Hoseya 7:2 - Bhiblia Yo Sawuleka

² Kambe kha va wombi timbiluni kwawe ti to ani na alakanya wotshe wubihi wawe; konkuwa koko, va randelwa ngu mithumo yawe; ya woneka masoni kwangu.

Hoseya 7:2 Referans Kwoze

Luka 12:2

Nguko kha ku na txilo txi txi nga fenengetwa, atxi txi no mbi vhunungulwa, hambi txi txi nga siswa, txi no mbi ziwa.

Masalmo 90:8

Awe u vekile sionho sathu masoni kwako wa landula sionho si hi nga si maha kusisalani.

Amosi 8:7

A xambanyile Mkoma ngu wudhumo wa Jakobe a khene: Kha ni na mbi yi divala yotshe mithumo yakwe, ngu ha ku si gwitiko.

Jeremiya 14:10

Mkoma a womba ngu ditiko diya, a txi khene: Va dhunda kupeperukela nga tiya, kha va ti ñola kutsimbilani kwawe; ngukonaho, Mkoma kha tsakiswi ngu vona; se a na alakanya wubihi wawe, e tsayisa sionho sawe.

Jeremiya 2:19

Kubiha kwako ku na kutsayisisa, u pekwa ngu wubihi wako, ngukonaho, ti zive ku tibihile kuleka Mkoma, Txizimu txako. Ni kwa mbi thava ka tisa kupandiseka, kuwomba ene apune Mkoma Txizimu txa Mabutho a Tiyimbi.

Vahebheru 4:13

Kha txi nga ho txiwumbwa ni txa tximwetxo txi sikotako kusisala masoni ka Txizimu, nguko, sotshe si tulekile si txi maneka si di ha kubasani masoni ka wule hi fanelako kuya thethiswa ngu ngene.

1 Vakorinto 4:5

Ngu toneto, mi nga tekeleni kulamula, txi sinzi kuhoka txikhati, kala kuwuyani ka Mkoma, awu a nota woninga mithumo yi yi nga sisala mtemani, e wonekisa makungo a timbilu. Se ngu konaho mmwani ni mmwani a nota amukela ka Txizimu wudhumo wu wu m'fanelako.

Hoseya 9:9

Va ti wisile kuonhani ka hombe ngutu, kufana ni masiku a Gibheya. Ene a na alakanya wubihi wawe, e va tsayisa ngu mhaka ya sionho sawe.

Jeremiya 32:19

U wa hombe mu ka makungo, u ni mtamo mu ka kumaha, maso ako ma wona otshe mahanyelo a vathu, kasi kuninga ka mmwani ni mmwani madingano ni mahanyelo akwe, ni madingano ni mihando yakwe.

Jeremiya 16:17

Nguko maso angu ma ti wonetela tinzilani kwawe kotshe; kha va sisala masoni kwangu, ni si onho sawe kha si sisaleki masoni kwangu.

Jeremiya 4:18

Mahanyelo ako ni mithumo yako si ku wusete silo siya, ngu wona m'hando wa kubiha kwako. Kha ditshuri wa bava, ka panda ni mbiluni.”

Isaya 5:12

Sitende ni tiharipa ni singomana, ni titshodi, ni vhinya, siho mu ka mibuso yawe ya hombe, kha va khatali ngu mthumo wa Mkoma, hambi kuwona mithumo ya manza akwe.

Masalmo 25:7

U nga alakanyele sionho sa wujaha wangu, hambi ni sihambunyeto sangu; aniko ni alakanye, Mkoma, ngu konaho ka wunene wako, ni wumbilu wako.

Masalmo 9:16

Mkoma a ti wonekisile, kambe a lamute; nene m'bihi a bzwetilwe ngu mithumo yakwe yo biha.

Hoseya 8:13

Madingano ni miphaxo ya siningo sangu, va ningela tinyama ve tshumela vedya, aniko Mkoma kha amukela; konkuwa a na alakanya kuwekela kwawe, e tsayisa sionho sawe, vona va na tshumelela Egipta.

