ni wombile kwanu i di ngadi mixo, ni mi gela, aniko kha ma engisa; ni to mi dhana, kambe kha ma xamula.

Jeremiya 7:15

Ni na mi tutumisa masoni kwangu, ngako ni hinganako ni ti tutumisile tindiyanu totshe, lihunzu lotshe la ka Israyeli.

Hoseya 4:6

Vathu vangu va lovisilwe, ngu kule va nga pwata wuzivi; nguko awe u lambile wuzivi, se nani na kulamba, kasiku u si mahi mphaxeli masoni kwangu; akule u nga divala mlayo wa Txizimu txako, nanani ni na divala vanana vako.