Hoseya 8:13 - Bhiblia Yo Sawuleka

¹³ Madingano ni miphaxo ya siningo sangu, va ningela tinyama ve tshumela vedya, aniko Mkoma kha amukela; konkuwa a na alakanya kuwekela kwawe, e tsayisa sionho sawe, vona va na tshumelela Egipta.

Hoseya 8:13 Referans Kwoze

Hoseya 9:9

Va ti wisile kuonhani ka hombe ngutu, kufana ni masiku a Gibheya. Ene a na alakanya wubihi wawe, e va tsayisa ngu mhaka ya sionho sawe.

Hoseya 9:6

Nguko wona taku vona va tsute ngu mhaka yo hoxotwa, kambe Egipta a na va amukela, Menfisi a na va tshotsha; kunavela ka silivhela yawe ku na fenengetwa ngu maxexwe, ni mipa yi na mila matendani kwawe.

Amosi 8:7

A xambanyile Mkoma ngu wudhumo wa Jakobe a khene: Kha ni na mbi yi divala yotshe mithumo yakwe, ngu ha ku si gwitiko.

Amosi 5:22

Hambi ni txo ni ninga miningelo, ni miningelo ya sakudya, na mbi tsaka ngu sona, kambe na mbi wonetela miningelo ya sihari sanu.

Hoseya 11:5

Kha va na mbi tshumelela ditikoni ka Egipta, kambe Asiriya a na va mfumeli wawe; nguko va lamba kuhunduluka.

Hoseya 5:6

Vona va na tsula ni tinvuta tawe ni mathokazi awe a tihomu, kasi kuya lava Mkoma, aniko kha va na mbi mmana: Ene a khukhile kwawe.

Jeremiya 14:10

Mkoma a womba ngu ditiko diya, a txi khene: Va dhunda kupeperukela nga tiya, kha va ti ñola kutsimbilani kwawe; ngukonaho, Mkoma kha tsakiswi ngu vona; se a na alakanya wubihi wawe, e tsayisa sionho sawe.

Isaya 1:11

Mkoma a khene: Yi ni vhuna txani miphaxo yanu yo tala kani? Ni karate ngu miningelo yo hiswa ya tihamba, ni mafura a sifuyo so nona; kha ni tsakeli mnoha wa marole, wa sivuntana, ni mnoha wa tiphongo.

Dhewuteronome 28:68

Mkoma a na mi tshumeta mi tsula Egipta ngu ngalava, ngu nzila yile ni nga mi gela ni txi khani: “Khu na mbiswa u txi yi wona kambe!” Koneyo, mi na ya ti xayisa, vavamna ni vavasikati ka valala vanu, kasi ku mi maha tikhumbi, aniko kha ku na mbi maneka wo mi xava.

Mtuletelo 16:19

Didhoropa da hombe di to abaneka ngu madhawa mararu, se madhoropa a mifumo ma to wa, konako Txizimu txi to khumbula Bhabhilona, Didhoropa da Hombe, kasiku txi di ninga digombe da vhinya ya txiviti txa kuhenya ka txona.

1 Vakorinto 11:29

Awule a dyako ni kusela asi pimisi mmidi wa Mkoma, wo ti dyela ni ku ti selela txiabaniso txakwe apune.

1 Vakorinto 11:20

Ngu nzila yo nga toneto, mbimo yi mi sengeletanako, kha mi sengeletaneli kudya txilalelo txa Mkoma,

Hoseya 12:11

Ina Gileyadhi hi nga ene wubihi kani? Vona kha va vhuni txilo ngu ditshuri; Kona Giligali va daya tihomu; siluvelo sawe si fana ni mimumbu ya marigwi, madhawani ka tithembwe.

Hoseya 7:16

Vona va wuya, kambe kha va wuyeli Nyatxitimwi. Va ti mahile kufana ni wulaho wo kanganyisa; vathangeli vawe va dawa ngu ditxhari, ngu mhaka ya wulala wa lidimi lawe; atiya ti nava txisekiso ditikoni ka Egipta.

Hoseya 7:2

Kambe kha va wombi timbiluni kwawe ti to ani na alakanya wotshe wubihi wawe; konkuwa koko, va randelwa ngu mithumo yawe; ya woneka masoni kwangu.

Hoseya 4:9

Ngu toneto, nga ti vaku ngu tona vathu vangu, mphaxeli nene a nga toneto; ni na va tsayisa ngu mhaka ya mahanyelo awe, ni ku vaninga hakela ya mithumo yawe.

Mavingu 21:27

Mphaxo wa muonhi njinyenyeko; ngutu-ngutu wu txi ningelwa ngu kulava to biha.

1 Samuwele 15:22

Kambe Samuwele a to khene: Ina Mkoma a tsakiswa ngu miningelo ya kuhiswa ni miphaxo, kupinda kuengisa dipswi da Mkoma kani? Wonani taku kuengisa kutshuko kupinda mphaxo; ni kupfisisa kutshuko kupinda mafura a tihamba.

Eksodha 32:34

Tsula koko konkuwa, thangela vathu u txi ya ha ni nga kuleleta kona. Ngelozi yangu yi na thangela masoni kwako. Aniko ka ditshiku di ni nota thethisa, ni nata va tsayisa ngu txionho txawe.”

Eksodha 20:3

U ngave ni simwani sizimu masoni kwangu.

Luka 12:2

Nguko kha ku na txilo txi txi nga fenengetwa, atxi txi no mbi vhunungulwa, hambi txi txi nga siswa, txi no mbi ziwa.

1 Vakorinto 4:5

Ngu toneto, mi nga tekeleni kulamula, txi sinzi kuhoka txikhati, kala kuwuyani ka Mkoma, awu a nota woninga mithumo yi yi nga sisala mtemani, e wonekisa makungo a timbilu. Se ngu konaho mmwani ni mmwani a nota amukela ka Txizimu wudhumo wu wu m'fanelako.

Jeremiya 6:20

Ma ni vhuna txani mafura a Sabha ni mipepo ya ditiko da kule kani? Miningelo yanu ya kuhiswa kha yi ni tsakisi, ni miphaxo yanu kha yi ni tsakisi.

Ezekhiyele 29:16

Kambe khu na mbi ngadi u thembeka ka nyumba ya ka Israyeli, kasi ku va alakanyisa ngu wubihi wawe, ngako va txi wona msana kwawe; va no tiziva dwe taku ani ngani Mkoma Txizimu.

Hoseya 7:11

Nguko Efrayime a fana ni txituvani txo divala, txa kwa mbi na mapimo; va dhana Vaegipta, veya Asiriya.

Hoseya 9:7

Ma hokile masiku o tsayiswa, ma hokile masiku a kupharela; Israyeli a na tiziva; mprofeti kha na mapimo, m'thu wa moya, njiphukuphuku; ngu mhaka ya kutala ka wubihi wako, ni lona livengo li na kula.

Hoseya 6:6

Nguko ani ni lava wumbilu, kha ni lavi mphaxo; ni kuziva Txizimu kupinda miningelo yo hiswa.

Amosi 3:2

Ka totshe timwaya ta ha mafuni, ni zivile anu dwe; ngu koneho, ni na mi endela ngu mhaka ya wotshe wubihi wanu.