Isaya 1:3

Homu ya ziva nyamne wa yona, ni mbongola ya wu ziva mkawu wa nyamne wa yona; aniko Israyeli kha zivi txilo, vathu vangu kha va pfisisi txilo.

Masalmo 50:22

Engisani ta tinene, anu mi divalako Txizimu; kasiku ni si mi phatuleli, ku si maneki ni wammweyo wo mi hulukisa.

Jobe 34:21

Nguko maso a Txizimu ma wonetela dihanyo da m'thu ni m'thu, kambe txa wona kotshe mu hi kandako kona.

Dhewuteronome 32:29

Idiku va txharihile, nga va txi ti pfisisa, nga va txi ziva kupimisa ta mangwana ni ta magwito awe!

Mitengo 32:23

se ngako mi si mahisi eto, mi na va mi di onhile masoni ka Mkoma; sionho sanu si na mi tumbulisa, kambe mi na tsayiswa ngu mhaka ya sionho sanu.

Isaya 44:19

Se kha ku nga ni wammweyo kwawe a khatalako ngutu, a ku ni wuzivi mwendo mapimo, kasi ku khene: Hafu ni hisile, ni bhikile dipawu txitimwi ka makala a mndilo, kambe ni yokile nyama txitimwi ka ona, nidya; se ni nga maha manyala ngu yile yi nga sala kani? Ina ni nga khizamela phande ya mndonga kani?

Isaya 26:16

Mkoma va ku endete kuxanisekani kwawe; mbimo yile txitsayiso txako txi ngata txitimwi kwawe, va to tshakunuta mkombelo wawe wa txihunja.

Jeremiya 17:1

Txionho txa Judha txi bhatwe mbiluni ngu mtenga wa txikete, wu ku ni tshoka ya dhayimana; txi vatetwe timbiluni kwawe, ni mu ka titxheho ta siluvelo,

Jeremiya 44:21

Ina a ngava a sa alakanya Mkoma, kha da hoka mbiluni kwakwe dibaselo dile mi nga hisa madhoropani ka Judha ni tinzilani ka Jerusalema, anu ni vatate vanu, ni vafumeli vanu ni tinduna, kumweko ni vathu va ditiko kani?

Hoseya 4:9

Ngu toneto, nga ti vaku ngu tona vathu vangu, mphaxeli nene a nga toneto; ni na va tsayisa ngu mhaka ya mahanyelo awe, ni ku vaninga hakela ya mithumo yawe.

Hoseya 9:15

Wotshe wubihi wawe wu maneka Giligali nguko nguho ni nga va nyenyela kona; ngu mhaka ya wubihi wa mithumo yawe, ni na va tshotsha hahanze ka nyumba yangu, kha ni na mbi va randa kambe; votshe vathangeli vawe mba kutitsimba.

Hoseya 12:2

Mkoma wa lwa ni Judha, kambe a na tsayisa Jakobe, madingano ni tinzila takwe; madingano ni mithumo yakwe a na m'hakela.

Jona 1:2

Khukha, tsula ka Didhoropa da Hombe da Ninivha, u txi ya di kawuka, nguko wubihi wa dona wukwete, uza wuhoka kwangu.

Masalmo 10:11

Ngu msana, a womba mbiluni kwakwe, a txi khene: “Txizimu txa divala, txa sisa khohe ya txona, kha txi woni txilo.”

Ezekhiyele 21:29

Hambi va txi kuwona u si nyawuli, hambiko va txi kuhuta makuhu kasi ku kuhayeka mkoloni ka vaonhi, ava va nga dayiselwa va txi fa, ditshiku di nata da kutsayiswa ka hombe.

Hoseya 6:2

Msana ka masiku mambidi, a na hi ninga wutomi; ngu ditshiku da wuraru a na hi wusa, hi hanya masoni kwakwe.